YAKOBO 4

1U wulugu no wisonji wose muli nyenye vilawaga hayi? Vilawaga mu masulumizi genyu mabi, gono galewanaga nhondo zose muli nyenye. 2Musulumilaga vinhu, na kolo mweza simukuvituga, hobaho mukwiwikaniza kuwulaga, mukusulumila muno kuvituga vinhu, ninga simukuvituga, holeka mwisongaga no kwitowa. Hambi nha simutugaga cico cono musakaga vyono simucilombaga kuli Mulungu. 3Kanyhi kolo mukulomba simupegwaga, vyono mulombaga ko wuhile wubi, hambi nha mulombaga ho mwigutye imasulumizi genyu. 4Anye muli wanhu mono si muli wehuwilwa, mwihwanile wasenyha. Simumanyile vyono munhu hono yawe kuyenda yinze, yawa mulugu wo Mulungu? Wo wose mono yakusaka yawe kuyenda yinze, yakwinoza yawe mulugu wo Mulungu. 5Mulece kwihwesa mba vyono i Mandiko Gono Gelile galongaga zinghani za bwete, lono gatezaga, “Umuhe wono Mulungu yawika muli sese, wina wivu wuwaha.” 6Ninga, lihewa lyono cikupegwa no Mulungu lili vilungo muno muno, nha vyono gatezaga i Mandiko, “Mulungu kawemilaga iwedunhumuzi, langa kawapelaga lihewa iwenenenyhezi.” 7Holeka mwiwikaje mu wukamiswe wo Mulungu, mumwimile Setani, nayo komutizenyi. 8Mumusejelelaje Mulungu, nayo komusejelelenyi. Kwemenyi miwoko yenyu nyo wahodanji! Mweze zinhumbula zenyu nyo wakoci! 9Muzinguce, mugaye no kulila, uluseko lwenyu luweze cililo, ne nyemo yenyu yiweze wuzinguce wuwaha. 10Mwinenenyheze hali Mulungu, nayo komwinulenyi. 11Wandugu zangu, mulece kwihosa nyenye wose. Mono yakumuhosa nduguye no kumuling'aniza, yuyo, yakuwuhosa kanyhi yakuwuling'aniza Wulajilize. Na hono wuwuhose Wulajilize, agwe siwukuwibata Wulajilize, langa wukuwuhosa. 12Hambi nha Mulungu yali wene du yo kawikaga wulajilize no kuling'aniza. Yo mweneco yali wene du mono yasumile kuponya no kongomeza. Alu, wuli nani gwegwe mono wukumuling'aniza u munhu muyago? 13Ale, hulicizenyi ta, anye mono mutezaga, “Izuwali hamba mitondo, cobita kwikaya lyo wutunga, no kwikala kuko mwaka wose cikusuluza no kutuga cambuzi.” 14Hamba simumanyile vyono wumi wenyu wowa wule ku mitondo! Hambi anye nha mwihwanile linghungulyosi lyono lijelaga cipango cidodo vivi du no kwajilila kanyhi. 15Langa yali yinojeye mutye, “U Muwaha hono yacitaze cokwikala womi no kunoza aci hamba acilya.” 16Ninga lu, mukwidunhumula no kwisaja, no widunhumuzi wono winha wuwu wo wubi. 17Ale, no munhu mono siketumaga ziswanu zono yazimanyile, vyono zo zimunojeye yetume, ale yuyo yakwituma wubi.

will be added

X\