LUKA 4

1Ale Yesu yawuyaga yakulawa kwi'kolongo lya Yoludani, yamemile Muhe Mono Yelile, yakatongwa no Muhe yabite ku nyika. 2Yekala kuko ku nyika vilo makumi mane yakujelwa na Setani. Nayo si yalizaga cinji mu vilo vivyo vyose, navyo vyaza puluta, yakadabuka. 3Holeka Setani yakamutya, “Hono yo gwegwe Mwana wo Mulungu, wulonje libwe lili liwe mukate.” 4Yesu yakamupitula, yandikwa “Munhu si ko kwikala mumi so ndigwa du.” 5Hanyuma Setani yakamutegula hacanyha, hanhu hono hali henucile, yakamulajila matemi gose ga kononze lwa kamonga. Setani yakamutya, 6“Nokupela gwegwe vilungo vivi vyose, ne zinhojo zayo; hambi nha nakombolelwa nene, na muli wose mono nyendile, nghumupela. 7Ale hono wufugame hali nene, vivi vyose vyowa vyako.” 8Nayo Yesu yakapitula yakamutya, “I Mandiko gakutya, ‘Komuhemba Mulungu wako, no komwitumamila mweneco yali wene du.’ ” 9Setani yakamutegula ku Yelusalemi, yakamuwika mucanyha ye litembe lye Nyumba yo Mulungu, yakamutya, “Hono yo gwegwe mwana wo Mulungu, wilugaje baha sunga ho hasi, 10hambi nha yandikwa: ‘Kokulajiliziza Wamalayika wakwe wakukamise,’ 11kanyhi, ‘Wokwambilila mu mawoko gawo. Ho wulece kwikobala mugulu wako mwibwe.’ ” 12Yesu yakapitula yakamutya, “Yandikwa, ‘Wulece kumujelo Muwaha Mulungu wako.’ ” 13Nayo Setani yaza kukondya majelo gose, yakawa kumuleka hadodo. 14Baho Yesu yakawuya ku Galilaya kuno yamemile vilungo vyo Muhe Mono Yelile. Ne zinghani zakwe zikatandala mu yisi yose yono yipilime. 15Nayo yejizaga wanhu mu matang'anilo gawo go wuhembelo akuno yakulumbwa na wose. 16Yesu yakabita ku Nazaleti kono yawilucila, yakenjila mu nhang'anilo yo wuhembelo mwizuwa lye sabato nha vyono yali yazoweye, yakema yasome Mandiko Gono Gelile. 17Yakapegwa citabu co muwizi Isaya, yakacigubula hanhu hono hali handicigwe nhavi, 18“U Muhe wo Muwaha yali muli nene Kasiwanula, ho niwaganulile waciwa Luganuzi Luswanu, Kanhuma niwalonjele wono wafunjigwe, nha vyono wowopolelwa, Ne wabofu, vyono wowona kanyhi, 19Kanhuma ho niwakomboze wono wakwiwonelwa, no kuwalonjela i cipango cono u Mulungu kowakomboza wanhu wakwe.” 20Yaza kukondya kusoma, yakacigubika icitabu, yakamupela u mwitumami, yakekala, ne meso ga wose wono wali wali mu nhang'anilo yo wuhembelo gakawa gamulanjile. 21Nayo yakamula kuwatya, “Izuwa lili nha vyono muhulice lwandiko lulu lukusomwa, lwakondya kufisilizwa.” 22Wose wakendezwa nayo, wakezina so zinghani ziswanu zono yalonga, wakatya, “Yuyu si yo mwana wa Yusufu?” 23Yakawatya, na lunji mononjela nghani yiyi, “Go muganga, wilagule go mweneco, na kanyhi motya, ‘Muli zose zono cahulika wukwituma ku Kapelanawumi, wuzitumaje na baha kanyhi mwitumbi lyako.’ ” 24Yakawatya, “Mbeka nghumutyenyi, hasina muwizi mono kavumilwaga mu yisi yakwe mweneco. 25Ninga mbeka nghumutyenyi, kwali kowali wafwile wenji mu Isilayeli mu vilo vya Eliya, lono wulanga wukadindwa myaka midatu na myezi mutandatu, kukawa na nzala mbaha mu yisi yose. 26Hamba nhavivyo, Eliya si yatumwa kuli yunji wowose, langa yatumwa kuli mucekulu mufwile du wa ku Saleputa mu yisi ya Sidoni. 27Kanyhi mu yisi ya Isilayeli, mu cipango ca Eliya muwizi, kwali kowali watamwa wenji wo wukoma, hamba nhavivyo hasina wowose mono yakwemwa, langa hono si Namani du munhu wa Suliya.” 28Na wose wono wali wali mu nhang'anilo yo wuhembelo, waza kuzihulika zizo, wakakolwa nelikuwo, 29wakenuka, wakamulavyaniza Yesu kunze ye likaya lyawo, lyono lyali lizenjigwe mucanyha ye cigongo, wakamutegula sunga ku nhenenhuko ye cigongo cico, ho wamugumile hasi. 30Ninga Yesu yakakolela haciligati yawo yakawa kubita. 31Hanyuma Yesu yakabita kwitumbi lya Kapelanawumi, mu yisi ya Galilaya yakawa kuwejiza mwizuwa lye Sabato. 32Wakezina so wulajilize wono yali yena nawo mu wijize wakwe. 33Mumo mu nhang'anilo yo wuhembelo mwali moyuli munhu mono yali yena muhe we licisi lyavu, yakabalaluka ne lizi iwaha, yakutya. 34“Gwe Yesu wa Nazaleti, cina nghanici nagwe? Alo kuza wucongomeze? Nghumanyile gwegwe yo nani, yo Gwegwe Mono welile wo Mulungu.” 35Ninga Yesu yakalitacila yakutya, “Nyamale, wuwuce muli munhu yuyo.” Ne licisi lyaza kumubamiliza hasi, haciligati yawo, likawa kuwuka muli munhu yuyo, hamba kumutamisa yaye. 36Wose wakezina, wakawa kulongana weneco wose, wakutya, “Ayi yo nghani yo wizine, hambi nha ko wusume no wulajilize, yakugalajiliza i macisi gawuce, nago gakuwuka.” 37Ne zinghani za Yesu zikatandala hanhu hose mu yisi yiyo. 38Yesu yakawuka mu nhang'anilo yiyo yo wuhembelo, yakenjila mu nyumba ya Simoni, u mukwewe we cicekulu wa Simoni, yali yebatwe na mhungo mbaha, wakamulomba yamuponye, 39Yesu yakema behi nayo, yakayitacila mhungo, nayo yikamuleka. Ho baho yakawa kwinuka no kuwetumamila. 40Lono lizuwa lyali lyeza behi no kugwila, wose wono wali wena watamwa we matamwa ge hayo hayo, wakawaleta kuli mwene, nayo yakawawicila miwoko yakwe wose, yakawaponya. 41Ne macisi gakalawa muli wenji, gakubalaluka, gakutya, “Yo gwegwe Mwana wo Mulungu.” Ninga Yesu yakagatacila, hamba si yagaleka galonje, hambi nha gali gamumanyile vyono yo Kilisito. 42Ale waza kwela, Yesu yakabita hanhu hono hasina wanhu, ne wanhu wakawa kumulondola, na waza muwona, wakahila kumugoma yalece kuwuka kwawo. 43Ninga mwene yakawatya, “Yinojeye nganule Luganuzi Luswanu lo wutemi wo Mulungu na mu matumbi ganji, hambi nha co caleka nghatumwa.” 44Yakawa kuganula mu matang'anilo go wuhembelo ga ku Yudiya.

will be added

X\