WAHEBELANIYA 11

1Wuwa no wihuwilo, wo wutya wo wumanyile lukulu we vinhu vyono citumbiye, kwitumbilila lukulu muli vyono siciviwonaga kwe meso. 2Hambi i wanhu we katali, nha watujila u wuvumilwe no Mulungu ku soko yo wihuwilo wawo. 3Na so wihuwilo, ase cimanyile nha vyono yinze yawumbilwa mu Nghani yo Mulungu; i vinhu vyono vijelaga ku wulawa mu vinhu vyono si vijelaga. 4So wihuwilo, Habeli yamulavizya u Mulungu likumbiko lyono lyali yiswanu muno licizize lya Kayini. Na so wihuwilo wakwe yavumilwa no Mulungu nha munhu we ling'ani; u Mulungu mweneco yavivumila i vilavywa vyakwe. Na so wihuwilo wakwe, hamba yawe yakondya kufwa, ninga yakali yakulonga. 5So wihuwilo, Enoci yanyasulwa no Mulungu, hamba si yafwa. Hamba si yejela kanyhi, hambi u Mulungu nha yali yamunyasula. Ne Mandiko gakutya, vyono yamwendezaga u Mulungu lono yali yakali si nanyasulwa no Mulungu. 6Holeka si yosumika kumwendeza u Mulungu hono hasina wihuwilo. Vyono u munhu wo wose mono yakusaka kumwendeza u Mulungu, yimunojeye yehuwile vyono u Mulungu yali baho, na kanyhi vyono u Mwene kawakamisaga wose wono wakumulondola. 7So wihuwilo, Noha yasugulwa no Mulungu kuli za kumwande zono yali yakali si yanasuma kuziwona yaye. Yamuhuliko Mulungu, yakanoza ligalawa lyono yaponela u mweneco hamonga na we mhuga yakwe wose. Na mu wulawilila muli zizo, i yinze yikaling'anizwa, nayo Noha yakatuga u wiling'ano wono wukulawilila mu wihuwilo. 8So wihuwilo, Abulahamu yamuhuliko Mulungu lono yacemelwa yabite ku yisi yono u Mulungu yali yamupele yiwe yakwe. Hamba yiwe si yali yamanyile kono yabitaga, ninga yakahama. 9So wihuwilo, yakekala nha mujenzi mu yisi yono u Mulungu yamwihuwiziza. Yakekala kuko mwihema nha vyono wekalaga wa Isaka na Yakobo, wono nawo wahanga u wihuwizo wuwo. 10Hambi Abulahamu nha yalindilaga likaya lyono lina u musinji wono wukamile, i likaya lyono u Mulungu mweneco yo munghula mono yalihwesa no kulizenga. 11So wihuwilo, sunga Sala yehuwila vyono u Mulungu kawufisilizaga u wihuwizo wakwe, holeka yakapegwa vilungo vyo kutuga 'nda, hamba yawe yali yakondya kupuluta i vilo vyo kutujila i mida so wukombi. 12Holeka mu wulawa mo munhu yuyo yumonga, Abulahamu hamba yawe yali yeza nha yafwiza, walelwa i wanhu wono si wakuwala, wenha i zinyelezi za ku wulanga no musawawa wa mwi'lenga. 13Ne wanhu wawa wose wafwa wena no wihuwilo. Nawo wafwa lono wakali si nabocela u wihuwilo wono u Mulungu yali yehuwize, ninga waziwonela kutali, wakasecelela, no kuvumila calinze vyono wene wali wajenzi kanyhi wajendi kono'nze. 14Ne wanhu wono wakulonga nha zizo, wakulajila calinze vyono wakuyilondola yisi yawo weneco. 15Na hono wali wawe wakuyikumbucila yisi kono walawilila katali, wali watuje i cilejeho co kuwuyila kuko kanyhi. 16Ninga alu wakusaka i yisi ya ku wulanga. Holeka u Mulungu nayo si yakuwona soni hono wamutye Mwene Mulungu wawo, ku soko vyono Mwene yakondya kuwawikaniziza i kaya. 17So wihuwilo, Abulahamu yamulavya u mwanagwe Isaka ho yawe likumbiko, lono u Mulungu yamujelaga. Na yuyo Abulahamu yali yabocela u wihuwizo wo Mulungu, ninga, hamba nhavivyo, yavumila kumulavya yikumbiko u mwanagwe we ciwene, 18hamba yiwe u Mulungu yali yakondya kumulonjela. “U lulelo lwako lolawa muli Isaka.” 