WAHEBELANIYA 6

1Holeka cijendelele kumwande kuli zono zikangaye, kanyhi cilece kwikala mu mejizo ge myamulizo ge Cikilisito. Si yicinojeye ciwice u musinji mu wuwuyajila kanyhi mu mafundo gagalya go mwamulizo, nha vyono kotya i metumo mafu, kumwihuwila u Mulungu, 2i mafundo go wubaputizo, no wuwicilwe we miwoko, wuzuce we wafu, no wuling'anizwe we cibitilila. 3Ase cijendelele kumwande! Na yiyo yo conoza, hono u Mulungu yendile. 4Hambi alu kuli wanhu wono wakondya kuwubeza u wihuwilo wawo, yosumika nhawule kuwagomola ho wanene kanyhi? Ku soko i wanhu wawo wali wakondya kuwa mu wuzelu wo Mulungu, wali wakondya kucijeza ne cipegwa ciswanu ca ku wulanga, kanyhi no kuhanjizwa mu Muhe Mono Yelile, 5wali wakondya kuwujeza no wuswanu we nghani yo Mulungu, ne vilungo vya mu yinze yono yikuza, 6hanyuma kanyhi wakawa kuwubena u wihuwilo wawo! Si yosumika kuwagomola ho wanene kanyhi, vyono wakumutumbika kanyhi u Mwana wo Mulungu kejete, kanyhi wakumupela cevu ca cagalanze. 7U Mulungu kawulugutizaga u muhangha wono wuyibocelaga i mvula yono yikuwutonyela kenji na kenji, no kucindya i zimbeyu zono zina cambuzi kuli wono walimilwa. 8Ninga hono u muhangha wuwo wucindye mabici ge mamiya, na ganji caka, wukuwa wusina cambuzi, wukuwa wuli behi no wulijitwa no Mulungu, no mudumo wayo wukuwa wutakamizwe mu moto. 9Ninga hamba ciwe cikulonga nhavivi, mo wendece wetu, cina witumbilo wuwaha muli zo wuwe wenyu, cimanyile vyono mwabocela u wulugutizwe muli azilya i ziswanu ze mhonelo yenyu. 10Hambi u Mulungu nha si kawezaga yasina ling'ani, u mwene si kowusemwa mulimo wenyu wono mwetuma, hamba u wendo wono mwawulajila ku soko ye litagwa lyakwe, mu witumami wenyu wono mwawetumamila, na vyono sunga na lulu mukali mukuwetumamila i wanhu wakwe. 11Hambi u wuhile wetu kuli nyenye nha wowu, cikumusacenyi wose muli nyenye, munhu yalajile u wuhijilile wuwo du, sunga ko ku mudumo wo wumemelecele wo witumbilo wenyu. 12Mulece kuwa wadoba, langa muweze nha awalya wono wehuwiye, na wono wena u wukangalizi, ho wazibocele zono u Mulungu yazihuwiza. 13U Mulungu lono yamupelela Abulahamu u wihuwizo, yelahiziza mwitagwa lyakwe mweneco, hambi nha hasina yunji muwaha mono yamucizize u Mulungu, mono u Mulungu yali yelahize. 14U Mulungu yatya, “Mbeka nghukwihuwiza vyono nokumotya, kanyhi no lulelo lwako lokonjelezeka.” 15Abulahamu yalindiliza ko wukangalizi, holeka yakacibocela cono u Mulungu yamwihuwiziza. 16I wanhu lono wakwilahiza, welahizizaga kuli muwaha mono yawacizize, no wilahize wuwo wumalaga u wuwanji wose. 17Nayo u Mulungu, yawukangaziza u wihuwizo wakwe mu wilahize, na muli zizo, yakawalajila calinze, wawo wono yawehuwiziza, vyono si kowupitula kanyhi u wuhile wakwe wuwo. 18Holeka ho vili vinhu vi vyejete, u wihuwizo no wilahize, vyono si vyosuma kukawanika, na hamba muli zizo, u Mulungu si kosuma kulonga wulambi. Holeka ase mono camanyhilila ku wukamiswe wakwe, cikupegwa mu mitima yo wukamisa muno u witumbilo wono wuli ha mwande yetu. 19No witumbilo wuwo wukuwa nha cimizo mu mikalile yetu. No witumbilo wuwo wukamile kanyhi wa mbeka mbeka, kanyhi wukwinjila sunga ko kwi'bupa lye Nyumba yo Mulungu ya ku wulanga, sunga ko kugati ya hono helile hayo. 20Nayo Yesu yo yalongola kwinjila mumo ku soko yetu, nayo yawa Mukohani Muwaha cibitilila, mu wutyatya u wityatye wo wukohani wa Melicizedeki.

will be added

X\