MALUKO 6

1Yesu yakawuka baho yakabita ku citumbi cakwe, ne wejizwa wakwe wakamutyatya. 2Ne lizuwa lye Sabato lyaza fika, yakanza kwijiza mu nhang'anilo yo wuhembelo. Ne wanhu wenji wono wamuhulika wakezina, wakatya, “Alu kazisola hayi i zinghani zizi? Na mahalaci gaga gono yapejigwe? Kanyhi, yakwituma wule i metumo gaga mawaha go wizine gono yakwituma? 3Alu ma, si yo yuyu muselemala, umwana we cilume wa Malyamu u muwahawe wa Yakobo, na Yose na Yuda na Simoni? Ne walumbuze ma, si wali baha hono hetu? Holeka wakatuga mahwele nayo.” 4Nayo Yesu yakawatya, “Umuwizi katugaga lilumbo hanhu hanji hose, ninga si katugaga lilumbo mu'si yakwe, na mu wanduguze na mu kaya yakwe.” 5Hamba siyasuma kwituma mapoto baho, langa yakawawicila miwoko watamwa wacefu, yakawaponya. 6Yakezina muno so wuleka kwihuwila kwawo. Ale, Yesu yakapilima mu vikaya vyono vyali vili behi behi, yakwijiza wanhu. 7Nayo yakawacema wawalya i wejizwa we likumi na wejete, yakanza kuwatuma wejete wejete. Yakawapela vilungo vyo kulavizya macisi mavu, 8nayo yakawalajiliza yakutya, “Kolo mukubita mu muhinzo, mulece kusoleleza cinji co cose, langa musole nghome du. Mulece kusoleleza mukate, hamba mufuko wo kulombela, hamba pesa mu mifuko yenyu. 9Muvwale malatu, ninga mulece kuvwala kanzo nyejete nyejete.” 10Kanyhi yakawatya, “Ho hose hono mobocelwa mu kaya, mwikalaje mumo, sunga kolo mweza kuwuka i hanhu baho. 11Ne hanhu ho hose hono iwanhu wolema kumubocelenyi hamba kumuhulicenyi, muwuce baho, ninga mukung'unhe manghundi gono gali mu magulu genyu, ho yiwe wuhomelezi kuli wene.” 12Ale, wakatuluka, wakaganula wanhu wanene. 13Wakagalavya macisi menji, wakawabaka watamwa wenji mafuta, wakawaponya. 14Ale, umutemi Helode yakazihulika zizo zose, hambi ilitagwa lya Yesu nha lyali likumucile muno hanhu hose. Ne wanhu wanji watezaga, “Yohana Umubaputizi nha kazuka muli wafu, na ku soko yiyo holeka ivilungo vye mapoto vikwituma mulimo muli mwene.” 15Ninga wanhu wanji wakatya, “Umunhu yuyo yo Eliya.” Iwanji wakatya, “Yuyu yo muwizi kotya muyagwe ne wawizi.” 16Ninga Helode yaza kuzituga zinghani zizi, yakatya, “Yuyu yo Yohana! Namudumula mutwe, ninga'lu yazuka.” 17Baho halulongozi, Helode mweneco yali yalajilize vyono Yohana yebatwe, nayo yakamufunga mu jela. Nayo Helode, yanoza nhavivyo, ku soko ya Helodiyasi mono Helode yali yamutolile, na kuno kumbe ho yali mugolece wa Filipo, u mwanakwawe. 18Vyono Yohana yamutya, Helode, “Mwiko kuli'gwe kumutola u mugolece wo mwanakwenyu.” 19Holeka Helodiyasi yakamusula muno muno Yohana, yakasaka sunga yamuwulaje, ninga hamba nhavivyo, siyasuma yaye. 20Na Helode yamogopaga Yohana, hambi nha yali yamanyile vyono mwene yali munhu we ling'ani kanyhi yelile, holeka yakamukamisa. Helode yali yendile kumuhuliciza Yohana, hamba yiwe kolo yamuhuliciza, yagazikaga muno. 21Ale, mwizuwa linji, cikejela cilejeho, mwizuwa lyo wulelwe wakwe Helode. Nayo Helode yakawanozeza ndigwa iwanyamhala we libalaza lyakwe, iwasilikale ne wawaha wa Galilaya. 22Ale, umwana we cicekulu wa Helodiyasi yakenjila, yakavina, nayo yakawendeza muno, umwene Helode ne wajenzi wakwe. Umutemi yakamutya u muhinza yuyo “Wunombaje co cose cono wendile nane nokupela.” 23Kanyhi yakamwilahila, yakutya, “Co cose cono konomba, nokupela, hamba liwe lipinga lyo wutemi wangu.” 24Baho u muhinza yuyo yakalawila kunze, yakabita kumuwuza unyina yakutya, “Alu yaya, nombeci!” Nayo nyina yakamutya, wulombe “Umutwe wa Yohana u Mubaputizi.” 25No muhinza yakamubitila umutemi ko musunho, yakamulomba yakutya, “Nghusaka wumhele lulu baha mu ciya, umutwe wa Yohana u Mubaputizi.” 26Umutemi yakakalala muno muno, ninga ku so wilahize wakwe, na ku so wajenzi wakwe wono wali ha zindigwa, siyenda kumulemeza. 27Ale, umutemi yakamulajiliza umusilikale yakabita, yakamudumula mutwe Yohana mumo mu jela, 28Yakawuletela mu ciya, yakamupela yuyo muhinza, nayo muhinza yakamupela nyina. 