19Abulahamu yehuwila vyono u Mulungu kosuma kuwazukula i wafu: na ku lubavu lunji, mbeka Abulahamu yamutuga kanyhi u mwanagwe kulawa kuli wafu. 20So wihuwilo, Isaka yawaluguta wa Yakobo na Esawu, ho watuje u wumoteswe wono wolokuza hanyuma. 21So wihuwilo, Yakobo lono yali yeza behi no kufwa, yawaluguta wana wose wa Yusufu, yakamuhembo Mulungu akuno yayegamiye ne nghome yakwe. 22So wihuwilo, Yusufu lono yali yeza behi no kufwa, yazilonga zo luhamo lwe Waisilayeli ku wulawa ku yisi ya Misili, yakawalecela ne malajilizo kuli ze mafupa gakwe. 23Sowihuwilo, i walezi wa Musa wamuhundika yuyo mwana mu myezi midatu, lono yali yalelwa. Wamuwona vyono yali mwana muswanu, hamba si wawogopa u wulajilize wo mutemi. 24So wihuwilo, Musa lono yali yeza munhu mututu, yalema kucemwa mwana wo muhinza wa Falawo. 25Yakawona vyono yili ciba yagazanwe hamonga ne wanhu wo Mulungu, si nho kwiyendeza no wuswanu wo wubi kwa cidaha cidodo. 26Yakamanya vyono, ku wutuga magazo ku soko ya Kilisito, ko cili cambuzi ciwaha muno muno, si nho u wugoli wose wa mu Misili, hambi nha yali yalanjiliye u wuhumbilizwe wa hanyuma. 27So wihuwilo, Musa yahama ku wulawa ku yisi ya Misili, hamba kogopa i likuwo lyo mutemi, na hamba si yawuya ku nyuma, hambi nha yali nha munhu mono yakondya kumuwona u Mulungu yu yulya mono si kejelaga. 28Na so wihuwilo, yanoza Pasaka, yakalajiliza i sakami yimizwe mu milango, ho yu yulya malayika u muwulaji yalece kuwawulaga wana walelwa i walongozi wa Isilayeli. 29So wihuwilo, i wanhu wa Isilayeli walowoka lilenga lya Shamu, kotya nha yali yisi nghavu; ninga Wamisili wali weza kujela nawo kunoza nhavivyo, wakafwila wose mu malenga. 30So wihuwilo, i majinji ge likaya lya Yeliko gakagwa, lono wanhu wa Isilayeli wali wakondya kugapilima mu vilo mupunghati. 31Na so wihuwilo, Lahabu mono yali musenyha, si yajililana hamonga na awalya wono wamubeza Mulungu, ku soko vyono yawacemela ko mulamu awalya i watandizi. 32Alu nolonga cici kanyhi, hambi cilejeho nha si conghondya ho nonje za Gidiyoni, Balaki, Samusoni, Yefuta, na Dawudi, na Samwili na ze wawizi. 33So wihuwilo, wawa wose wehoma ne watemi, wakasuma. Wetuma zo wiling'ano, nawo wakabocela zono yehuwiza u Mulungu. Wadinda i milomo ye masimba, 34wayizimya myoto mikali, wakapona mu wuwulagwe no mumaje. Wali wasocele, ninga wakatuga vilungo. Wali wena inhumbula yono yisina woga mu wulugu, wakagasuma i malugu ge wajenzi. 35Ne wacekulu wono wali wehuwiye, wakagomolelwa i wafu wawo wakondya kuzukulwa. Wanji muli wene wakalema kuwopolelwa, wakatamiswa vibi sunga wakafwa, ho watuje u wuzuce no kwinjila mu mikalile imiswanu yono yicizize muno. 36Wanji wakazwajizwa no kukunangwa ne viboko, na wanji kanyhi wakawopwa ne manyolo no kutajilwa mu jela. 37Watowangwa ne mabwe, wakademulangwa, wakawulagwa no mumaje. Wakawa kupilima-pilima wavwalile nyhingo ze zingholo ne zimhene, wakawa waciwa, wono wagazwa no kutendelwa vibi. 38Hamba ne yinze si yali yinojeye kuwa ne wanhu wawo. Wakawa kudumanjila mu nyika na mu matunda; wekalaga mu mapango na mu makolongo ge yisi. 39Ne wanhu wawa wose wejela vyono wali wali vilungo so wihuwilo wawo. Hamba nha vivyo, si wabocela zono u Mulungu yawehuwiziza, 40hambi u Mulungu nha yali yehwesize i nghani swanu muno kuciza ku soko yetu; wo wutya wene ho waze wawutuje u wukwilanicizwe hamonga na sese.

will be added

X\