LUKA 7

1Yaza kukondya kulonga zinghani zakwe zose hali wanhu, Yesu yakabita ku Kapelanawumi. 2Kuko kwali na muwaha we wasilikale yigana, Mulumi, mono yali yena mwitumami wakwe mono yali yamwendile muno. Mwitumami yuyu yali yatamigwe yeza yali behi no kufwa. 3Nayo yaza hulika za Yesu, yakamutumila i walongola wanji we Wayahudi, wabite wakamulombe Yesu ho yaze yamuponye mwitumami wakwe. 4Nawo wazafika kuli Yesu, wakamunena muno, wakutya “Ayu yanojeye wumutendele nghani yiyi, 5hambi nha yawendile wanhu wetu, nayo yo mwene mono yacizenjela ne nhang'anilo yetu yo Wuhembelo.” 6Yesu yakabitana nawo. Na lono yali yasejelela behi ne kaya, yuyo muwaha we Wasilikale yigana, yakamutumila wendece wakwe wamulonjele Yesu. “Muwaha wulece kwigaza, hambi ne nha si nghwiliye agwe winjile mu kaya yangu. 7Kanyhi nane nghwiwona vyono si nghwiliye kuza kuli gwegwe; ninga wulonje du, no mwitumami wangu kopona. 8Hambi nane nha nili hasi yo wulajilize we wawaha, nina wasilikale wangu. Nane nghumutya ayu, ‘Bita’ nayo yakubita, nghumutya yunji, ‘Wuze’ nayo yakuza, na hono nimutye mwitumami wangu, ‘Wunoze nhavi,’ nayo yakunoza.” 9Yesu yaza kuhulika zizi, yakamwizina no kumukumya yuyulya u muwaha we wasilikale. Hanyuma yakawapitucila we lipuga lye wanhu wono wamutyatyaga, yakawatya. “Nghali nawona wihuwilo wuwaha nha wuwu, hamba mu Isilayeli.” 10Nawo wono watumwa waza kuwuya ku kaya, wakamwagana yuyulya mwitumami yanoga. 11Hanyuma hadodo, Yesu yakabita kwitumbi lyono litezagwa Nayini, Wejizwa wakwe hamonga na wanhu wenji, wakabitana nayo. 12Ale, yaza sejelela he 'lango liwaha lyo kwinjilila mwi'kaya, yakawona wanhu wadinghuye muzelelo mono yafwiye, mwana we ciwene wo mucekulu mufwile. Wanhu wenji wa mwi'kaya lilyo, wali wali hamonga no mucekulu yuyo. 13Nayo Muwaha yali yeza kumuwona mucekulu yuyo, yakamuwonela lusungu, yakamutya, “Wulece kulila.” 14Yakasejelela behi, yakacipamiza citanda cono wali wamudinghuliye mono yali yafwiye, nawo wono wali wamudinghuye wakema. Nayo Yesu yakatya, “Muzelelo, nghukulonjela, Winuce.” 15Yuyo mono yali yafwiye, yakenuka, yakekala, no kwamula kulonga. Na Yesu yakamupelo nyina. 16Wanhu wose wakebatwa no woga, wakamulumba u Mulungu, wakutya, “Muwizi muwaha kalawila mwetu; no Mulungu kaza kuwakomboza wanhu wakwe.” 17Ne nghani yakwe yiyi yikamanyika mu Wuyahudi mose, na mu yisi yose yono yipilime. 18I wejizwa wa Yohana, wakamuganulila Yohana zizo zose, Yohana yakawacema wejete, wayagwe ne wejizwa wakwe, 19yakawatuma wabite kuli Muwaha wakamuwuze “Alu agwe! Yo yulya mono yakuza, hamba cimulanjilile yunji?” 20Wejizwa wawo wejete waza kumubitila Yesu, wakatya, “Yohana u Mubaputizi kacituma kwako cikuwuze: ‘Ati! Yo gwegwe mono yakuza, hamba cimulanjilile yunji?’ ” 21Mu cipango cico, Yesu yakawaponya wenji mu zinhamwa, no wugazwe, ne macisi, ne wabofu wenji yakawapela wuwone. 22Yesu yakawapitula yakawatya, “Mubite mukamulonjele Yohana zono muwene na zono muhulice; i wabofu wakuwona, wono wali citewe wakujenda viswanu, wono watamigwe wukoma wakukwemwa, ne waciwa wakuganulilwa u Luganuzi Luswanu. 23Yo mumoti mono si yakuwona cikobazo muli nene.” 24Waza kutuluka wono watumwa na Yohana, Yesu yakanza kuwalonjela mapuga ge wanhu, za Yohana. “Mwene mwabitaga kunyika kulanga cici?” Mwasakaga kuwona lihanze lyono lyayumvywagwa ne mbeho? 25Ninga mwabitaga kulanga cici? Mwabitaga kumuwona munhu mono yavwalile vivwalo vye cimalidadi? Lanjenyi, wono wena vivwalo vyo lukumyo, no kwikala mu mikalile yo wumote wa za mononze, wekalaga mu zinyumba ze watemi! 