29Nawo Iwejizwa wa Yohana, waza kuzihulika zizo, wakabita wakawusola u muwili wakwe, wakawuzika mu citenjelo. 30Nawo iwatumwa wawalya, wakawuya, wakekongholela ha mwande ya Yesu, wakamulonjela zose zono wanoza na zono wejiza. 31Ne wanhu wenji muno wazaga no kubita, sunga na Yesu ne wejizwa wakwe siwasuma kutuga hamba cilejeho co kulya ndigwa. Holeka Yesu yakawalonjela iwejizwa wakwe yakutya, “Alenyi cibite sese cili wene hanhu hono hasina wanhu, ho mukacehe hadodo.” 32Wakawuka weneco wali wene mu ngalawa, wakabita hanhu hono hasina wanhu. 33Ninga hamba nhavivyo, wanhu wenji wakawawona vyono wakubita, nawo wakawamanya. Holeka wanhu wenji wakalawa mu makaya gose, wakamanyhila kuko kono Yesu ne wejizwa wakwe wabitaga, wakalongola kufika. 34Nawo wali weza kutima hasi ye ngalawa, Yesu yakagawona i mapuga mawaha ge wanhu, yakawawonela lusungu, hambi nha wali wenha zingholo zono zisina mudimi. Nayo yakanza kuwejiza nghani nyinji. 35Imapango ge misi gali gakondya puluta. Nawo iwejizwa wakwe wakamubitila Yesu, wakamutya, “Alu ahano nha nyika, ne lizuwa nha lyasweza. 36Holeka wakombolaje wanhu wabite ku migunda na ku vikaya vye behi behi, wakegulile ndigwa.” 37Ninga Yesu yakawatya, “Nyenye nyo weneco muwapelaje zindigwa.” Nawo wakamuwuza wakutya, “Alu cibite cikagule mikate ya pesa, dinali magana mejete, ho ciwapele zindigwa?” 38Nayo Yesu yakawawuza, yakatya, “Alu 'nye mwina mikate milinga?” Bitenyi mukayilanje. Waza manya wakamutya, “Hoyili mikate mihano ne zisomba nyejete.” 39Baho, Yesu yakawalajiliza iwejizwa wawalonjele iwanhu wose wekale hasi mu mahanze ge dedede vipuga vipuga. 40Nawo wakekala hasi vipuga vipuga vya wanhu igana limonga limonga, na vye wanhu makumi mahano mahano. 41Hanyuma yayo Yesu yakayisola i mikate yiyilya mihano ne zisomba zizilya zinyejete, yakagalamila kucanyha, yakamulumba Mulungu, yakayibegula i mikate, yakawapela i wejizwa wakwe wawagawile wanhu. Ne zisomba zizilya zinyejete nazo yakawagawila wose. 42Ne wanhu wose wakalya, wakeguta. 43Wakatondoleza ivibegulwa vye mikate na vye zisomba, wakamemya nhoto yikumi na nyejete. 44Nawo wono walya i mikate yiyo, wali walume elufu yihano. 45Lo lulolulo Yesu yakawalajiliza iwejizwa wakwe wenjile mu ngalawa, walongole kubita ku Betesayida, ku nhumbi ye lilamba, lono mwene yali yakali kugelaga i mapuga ge wanhu. 46Na lono yali yawelaga yakondya, yakabita kwi'tunda kulomba. 47Yaza kuwa cinyamihe i ngalawa yali yili ha ciligati ye lilamba, nayo yali mweneco yali wene du mu'si nghavu. 48Ale, yakawawona iwejizwa wakwe wakugazika muno kuyijendya ingalawa, hambi imbeho nha yali vidomile nawo. Na lono kwali kweza behi no kudandawuka, Yesu yakawabitila i wejizwa wakwe yakujenda mucanyha ye malenga. Yakasaka kuwapuluta. 49Ninga wakamuwona yakujenda mucanyha ye malenga, nawo watezaga mba yisoce, wakazoza. 50Hambi nha wose wali weza kumuwona, wakogopa muno muno. Nayo Yesu yakalonga nawo, yakutya, “Mutulane, yo nene, mulece kogopa!” 51Hanyuma yayo, yakenjila mu ngalawa yono wali wali mumo, ne mbeho yikanyamala. Nawo wakezina muno, 52hambi nha wali wakali sinezuka inhunizo yo kuwalisa wawalya i wanhu we elufu yihano. I mahala gawo gali gakali si nazibata yaye. 53Wakalowoka lilamba, wakafika kuyisi ya Genesaleti, wakayiwopa ingalawa ha mwejelele. 54Nawo wali weza kutima hasi ye ngalawa, lo lulolulo iwanhu wakamumanya Yesu lwa kamonga. 55Hobaho wakawa kupilima mbela mbela muyisi yiyilya yose, wakanza kuwadinghula iwatamwa mu vitanda vyawo, wakawategula ko kose, kono wamuhulika Yesu vyono kowa yali kuko. 56Na ko kose kono Yesu yabitaga, mu vikaya na mu makaya, hamba mu migunda, iwanhu wakawawika iwatamwa mu zisokoni, wakamunena wapamize hamba licindo lye civwalo cakwe du. Nawo wose wono wamupamiza, wakapona.

will be added

X\