MALUKO 4

1Yesu yakanza kwijiza kanyhi, akuno yali ha nhumbi ye lilamba. Ne lipuga yiwaha lye wanhu likamupilima, sunga yikawa yimunojeye mwene yenjile mu ngalawa no kwikala mwi'lamba. I wanhu wakawa wekaye mu'si nghavu, ha nhumbi ye lilamba. 2Nayo yakawejiza nghani nyinji mu vihwanicizo, na mu mejizo gakwe yakawalonjela, yakutya, 3“Hulicizenyi ta! U mumiza mbeyu yakabita kumiza mbeyu. 4Na lono yazimizaga, zinji zikalagala mu nzila, ne zindeje zikaza zikazilya. 5Zinji zikalagala mu mabwe hono hali hasina muhangha mwinji, nazo zikacindika mbela, mbela, na vyono u muhangha wali siwutelile, 6lizuwa lyaza walika, zikawomba, na vyono milela yayo yali yisina vilungo, zikanyala. 7Zinji zikalagala mu mamivya, ne mamivya gakahoga no kuzititiliza, nazo hamba sizalela mikalo. 8Zinji zikalagala mu muhangha muswanu, zikawiluka no kulela: zinji zikalela mhece makumi madatu, zinji makumi mutandatu, na zinji yigana.” 9Ale Yesu yakawatya, “Hulicizenyi ta, mono yena makutu go kuhulicila, yahulice.” 10Na lono Yesu yali yali wene, wanji wa muli wawalya wono wamuhuliciza, wakamuziza hamonga na walya we likumi na wejete, nawo wakamuwuza ze vihwanicizo vivyo. 11Nayo Yesu yakawatya, “Anye mupejigwe kumanya ze cinyele zo wutemi wo Mulungu, ninga kuli walya wono wali kunze, wolonjelwa zose mu vihwanicizo. 12‘Ho walanje mbeka, ninga walece kuwona. Wahulicize mbeka, Ninga walece kwizuka. Hono si nhavivyo, wali wamupitucile u Mulungu, nayo yali yawanenele.’ ” 13Ale, Yesu yakawawuza yakutya, “Alu anye simukucimanya i cihwanicizo cici? Alu ho mosuma wule kucimanya icihwanicizo co cose cilya? 14U mumiza mbeyu, kamizaga inghani yo Mulungu. Hanji i nghani yiyo yikuwa kugwiswa mu nzila, 15ne wanhu wa mu nzila wakuyihulika, ninga kolo wayihulika, Setani yakuza no kuyiwusa inghani yiyo yono yihadikwe muli wene. 16I wanhu wanji wehwanile nhe zimbeyu zilya zono zagwila mu mabwe. Kolo wakuyihulika inghani yiyo wakuyibocela mbela mbela na nyemo. 17Ninga siyikuwenjila no kuwa na milela muli wene, nawo wakujendelela kuyibata inghani yiyo cidaha cidodo du, na kolo wukwijela wugaye, hamba wuwinjilizwe so nghani yiyo, hodu wakutukuwike i mitima yawo, no kuyileka kamonga. 18Iwanhu wanji nawo, wehwanile nhe zimbeyu zilya zono zagwila mu mamivya. Aco co cihwanicizo ca wawo wono wakuyihulika inghani yiyo, 19ninga i mahwele ga kononze yiyi, ne makoco ge sawo, ne masulumizi ge mawala gose, gakuwenjila no kuyititiliza inghani yiyo, nawo hamba siwakulela mikalo. 20Ninga iwanhu wanji, wehwanile nhe zimbeyu zilya zono zamizwa mu muhangha muswanu. Awa wo wakuyihulika i nghani yiyo, wakuyibocela, no kulela mikalo: wanji makumi madatu, na wanji makumi mutandatu na wanji igana limonga.” 