MALUKO 15

1Wali weza kwela hakali mitondo muno muno, iwakohani wakalaganila kumonga, hamonga ne wanyamhala ne wejizi wo Wulajilize, hamonga ne libalaza lyose, wakamuwopa Yesu ne manyolo, wakamutegula no kumukombola kuli Pilato. 2Nayo Pilato yakamuwuza Yesu, yakutya, “Alu yo gwegwe u Mutemi we Wayahudi?” Nayo Yesu yakatya, “Nha kulonga gwegwe.” 3Nawo Wakohani wawaha wakamusonjeza Yesu nghani nyinji. 4Pilato yakamuwuza kanyhi Yesu, yakutya, “Alu si wukupitula hamba cinji? Langa ta vyono wakukusonjeza nghani nyinji.” 5Ninga Yesu siyapitula hamba cinji, sunga na Pilato yakezina. 6Mu vilo vyose vye Sikukuu ye Pasaka, Pilato yali yazoweye kumuwopolela mufungwa yumonga mono wamusakaga. 7Ale, kwali na munhu yunji mono yacemwaga Balaba, mono yali yafunjigwe hamonga ne wafyuzi wanji ku soko yo wuleta wufyule no wuwulaji. 8Ne wanhu wenji wakamuziza Pilato wakamulomba yawanozeze nha vyono yali yazoweye nhondo zose. 9Nayo Pilato yakawawuza, yakutya, “Alu, mukusaka nimuwopolelenyi u Mutemi we Wayahudi?” 10Nayo yalonga nhavivyo, ku soko yali yamanyile calinze, vyono iwakohani wawaha wamukombola Yesu kuli mwene ku soko yo wivu du. 11Ninga i wakohani wawaha wakawasagahaza wanhu ho wamulombe Pilato yawawopolele Balaba. 12Nayo Pilato yakawawuza kanyhi, yakutya, “Alu mukusaka nimunozeci munhu ayu mono mumucemaga Mutemi we Wayahudi?” 13Nawo wanhu wose wakazoza kanyhi, wakutya, “Wumutumbice mu musalaba!” 14Ninga mwene Pilato yakawawuza, yakutya, “Ku sokoci? Kahodanga cici?” Ninga wene ho wakacila muno kuzoza, wakutya, “Wumutumbice mu musalaba!” 15Nayo Pilato vyono yahila kulyendeza i lipuga lye wanhu, hodu, yakamuwopolela Balaba ku wulawa mu jela. Yakalajiliza vyono Yesu yakunwe ne viboko, na hanyuma yayo, yakamukombola yatumbikwe mu musalaba. 16Ale, iwasilikale wakamutegula Yesu kugati, kwi'kumbo lye likulu, wakekonghola i liwumbi lyose lye wasilikale. 17Wakamuvwika Yesu mwenda we liwala lyo lugandu, wakatawa cipombelo ce mamivya, wakamuvwika mu mutwe. 18Wakawa kwanza kumulamusa wakutya, “Lamucenyi Mutemi we Wayahudi!” 19Wakamutowa mu mutwe ne lidete, wakamufunyila mate, wakamufugamila no kumuhemba. 20Waza kondya kumuzwajiza, wakamuvula mwenda wuwulya we liwala lyo lugandu, wakamuvwika i vivwalo vyakwe, hanyuma yayo wakamutegula kunze, ho wakamutumbice mu musalaba. 21Na lono wali wali mu nzila wakubita, waketang'anila na munhu yunji mono kacemwaga Simoni, munya Kilene. Mwene yali yo sogwe wa wa Alekizanda na Lufo, na mwidaha lilyo mwene yalawaga ku mugunda. Ale wakamudindimiza, yadinghule umusalaba wa Yesu. 22Hodu wakawa kumutegula Yesu sunga hanhu hono hacemwaga Goligota, nhunizo yayo “Hanhu ha cipala.” 23Wakamupela Yesu divayi yono yali yihangahanjile ne manemane, ninga mwene yakayilema. 24Ale wakamutumbika mu musalaba, wakagawana vivwalo vyakwe ko kutowa kula, ho walamule nani kotuga cici. 25Nayo yali saa tatu hakali mitondo ilipango lono wamutumbicila mu musalaba. 26No wusonjezwe wakwe wali wandikwe hacanyha yo musalaba, nhavi, “U mutemi we Wayahudi.” 