MALUKO 1

1Alu lo Luganuzi Luswanu lwa Yesu Kilisito u mwana wo Mulungu. 2Lukanzwa nha vyono lwandikwa mu citabu co muwizi Isaya: “Langa ta, nghumutuma mutumwa wangu yakulongolele; Mono kokunozelezeza i nzila yako. 3I lizi lyo munhu lihulikwa ku nyika: Nozelezenyi i nzila yo Muwaha. Gololenyi wukolo wakwe.” 4Yohana u Mubaputizi yejela ku nyika, yakuganula vyono yinojeye wanhu wanene no kubaputizwa, u Mulungu ho yawanenele u wubi wawo. 5I wanhu kulawa mbavu zose za Yudiya, na wanya Yelusalemi wose wakamuziza Yohana, wakavumila wubi wawo, nayo yakawabaputiziza mwi'kolongo lya Yoludani. 6Yohana, yali yavwalile civwalo cono cali cihonwe ko wusinga we ngamiya, no musipi we nyhingo mu ciwino cakwe. Ne ndigwa yakwe, yali nzije no wuci wa mu mbago. 7Nayo yakaganula yakutya, “U Munhu yunji mono yena vilungo yanyhizize nene, yakuza mu nyuma yangu; nane si nghwiliye hamba kwinama, no kuwopola i mikowa ye malatu gakwe. 8Ane nghumubaputizenyi ne malenga, ninga mwene kolomubaputizenyi mu Muhe Mono Yelile.” 9Mu vilo vivyo, Yesu yakaza yakulawa ku Nazaleti, kwi 'kaya lya Galilaya, nayo yakabaputizwa na Yohana mwi'kolongo lya Yoludani. 10Lo lulolulo Yesu yaza kulawila mu malenga, yakawona wulanga wudiguce, no Muhe yakumutimila mucanyha yakwe yenha nziwa. 11Ne lizi likahulikwa kulawa ku wulanga likutya, “Agwe yo gwegwe mwanangu mwendece; mono nyendezwe nagwe.” 12Lo lulolulo yakategulwa no Muhe ku nyika, 13yakekala kuko vilo makumi mane yakujelwa na Setani. Yakawa kuko hamonga ne malimu ga mu mbago, nawo Wamalayika wakawa wakumwitumamila. 14Nayo Yohana yaza kuwa yadindilwa mu jela, Yesu yakabita ku Galilaya, yakaganula u Luganuzi Luswanu lo Mulungu, yakutya, 15“Icidaha cakwila, no wutemi wo Mulungu wasejelela. Nenenyi no kulwihuwila u Luganuzi Luswanu!” 16Na lono yakolaga ha nhumbi ye lilamba lya Galilaya, yakawawona wanimula zisomba wejete, Simoni no muwahawe Andeleya, wakunimula zisomba no lwavu. 17Yesu yakawatya, “Munhyatyaje, nane nomunozenyi muwe wanimula wanhu.” 18Lo lulolulo wakazileka zinyavu zawo, wakamutyatya. 19Nayo yali yeza kutela hamwande hadodo, yakawawona wa Yakobo no mwanakwawe Yohana iwana wa Zebedayo. Nawo nha vivyo wali wali mu ngalawa yawo wakuzinozeleza zinyavu zawo. 20Lo lulolulo Yesu yakawacema, nawo wakamuleka u Sogo yawo Zebedayo mu ngalawa, hamonga ne wetumami, wakamutyatya. 21Wakafika mwikaya lya Kapelanawumi, na mwizuwa lye Sabato, Yesu yakenjila mu nhang'anilo yo wuhembelo, yakanza kwijiza. 22Ne wanhu wose wono wamuhulika, wakezina i mejizo gakwe, hambi nha siyejizaga nha vyono wejizaga iwejizi wawo wo Wulajilize, langa yejizaga nha munhu mono yena wulajilize. 