26Ta munonjelaje, mwalawa kulanga cici, Mwabitaga kumuwona muwizi lo? Heya, mbeka mono yamucizize no muwizi. 27Yuyu Yohana yo yakulongwa mu Mandiko Gono Gelile, “Langa ta, nghumutuma mutumwa wangu, yakutyo Muwaha, nghumutuma yakulongolele no kukunozelezeza nzila.” 28Yesu yakatya, “Mu wana wose we wanhu, hasina mono yamucizize Yohana u Mubaputizi. Hamba nhavivyo, u mudodo muno mu wutemi wo Mulungu yo muwaha si nho mwene.” 29Wanhu wose ne watoweza kodi, wali weza hulika, wakawukumya u wuswanu wo Mulungu, wawo wo wawo, wono wali wakondya kubaputizwa mu wubaputizo wa Yohana. 30Ninga Wafalisayo ne wejizi wo Wulajilize, wakawulema wuhile wo Mulungu wono wali wuwanojeye, wakalema sunga no kubaputizwa na Yohana. 31Yesu yakajendelela kutya: “Holeka nowehwananiza wanhu we ndelo yiyi na cinhuci? Wo wanhu wono wenha wule? 32Wenha wana wadodo wono wekaye mu Sokoni, wono welonjelaga awa na walya; wakutya, Cimutowelenyi zifilimbi, nanye hamba kuvina ng'o, calila nanye hamba kulila ng'o. 33Hambi Yohana u Mubaputizi nha yaza si yalizaga ndigwa, hamba si yang'wezaga divayi, nanye mukatya, Yena lukwale. 34U Mwana wo Munhu nha yaza, yakulya no kung'wa, nanye mukatya, Langa ta munhu 'yu mubuguci, na mung'wa divayi, mwendece we watoweza kodi ne wanyo wubi! 35Hamba nhavivyo, I mahala go Mulungu gejela vyono maswanu kuli wose wono wakugavumila.” 36Mufalisayo yunji yakamusaka Yesu yalye ndigwa kwakwe. Nayo yakenjila mu nyumba ya yuyo Mufalisayo yakekala yalye ndigwa. 37Na mwitumbi lilyo, mwali moyuli mucekulu yunji mono yali yena mikalile mibi. Nayo yaza kumanya vyono Yesu yali yekaye yakulya mu kaya yo Mufalisayo, yakaleta supa ya mafuta ge mhunjile swanu, 38yakema behi na Yesu, yakulila, ne mahozi gakwe gakamusululila Yesu mu magulu. U Mucekulu yuyo yakayipata migulu ya. Yesu kwe zimvili zakwe. Yakamunonela muno migulu, yakawabaka ne mafuta gagalya. 39U Mufalisayo yuyo mono yamucema Yesu, yaza kuziwona zizo, yakatya mu nhumbula yakwe, “Munhu ayu yali yawe muwizi, yali yamutanje mucekulu yuyu vyono yenha na vyono mubi.” 40Yesu yakamutya yuyo Mufalisayo “Simoni nina nghani yo kukulonjela.” Nayo Simoni yakatya, “Lonje Mwijizi.” 41Yesu yakatya “Kwali na wanhu wejete wono wali wamukopile munhu yumonga mapesa. Yunji yali yakopile silinje magana mahano, no muyagwe, silinje makumi mahano. 42Waza kuwa wasina co kulipa, yuyo munhu yakawanenela wose vyono wejete. Ale, wa hayi muli wawa wejete, mono kocila kumwenda yuyo munhu mono yawakopesa zipesa?” 43Simoni yakapitula yakatya, na lunji, yuyo mono yaneneywe nayo mugawa muwaha, yo komwenda muno munhu yuyo. Yesu yakamutya “Kulonga mbeka.” 44Hanyuma yakamupitucila mucekulu, no kumutya Simoni, “Kumuwona ta mucekulu yuyu? Ane ninjila mu nyumba yako, malenga go kuzuguza magulu gangu, si wumheye ng'o. Ninga mucekulu ayu, kasuluziza mahozi gakwe mu magulu gangu no kugapata kwe zimvili zakwe. 45Agwe si wunoneye; ninga ayu neza kwinjila, si yalecile kunonela muno magulu gangu. 46Agwe si wumbacile mafuta mu mutwe: ninga ayu kambaka mafuta mu magulu gangu. 47Holeka nghukutya, wendo wakwe wukulajila vyono, hamba yawe yali yena wubi winji, kanenelwa. Ninga wowose mono kanenelwaga nghani ndodo, yo kendaga hadodo.” 48Yesu yakamutya u mucekulu, “Kunenelwa wubi wako.” 49Na walya wono wali wekaye nayo ha ndigwa, wakanza kutya mu zinhumbula zawo “Yuyu yo nani mwene, mono yakusuma kunenela wubi?” 50Nayo Yesu yakamutya u mucekulu, “Wihuwilo wako wukuponya; wubite wupolile.”

will be added

X\