WAHEBELANIYA 3

1Ale, anye wandugu zangu, mo wanhu wo Mulungu, mono mwacemwa no Mulungu, mwihwesaje za Yesu mono u Mulungu yamutuma yawe Mukohani Muwaha wo wihuwilo wetu. 2U mwene yali mwihuwilwa kuli Mulungu mono yamuhagula ho yetume u mulimo wakwe, nha vyono Musa nayo yali mwihuwilwa mu nyumba yose yo Mulungu. 3Nha vyono u muzenji we kaya yo katugaga i lilumbo muno si nhe kaya yeneco. Nayo Yesu nhavivyo yo yanojeye yatuje lilumbo yiwaha si nha Musa. 4Hambi i zikaya zose, nha zina u muzenji wayo, ninga u Mulungu yo muzenji we vinhu vyose. 5Musa yali mwihuwilwa mu nyumba yose yo Muwaha nho mwitumami, nayo yakazilonga i zinghani zono u Mulungu yali yazilonje hanyuma. 6Langa Kilisito yo mwihuwilwa nho mwana mono yena wulajilize mu nyumba yo Mulungu. Ne nyumba yakwe yo sese, hono cibatilile lukulu zo wuluwuce wetu wa muli cono citumbiye. 7Holeka nha vyono yakulonga u Muhe Mono Yelile, yakutya: “Holeka i zuwali hono muhulice lizi lyo Mulungu, 8Mulece kuzikamufya zinhumbula zenyu, nha vyono wali i wasogo zenyu, lono wamubezeza u Mulungu, nha vyono wanoza ku nyika mwizuwa lililya, lono wamujelela u Mulungu. 9Kuko i wasogo zenyu wasagala, wakanjela yakutya u Muwaha, hamba wawe wali waziwona zono nali nakondya kwituma mu myaka makumi mane.” 10Ku soko yiyo nane nghawakolelwa likuwo i wanhu wawa, nghawa kutya, “I mahweso ge wanhu wawa gajiliye, wakali si nazimanya zinzila zangu.” 11Holeka nghakolwa ne likuwo, nghawa kwilahiza nghutya, “Si wokwinjila mu wuceho wono nali niwawiciye.” 12Holeka wandugu zangu, mwilanjililaje, halece kuwa na yunji muli nyenye, mono yena i nhumbula yimbi nhavivyo, mono si yehuwiye no kumuleka u Mulungu mumi. 13Ninga mweze kwiyilanjiza nhondo zose, lono hakali kutegwa, “I zuwali,” muyenyu yunji yalece kukamufywa no wukoci wo wubi no kuwa ne cibede. 14Hambi ase nha ceza cili hamonga na Kilisito, soko ciwe ciwukamise muno muno u witumbilo wetu wono cali cina nawo hamwamulizo. 15I Mandiko gakutya nhavi: “I zuwali hono muhulice lizi lyo Mulungu mulece kuzikamufya zinhumbula zenyu nha vyono wanoza wasogo zenyu lono wamubezeza u Mulungu.” 16Hambi wa nani wono walihulika lizi lyo Mulungu ninga wakamubeza? Wo wawo wose wono watongwa na Musa ku wulawa ku Misili. 17Kanyhi wa nani wono u Mulungu yawakolelwa likuwo mu myaka makumi mane kuko ku nyika? 18U Mulungu lono yelahiza yakutya, “Si wokwinjila mu wuceho wono nali niwawiciye.” Yawalongaga wa nani? Yalongaga muli za wawo i wabezi. 19Holeka cikuwona vyono si wasuma kwinjila kuko, vyono wali si wehuwiye.

will be added

X\