WAHEBELANIYA 10

1U wulajilize we Wayahudi yo si hwani yono yikwilaniciye ya ze mbeka, langa muzizi du we ziswanu zono zikuza. I makumbiko gago gakuwa kulavywa nhondo zose mu mwaka na mwaka. Alu u Wulajilize wosuma nhawule kuwanoza awalya wono wakuhemba mu nzila ye makumbiko gago, ho wawe wakwilaniciye. 2Mhali wawo i wanhu wo Mulungu wakondizye kwezwa u wubi wawo, si wali wewone kanyhi vyono wena wubi, ne makumbiko gago gose gali gadume. 3Hamba nhavivyo, makumbiko gago ganozwaga mwaka na mwaka so kuwakumbuciza wanhu u wubi wawo. 4Nha vyono i sakami ye zinzeku ne zimhene nha si yosumila lukulu kuwuwusa u wubi. 5Holeka nayo Kilisito lono yazaga kononze, yamulonjela u Mulungu yakatya: “Si wasaka likumbiko hamba cilavywa, ninga wanozelezezo muwili. 6Si wukwendezwa ne vilavywa vyo kunyanywa vili muvilima vyono si vitemasetemase, hamba vyo kuwusa wubi.” 7Baho nane nghatya, “Ane nili baha 'gwe go Mulungu niwikanize kuwituma u wuhile wako, nha vyono nandicilwa mu citabu co Wulajilize.” 8Ha lulongozi yakatya, “Si wukusaka, hamba si wukwendezwa ne likumbiko ne cilavywa, hamba i vilavywa vyo kunyanywa vili muvilima so wubi.” Yalonga nhavivyo, hamba yiwe i vilavywa vivi vyose vikuwa kulavizywa mu wityatye wo Wulajilize. 9Kanyhi yakatya, “Ane nili baha 'gwe go Mulungu, ho nitume zo wuhile wako.” Baho u Mulungu ho yagawusiza i makumbiko ge katali, ne hanhu hayo yakawika i likumbiko linji limonga. 10Holeka vyono Yesu Kilisito yafisiliza u wuhile wo Mulungu, ase mo cikwezezwa u wubi wetu mu nzila ye likumbiko lyo muwili wakwe lyono yalilavya, lyono lyakondya kamonga du. 11U Mukohani wo wose we Ciyahudi, ketumaga u witumami wakwe mu wuhembi nhondo zose, akuno yakulavya makumbiko ga galya du kali kenji, i makumbiko gono si gasumaga kuwuwusa wubi. 12Ninga Kilisito yalavya ilikumbiko limonga du ku soko yo wubi, i likumbiko lyono likondizye cibitilila, hanyuma yakekala ku lubavu lo muwoko wo kulume wo Mulungu. 13Na kuko yalindiye sunga kolo i walugu wakwe wakuwikwa hasi ye migulu yakwe. 14Na ku so cilavywa cakwe cimonga, yawanoza no kuwa wakwilaniciye cibitilila, wawo wono wakwezwa u wubi wawo. 15Nayo u Muhe Mono Yelile yakucilonjela uwuhomelezi wakwe, Lulongozi yakutya, 16“Aci co cilagane cono nolagana nawo mu vilo vyono vikuza, yakutyo Muwaha: Nolowika i malajilizo gangu mu zinhumbula zawo, no kugandika mu mahala gawo.” 17Kanyhi yakutya, “Si nolowukumbucila kanyhi u wubi wawo, hamba ne metumo gawo go wuhodanji. 18Holeka u wubi lono wakondya kuwuswa, howa hasina kanyhi soko yo kulavizya i cilavywa co kuwusizo wubi.” 19Ale wandugu zangu, mu sakami ya Yesu, mo capelelwa i nhumbula yono yisina woga yo kwinjilila i Hanhu Hono Helile. 20Mwene yo yacitulila i nzila mhya, nzila yo wumi, yono yikoleye mwibupa, nha cinji mu nzila yo muwili wakwe mweneco. 21Holeka cina u Mukohani Muwaha mono yena u wulajilize mu nyumba yo Mulungu. 22Holeka cimusejelelaje u Mulungu ne nhumbula yo winenenyhezi no wihuwilo wono wumemeleceye, mu nhumbula yono yezigwe mu ciselinji cibi, na mu miwili yono yihovugwe ne malenga mazelu. 23Ciwukamisaje u witumbilo wetu wono cikuwuvumila, hambi u Mulungu mono yawunoza u wihuwizo wakwe nha mwihuwilwa. 24Kanyhi cihindaje mu wikombaniza sese wose munhu na muyagwe, akuno cikwiyoha kwiyikwejenhela ku wendo no wituma ziswanu. 25Cilece kuwuleka u wityatye wuwulya wo witang'anila hamonga, nha vyono wanozaga wanji. Kanyhi yicinojeye kwiyitaza sese wose, nha vyono mukuwona, i lizuwa lilya lyo Muwaha lyeza lili behi. 26Hambi hono cijendelele kwituma wubi ne nyono, na lono cakondya kuyimanya i mbeka, hasina kanyhi likumbiko lyono lyosuma kulavywa so wuwusizwe wo wubi. 27Langa yono yisigaye yowa yo wulanjilila ko woga, u wuling'anizwe wo Mulungu no moto mukali wono wolowamala wose wono wakumulema u Mulungu. 28U munhu wo wose mono yabezaga u wulajilize wa Musa yawulagwaga hamba kuwonelwa lusungu, hamwande yo wuhomelezi we wanhu wejete hamba wadatu. 29Wulenyi, u munhu mono yakumubedula u Mwana wo Mulungu, no kuyibedegala i sakami ye cilagane co Mulungu cono ca mweza, u munhu yuyo mono yakumutovula u Muhe wo Mulungu, yimunojeye yapegwe wulipicizwe wuwaha nha cici? 30Hambi nha cimumanyile ayulya mono yatya, “U wulipicize wina nene, ane nolipiciza.” Na kanyhi mono yatya, “U Muwaha kolowaling'aniza i wanhu wakwe.” 31Ku wugwila mu miwoko yo Mulungu mumi yo nghani ya kogofya muno muno. 32Ninga muzikumbucilaje zono zejela mu vilo vivilya i vilongozi lono mwali mwenzeluswa no wuzelu wo Mulungu. Ku soko hamba yiwe mwatuga wugazwe winji mu vilo vivyo, ninga mwakangalila. 33Hanji mukawa kutovulwa no kukozwa cevu cagalanze, na hanji mwali mwendezwe kwilunza na walya wono wagazwaga nhavivyo. 34Mwahangana u wugazwe ne wafungwa, na lono mwabokwaga zisawo zenyu, mwakangalila na nyemo, hambi nha mwali mumanyile vyono mwina sawo yono swanu muno muno kanyhi yono yikalaga cibitilila. 35Holeka mulece kuwutaga u wuluwuce wenyu, hambi nha womuletelenyi wuhumbilizwe wuwaha. 36Ninga mukusaka muwe no wukangalile, ho musume kwituma zono yakuzisaka Mulungu, ho mucibocele cono yehuwiza. 37Nha vyono gakutya i Mandiko: “Hambi nha cikali cidaha cidodo du, nayo mono yakuza, ho kokuza, hamba si kotinya yaye, 38Ninga u munhu wangu we ling'ani kokwihuwila no kuwumipa, ninga hono yawuye kanyhi ku nyuma, ane sinokwendezwa nayo.” 39Ninga ase si cili wayagwe na walya wono wakuwuya ne nyuma, no kwajilila, langa ase cihuwiye no kuponywa i zinhumbula zetu.

will be added

X\