21Yesu yakajendelela kuwalonjela yakutya, “Ma, i wanhu wakolelezaga tala wayileta kugati no kuyigubika ne bakuli hamba kuyiwika mwi'vungu lye citanda? Ng'o ye! Langa wayiwikaga mucanyha yo wuwiko wayo. 22Holeka co cose cono cihundikwe nha cokwanzalikwa calinze, na co cose cono cigubikwe, cogubulwa. 23Ale, hulicenyi, hono mwina makutu!” 24Yakawatya kanyhi, “Hulicizenyi muno muno cono mukuhulika! I cipimo cico cono mukwitumamila kuwapimila i wanhu wanji, co cico du cono u Mulungu nayo kolokwitumamila kumupimilenyi na nyenye, kanyhi molokonjelezwa. 25Hambi mono yena cinji nha kopegwa kuciza. Nayo mono yasina cinji, sunga na cono yena naco nha kosolelwa.” 26Yesu yakajendelela kutya, “Uwutemi wo Mulungu wihwanile u munhu mono yakuhadika mbeyu mu mugunda. 27Mu cilo yakugona, na mu misi yali meso, na mwipango lilyo, zimbeyu zikucindika no kuwiluka ninga mwene siyamanyile vyono zikunozeka. 28U muhangha weneco wo wunozaga zimbeyu ziwiluce no kulela mikalo; zamulaga kutula mahamha mapya hanyuma yayo yiso, na mu ndumilizo yayo, zimhece zimemile mwi'so. 29Na lono wuhemba wapya, munhu yuyo yakwanza kuyitumamila nzolo yakwe, hambi cipango ce ndudula nha caza.” 30Kanyhi Yesu yakatya, “Alu cowihwaniciza na cici u Wutemi wo Mulungu? Hamba ciwuloloseze mu cihwanicizoci? 31Wihwanile nhe mbeyu ye haladali, yono ndodo kuciza mbeyu zose. 32Ninga kolo yahadikwa, yicindikaga no kuwa ibici iwaha kuciza mabici gose ga mu mugunda. Ne manhambi gayo gawezaga mawaha, sunga ne zindeje za mu mbago zisumaga kuzenga manhuli gazo mu mubeho wayo.” 33Nayo yawaganulila i nghani yakwe mu vihwanicizo vinji vinha vivi, yaduwa nawo sunga mu nghango yono wasuma kwizuka. 34Nayo siyalonga nawo co cose cono cali cisina cihwanicizo, ninga lono yali hamonga ne wejizwa wakwe, wene, yawalolosesaga zose. 35Mu cinyamihe, mwi'zuwa lilyo, Yesu yakawatya iwejizwa wakwe, “Alenyi cilowoce, cibite ku nhumbi nzagwe ye lilamba.” 36Ale, wakalileka ilipuga lye wanhu, wakamusola Yesu mu ngalawa yono yali yali mumo. Baho hali hozili ne zingalawa zinji nha vivilya. 37Baho, wukawa kwanza mukukunzo muwaha we mbeho, imawingo gakayitowa i ngalawa yiyo sunga yikanza kumema malenga. 38Nayo Yesu yali yali kunyuma ye ngalawa yagonile, yeciwize muto. Ale, i wejizwa wakamusinhusa wakamutya, “Mwijizi, alu wukuwona si cinji vyono caza kongomela?” 39Ale, Yesu yakasinhuka, yakalitacila lilyo likukunzo liwaha lye mbeho, no kugatya i mawingo ge lilenga, “Nyamala! Tule!” Baho i mbeho yikatula hakanyamala twii. 40Hanyuma yayo Yesu yakawatya iwejizwa wakwe, “Alu nhawule mukogopa?” Alo mukali musina wihuwilo? 41Nawo wakogopa muno, wakawa kwiwuza wakutya, “Alu mwene yuyu yo nani, ta? Mono sunga ne mbeho ne mawingo ge lilenga vikumuhulika?”

will be added

X\