YAKOBO 3

1Wandugu zangu, wenji wa muli nyenye, mulece kuwa wejizi. Hambi nha vyono mumanyile, sese co wejizi colotuga wuling'anizwe wuwaha muno muno kuciza wanji. 2Hambi na sese wose nha cisutyaga kali kenji. Ninga hone munhu sikasutyaga mu wulonje wakwe, munhu yuyo kowa yakwilaniciye, kanyhi kosuma kuwimila muwili wakwe wose. 3Ase ciziwicilaga zifwalasi lijamu mu milomo yazo ho zicihulice, na muwunoza nhavivyo mo cisumilaga kuzitegula ko kose kono cendile co weneco. |4B.tif|span|||I zifwalasi zono ziwopigwe no lubano (3:3) | 4Ne zingalawa nazo kanyhi, hamba ziwe mbaha muno, nha zipitulwaga ne mabeho mawaha, ninga zipitulwaga ne cisukani cidodo vivi, ko kose kono mutonji yendile. 5Ale nhavivyo no lulimi nalo, hamba luwe nha cilunzwa cidodo vivi co muwili, cikuwa kwiyikumya makani mawaha muno muno. Ne cinyesela cidodo vivi co moto naco citakamizaga mbago mbaha. 6Ale nhavivyo no lulimi nalo, lwinha moto. Hambi nha lumemile wubi winji muno, nalo lwina cilejeho mu miwili yetu, kanyhi lutajilaga wubi mu miwili yetu yose. Wutakamizaga u wumi wetu wose nho moto wono wulawaga ku Gehena yeneco. 7No munhu nayo, nha kasumaga kugafuga malimu, kanyhi yakondya kusuma kuvifuga i viwumbwa vyose vye malimu ga mu mbago, ne zindeje, ne mazoka, ne malimu ga mwilenga. 8Ninga hasina munhu mono yasuma kulufuga lulimi. Lulimi co cinhu cibi, cono sicimilwaga, kanyhi lumemile sumu mbulaji. 9Ko lulimi, cimulumbaga Muwaha no Sogo yetu. Na ko lulimi lulo kanyhi, ciwalijitaga wanhu, wanhu wono wawumbigwe mu hwani yo Mulungu. 10Izinghani ze malijito na zo wulumbe, zose zilawaga mu mulomo monga. Nyo wandugu zangu, izinghani zizi sizinojeye ziwe nhavivi. 11Ma, cisima cimonga co muvwilo monga cisumaga 'mbi kuvwiza malenga mapolo ne malenga makali hamonga? 12Wandugu zangu, libici lyo mukuyu ma, lisumaga kulela zeyituni? Hamba muzabibu wusumaga kulela nghuyu? Hamba ne cisima co muvwilo we malenga ge cimwino mwino, sicisumaga kuvwiza malenga mapolo. 13Ma, nani mono yena mahala no wizuce muli nyenye? Ale, yayilajilaje ta inghani yiyi, mu mikalile yakwe miswanu, na mu metumo gakwe maswanu, gono ganozwaga mu winenenyhezi ne mahala. 14Ninga hono zinhumbula zenyu ziwe zimemile wivu, simbili no wiyendezi, ale, mulece kwikumya no kuyilambiza i mbeka, ku soko yo wikumizya i mahala genyu. 15Mahala gono genha nhavivi, sigalawaga kucanyha ku wulanga, langa imahala gago ga kononze, kanyhi ga ciyinze yinze, na kanyhi ga cisetani. 16Hambi nha ho hose hono howuli wivu no wiyendezi, baho ho howuli no wuma ne mabi mabi gose. 17Ninga imahala gono galawaga kucanyha ku wulanga, gene gelile, gendile mulamu no wupolo, kanyhi galulaga wanhu, gamemile lusungu kanyhi galelaga mikalo ye metumo maswanu, gasina wuwaguzi hamba wukoci. 18No wiling'ano, yo mikalo ye zimbeyu za wono wendile mulamu wahadicilaga mu mulamu.

will be added

X\