23Lo lulolulo munhu yunji we licisi lyavu, yakenjila mu nhang'anilo yo wuhembelo, 24yakazoza, yakutya, “Alu wina nghanici nase, agwe Yesu wa Nazaleti? Alo kuza ho wucongomeze? Nghumanyile vyono wuli nani, yo gwegwe mono welile wo Mulungu!” 25Yesu yakalitacila ilicisi lyavu yakutya, “Nyamala! Wulawile muli munhu yuyu.” 26Ale, lilyo licisi lyavu, likamuzuganga munhu yuyo, likazoza muno, likawa kulawila. 27I wanhu wose wakezina, wakewuza wakutya, “Alo cici co cici? Ma, go mejizo mapya lo? U Munhu ayu, yena wulajilize wo kugalajiliza i macisi mavu, sunga nago gakumuhulika!” 28I zinghani za Yesu zikatandala mbela mbela hanhu hose, mu yisi ya Galilaya. 29Yesu ne wejizwa wakwe, hamonga na Yakobo na Yohana, wakawuka mu nghang'anilo yo wuhembelo, wakabita ku kaya ya Simoni na Andeleya. 30Ale, u mukwewe we cicekulu wa Simoni, yali yagonile mu citanda yena mhungo. Nayo Yesu yali yeza kufika, wakamulonjela kamonga muli zo wutamwa wo mudala yuyo. 31Yesu yakamubitila mudala yuyo, yakamwibata muwoko, yakamwinula. Ne mhungo yiyo yikamuleka, nayo yakanza kuwetumamila. 32Icinyamihe, lono lizuwa lyali lyagwililicila, i wanhu wakamuletela Yesu iwatamwa wose, ne wanhu wono wali wena macisi mavu. 33I wanhu wose we likaya lilyo wakekongholela ha mwande yo mulango. 34Nayo Yesu yakawaponya wanhu wenji wono wali wena wutamwa we hayo hayo, yakagalavya macisi menji, ninga siyagakombola galonje cinji, hambi nha gali gamumanyile vyono mwene yo nani. 35I mitondo yaco lono kwali kukali nadandawuka, Yesu yakenuka yakabita kulomba i hanhu ha cilejeho hono hasina wanhu. 36Nawo wa Simoni ne wayagwe wakabita kumulondola. 37Nawo waza kumuwona wakamutya, “I wanhu wose wakukulondola gwegwe.” 38Yesu yakawatya, “Alenyi cibite ku vikaya vinji vye behi behi, ho nghaganule nako kuko, hambi nha ku soko yiyo, holeka naza.” 39Ale, yakapilima hanhu hose mu Galilaya, yakuganula mu matang'anilo gawo go wuhembelo no kulavya macisi. 40U munhu yunji wo wukoma yakamubitila Yesu, yakamufugamila, yakamulomba yakutya, “Hono wende, kosuma kunghwema!” 41Yesu yakamuwonela lusungu, yakagolola muwoko wakwe, yakamupamiza yakamutya, “Nyendile, wukwemwe!” 42Lo lulolulo wukoma wukamuleka munhu yuyo, yakawa mutelevu. 43Yesu yakamutya yabite mbela mbela akuno yakumukong'onheza yakutya, 44“Wulece kumulonjela munhu wo wose ze nghani yiyi, langa wubite wukelajile kuli mukohani, na kolo wakondya kuhomelela vyono wapona, ale, wulavye i cilavywa nha vyono yalajiliza Musa, ho yiwe wuhomelezi kuli mwene so wupone wako.” 45Ninga munhu yuyo yakabita yakanza kuyitandaza inghani yiyo hanhu hose, no kulonga nghani nyinji, sunga na Yesu si yasuma kwinjila mwikaya lyo lyose ciwonelela. Ne nghani yiyo yikamunoza yekale kunze ihanhu ha cilejeho hono hasina wanhu. Ninga hamba nhavivyo, wakamubitila iwanhu wakulawa mbavu zose.

will be added

X\