MALUKO 2

1Vyaza kupuluta vilo vicefu, Yesu yakawuya ku Kapelanawumi, iwanhu wakahulika vyono yali ha kaya. 2Ale, wakaza wanhu wenji muno, wakamema, sunga na ha mulango hakawa hasina hamba cilejeho. Nayo Yesu yakawaganulila inghani yakwe, 3no munhu yunji mono yali yadejepe, yakaletwa kuli mwene yadinghuywe na wanhu wane. 4Ku soko yo winji we wanhu, siwasuma kumutegula behi na Yesu. Holeka wakapula mwi'tembe hono hali hoyali Yesu. Wali waza kondya kutuga hanhu ho kumukozeza, wakamutimya munhu yuyo mono yali yagonile mu citanda. 5Yesu yaza kuwuwona uwihuwilo wawo, yakamutya munhu yuyo mono yadejepe, “Go mwanangu kunenelwa wubi wako.” 6Iwejizwa wanji wo Wulajilize wono wali wekaye baho, wakehwesa mu zinhumbula zawo wakutya, 7“Yadahile nhawule kulonga nha vivyo? Ayu yakumutovula Mulungu! Vyono hasina munhu mono kosuma kunenela wubi, langa u Mulungu mweneco du, yo yasumile kunenela wubi.” 8Ninga Yesu yakagamanya kamonga i mahweso gawo, yakawatya, “Alu socici mukwihwesa nhavivyo mu zinhumbula zenyu? 9Alu yahayi imhelu muno, yo kumutya u munhu yuyu mono yadejepe, kunenelwa wubi wako, hamba yo kumutya, ‘Winuce, witwice citanda cako wubite?’ 10Ale, nghusaka mumanye vyono, u Mwana wo Munhu, yena wulajilize wo kunenela wubi we wanhu kono'nze.” Baho yakamutya u munhu yuyo mono yadejepe, 11“Nghukulonjela, winuce, witwice citanda cako, wubite ku kaya!” 12Ne wanhu wose lono wali wakali wamulanjile, u munhu yuyo yakenuka lwa kamonga yaketwika i citanda cakwe, yakawa kubita. 13Yesu yakabita kanyhi ku nhumbi ye lilamba. Lipuga lye wanhu likamuziza, nayo yakanza kuwejiza. 14Nayo Yesu lono yapulutaga, yakamuwona Lawi mwana wa Alifayo, yekaye ha hofisi yo kutowezeza kodi. Yesu yakamutya, “Wunhyatyaje!” Lawi yakenuka, yakamutyatya. 15Hanyuma, lono Yesu yali yekaye ha meza yakulya zindigwa mu kaya ya Lawi. I watoweza kodi wenji hamonga ne wanyo wubi wali wamutyatizye Yesu, sunga na wenji wa muli wene, wali wekalane hamonga nayo, hamonga ne wejizwa wakwe ha meza ye zindigwa. 16Ale, iwejizi wacefu wo Wulajilize wono wali Wafalisayo, waza kumuwona Yesu yakulya zindigwa hamonga ne wanhu wabi ne watoweza kodi, wakawawuza iwejizwa wakwe, wakutya, “Alu socici yakulya zindigwa hamonga ne watoweza kodi ne wanhu wabi?” 17Yesu yaza kuwahulika, yakawatya, “Wono si watamigwe, siwasakaga muganga, langa wawalya du wono watamigwe. Sinizize niwaceme wono wali ling'ani, langa i wanyo wubi.” 18Kukawa mwipango linji, iwejizwa wa Yohana ne wejizwa we Wafalisayo, wali walekaga kulya ndigwa. Ale, iwanhu wakaza, wakamuwuza Yesu, wakutya, “Alu socici iwejizwa wa Yohana ne wejizwa we Wafalisayo, walekaga kulya ndigwa, ninga iwejizwa wako siwalekaga kulya ndigwa?” 19Nayo Yesu yakawatya, “Alu wono walalikwe ku halusi, wolecelaci kulya ndigwa hono bwana halusi yakali hamonga nawo? Na mu mapango gose lono wakali hamonga na bwana halusi, siwosuma kuleka kulya ndigwa. 20Ninga lyolofika i lizuwa lono bwana halusi kolosolwa muli wene, baho langa ho wololeka kulya ndigwa. 21“Hasina munhu mono katemaga cilaka mu mwenda mupya, no kucihoneleza mu civwalo cihuma. Na hono yanoze nhavivyo, icilaka cico cipya, cototoloka mu civwalo cihuma, no wudemuce wayo wokwatilila hawaha. 22Hamba hasina munhu mono katajilaga divayi mhya mu mifuko ye zinyhingo zihuma. Na hono yanoze nhavivyo, i divayi nha yoyibahula imifuko, nayo divayi hamonga ne mifuko yiyo vyohodanjika. Langa idivayi 'mhya, yitajilwaga mu mifuko ye zinyhingo zimhya!” 23Kukawa, mwizuwa linji lye Sabato, Yesu yapulutaga yakolile mu migunda yo wuhemba. Nawo i wejizwa wakwe wakanza kubena imaso go wuhemba mu nzila. 24Iwafalisayo wakamutya, “Langata! So cici wakwituma i nghani yono yili mwiko kwituma mwizuwa lye Sabato?” 25Nayo Yesu yakawatya, “Alu mukali nasoma yaye, vyono yetuma Dawudi mwipango lono yali yadabuka? U mwene hamonga ne wayagwe wono yali yena nawo, 26mwene yenjila mu Nyumba yo Mulungu mu vilo vyono Abiyazali yali mukohani muwaha, yakalya i mikate yono yali cilavywa kuli Mulungu. Yono Iwakohani wali wene du wo wali wakomboywe kulya i mikate yiyo. Ninga hamba nhavivyo, Dawudi yakayilya, kanyhi yakawapela ne wayagwe nawo wakalya.” 27Holeka Yesu yakawalonjela yakutya, “Sabato yiwicigwe so cambuzi ce wanhu, ninga iwanhu si wawicigwe so Sabato.” 28Na ku soko yiyo, Mwana wo Munhu yo Muwaha, kanyhi yo Muwaha we Sabato.

will be added

X\