27Ne wahizi wejete nawo wakatumbikanwa hamonga na Yesu. Yunji ku lubavu lwakwe lo kulume no muyagwe ku lubavu lwakwe lo kucekulu. [ 28Baho gakafisilizwa i Mandiko Gono Gelile gono gakutya, “Yakawalilizanwa hamonga ne Wahodanji.”] 29Ne wanhu wono wakolaga hanhu baho, wakamutovula, akuno wakuzugunza i mitwe yawo wakutya, “A, he! Gwe go munya kuyimwagula Nyumba yo Mulungu no kuyizenga mu vilo vidatu! 30Ale ta, wutime mu musalaba, wiponye go mweneco!” 31Nawo wakohani wawaha hamonga ne wejizi wo Wulajilize, wakamuzwajiza wakutya, “Yawaponyaga wanji, ninga kwiponya mweneco siyakusuma! 32Ati mwene yo Kilisito, u Mutemi wa Isilayeli! Ale, lu ta, yatime mu musalaba ho ciwone no kwihuwila.” Sunga ne wanhu wawalya wono watumbikwa mu musalaba hamonga nayo, nawo wakamutovula. 33Ku wulawa mu saa sita ye misi, sunga ku saa tisa ye misi, kukawa kutitu tuku mu'si yose. 34Na mu saa tisa ya mu misi, Yesu yakalila ne'zi iwaha yakutya, “Eloyi, Eloyi, lama Sabakatani.” Nhunizo yayo, “Gwe go Mulungu wangu, Gwe go Mulungu wangu, alu so cici wukundeka?” 35Na wanji wa muli wanhu wono wali wemile bahalya wali weza kuhulika nhavivyo, wakatya “Hulicizenyi! Yakumucema Eliya.” 36No munhu yunji yakamangha, yakazabika sifongo mu Siki, yakayitajila mwidete yakamupela ho yang'we akuno yakutya, “Leka ta cilanjilile hono Eliya kokuza yamutimye mu musalaba.” 37Yesu yakalonga ne'zi iwaha, hodu yakawa kufwa. 38Ne libupa lyo mwenda lya mu Nyumba yo Mulungu likademuka hejete, likalawilila kucanyha sunga ho hasi. 39No muwaha yunji we wasilikale mono yali yemile ha mwande yakwe, yali yeza kuwona vyono Yesu yakulonga ne'zi yiwaha no kufwa, yakatya, “Mbeka umunhu ayu, yali Mwana wo Mulungu!” 40Na baho kanyhi, hali howali we cicekulu wanji wono wazilanjililaga zizo akuno wemile kutali, muli wawo mwali na Malyamu Magadalena, na Salome, na Malyamu unyina wa Yakobo u mudodo na Yose. 41Wawa wamutyatya Yesu lono yali yali ku Galilaya no kumwitumamila. Kanyhi kwali na we cicekulu wanji wenji wono wakaza ku Yelusalemi hamonga nayo. 42Ne cipango ce cinyamihe cikawa cakondya kufika. Ne lizuwa lilyo lyali lyo lizuwa lyo Wuwikanize, lizuwa lyono likulecela Sabato. 43Baho yakaza Yusufu munya Alimataya, umwitumami we Libalaza liwaha, mono yali yena lilumbo yiwaha muno. No mwene nayo yali yalanjiliye uwuze wo Wutemi wo Mulungu. Ale, yakamubitila Pilato akuno yasina woga, yakalomba yapegwe u muwili wa Yesu. 44Pilato yakezina muno, yaza kuhulika vyono Yesu yali yakondya kufwa. Ale, yakamucema muwaha we wasilikale yigana, yakamuwuza hono Yesu yali yakondya kufwa cidaha. 45Nayo Pilato yaza kulonjelwa no muwaha yuyo we wasilikale yigana, vyono Yesu yali yakondya kufwa, hodu yakamukombolela Yusufu yawusole muwili wakwe. 46Baho Yusufu yakagula sanda ye bafuta, yakawutimya hasi muwili wuwo, yakawudajiliza ne sanda. Yakawuwika mu citenjelo cono cali cituligwe mwi'talawe, hanyuma yayo yakabidusiza libwe yiwaha ku mulango we citenjelo. 47Malyamu Magadalena na Malyamu unyina wa Yose nawo wakahawona baho hono yawicigwe.

will be added

X\