WAHEBELANIYA 9

1I cilagane cilongozi cali cina u wityatye wayo wo wuhembi ne hanhu hono helile ha wuhembelo, hono hali hazenjigwe ne wanhu. 2Hali holili lihema linozwe, lyono hanze yayo lyali lina hanhu hono hacemwaga i “Hanhu Hono Helile.” Na baho ho hali no wuwiko we tala, ne meza ne mikate yono yali cilavywa kuli Mulungu. 3Na hanyuma ye libupa lye kejete, hali ne lihema lyono lyacemwaga i “Hanhu Hono Helile muno.” 4Mumo mo mwali cifusizo ca zahabu so kufusiza wuvumba ne lisanduku lye cilagane, nalyo lyali yihiliwe zahabu mbavu zose, na mugati yalyo, mwali na ciya ca zahabu cono cali cina mana, ne nghome ya Haluni yono yali yitulile mahamha, hamonga na azilya i zimbawo zi nyejete zono zali zandicigwe i cilagane. 5Na mucanyha ya lilyo lisanduku, mwali na viwumbwa vyono vyalajilaga vyono u Mulungu yali baho, ne mabawa gavyo gali gacitile mubeho hanhu hono u wubi wukuwusizwa. Ninga alu si cosuma kulonga monga monga muli zinghani zizo. 6I mipango yiyo yikafisilizwa, nawo wukawa wo moto kuli wakohani, wo kwinjila nhondo zose mwihema lilongozi lya kunze wakwituma u witumami wawo. 7Ninga mwihema lye kejete, u Mukohani Muwaha du, yo yenjilaga yali wene, nayo yanozaga nhavivyo kwa mwaka kamonga du. Na lono yakwinjila mugati, yategulizaga ne sakami ho yamulavizye u Mulungu ku soko yakwe mweneco na ku soko yo wubi wono wanhu wetumiye mu wuwula kumanya weneco. 8Na ku wulawa mu wityatye wuwo, u Muhe Mono Yelile yakwijiza calinze vyono, mu cipango cico lono lihema lilongozi lya kudeha likali limile, ne nzila yo kwinjilila i Hanhu Hono Helile nayo yikali si yinadigulwa. 9Ne nghani yiyi yo hwani ye vidaha vya lulu. Yikulajila vyono vilavywa ne makumbiko, vyono vikulavywa kuli Mulungu, si vyosuma kuzinoza zinhumbula za wono wakuhemba, ziwe zikwilaniciye, 10hambi zizi zose zono zili mu zindigwa, no wung'we na mu wityatye wunji wunji wo wihovuji. Vyose vivyo go malajilizo ga munze du; ne vilungo vyayo vyoficila ku mudumo wayo, kolo u Mulungu yakuvinoza wupya i vinhu vyose. 11Ninga Kilisito lono yaza, u Mukohani Muwaha we ziswanu zose zono aluno zakondya kuza. U Mwene yakwituma u mulimo wakwe mwihema liswanu, na lyono likwilaniciye muno, lyono si yinozwe ne miwoko ye wanhu, nha cinji lyono si lya mononze yiyi yono yawumbwa. 12U Mwene yenjila i Hanhu Hono Helile kamonga du, kanyhi hamba si yasoleleza ne sakami ye mhene, hamba ya ng'ombe, langa yenjila so sakami yakwe mweneco, yakaciletela u wukombozi we cibitilila. 13I wanhu wono wali wetipiza ku ci dini wasumaga kwezwa no kuwa welile, lono wamizizwa i sakami ye mhene na ye ng'ombe, hamonga ne mavu ge ndama. 14Ninga mu sakami ya Kilisito zitumwaga nghani mbaha kuciza! Vyono mu vilungo vyo Muhe we cibitilila, Kilisito yelavya mweneco ho yawe likumbiko lyono likwilaniciye kuli Mulungu. I sakami yakwe yocikwema i viselinji vyetu mu metumo gono gakuleta u wufwe, ho cimwitumamile u Mulungu u mumi. 15Holeka Kilisito yo munoza i cilagane cipya mono wa walya wono wacemwa no Mulungu, ho wawubocele wihuwizo wono wehuwizwa wo wuhazi we cibitilila. Vyono i lifwa lyakwe likuwakomboza wanhu mu wulawa mu masutya ga galya gono wasutya mwidaha li lilya lye cilagane cilongozi. 16Hambi nha vyo yinha, i zinghani ze ndumilizo zono kalajilizaga munhu, nha zikuwa kuvumilwa du lono u wufwe wo munhu yuyo mono yawulavivye u wulajilize wuwo wakondya kukangazwa. 17U wulajilize si wosuma kufisilizwa, sunga langa i lifwa liwe lyakondya kwijela, vyono u wulajilize wusina nhunizo, hono mono yawulavizye yakali mumi. 18Si holeka sunga ne cilagane cicilya i cilongozi, si casuma kuwikwa hono hasina sakami. 19U lulongozi, Musa yawanziza wanhu wose ze malajilizo gose nha vyono yali mu Wulajilize, hanyuma yakasola i sakami ye ndama hamonga ne malenga, yaketumamila mahamha go mubici wono wukucemwa hisopo, hamonga no wuhamba wudunghu, yakacimiziza i citabu cicilya co Wulajilize hamonga ne wanhu wose. 20Musa yakatya, “Ayi yo sakami yono yikukangaza i cilagane cono yamulajilizenyi u Mulungu, holeka mucihulikaje.” 21Musa yakalimiziza sakami lililya lihema nhavivilya hamonga ne viya vyo witumami. 22Holeka nha vyono winha u Wulajilize, i vinhu vyose vyosuma kwezwa ne sakami, holeka no wubi nawo wukuwuswa du lono sakami yetika. 23Ale, i vinhu vivi vyono yo hwani du ya vye mbeka vya ku wulanga, vikawa vinojeye navyo vyezwe mu nzila yiyo. Ninga alu vya ku wulanga vikusaka likumbiko liswanu lyono licizize. 24Hambi Kilisito nha si yenjila i hanhu Hono Helile hono hazenjigwe ne miwoko ye wanhu, hono henha hwani du ya acilya ce mbeka. Langa u Mwene yenjila ku wulanga du kweneco kono aluno yemile hali u Mulungu ku soko yetu. 25U Mukohani Muwaha we Wayahudi kenjilaga i Hanhu Hono Helile mwaka na mwaka akuno yadinghuye ne sakami ye zi mitugo; ninga Kilisito si yenjila mumo ko kwilavya mweneco kali kenji, 26hambi nha hono yali yiwe nhavivyo, nha yali yimunojele Kilisito yagazwe kali kenji ku wulawa mu mwamulizo wo wuwumbwe we yinze. Ninga alu vipango avi lono vikusejelela ku mudumo wayo, u mwene yejela kamonga du, ho yawuwuse u wubi mu wilavya mweneco kuwa yikumbiko. 27Ale nha vyono wanhu wose wafwizaga kamonga du, na lono wakondya kufwa wakwima ha mwande yo wuling'anizwe wo Mulungu, 28nhavivyo nayo Kilisito, yelavya likumbiko lwa kamonga du ho yawuwuse u wubi wa wenji. Nayo yalaza kuza lwe kejete, ho yalece kuziza so wihoma no wubi, langa so kuwakomboza wawo wono wakumulindila.

will be added

X\