WAGALATIYA 3

1Anye mo Wagalatiya, mbeka mweza muli walele! Alo mono yamukulujenyi nani? Hamby inghani yo wutumbikwe wa Yesu Kilisito, nha mwanzalicilwa ha meso genyu. 2Alu nghusaka kumanya nghani monga du kuli'nye. Alu mwamubocela u Muhe wo Mulungu ho musume kwituma i metumo go Wulajilize, hamba ku soko ho muluhulice no kulwihuwila u Luganuzi Luswanu? 3Alo nha wule muli walele nhavivi? Mwamuliziza zose mu wutazi wo Muhe wo Mulungu, alu mukuhila kumaliliziza mu vilungo vyenyu mo weneco? 4Alo wo wutya, i zinghani zose zilya zono zamutujenyi zawa za bwete? Si yosumika yaye! 5Ma, u Mulungu, yakawa kumupelenyi u Muhe kanyhi no kwituma mapoto muli nyenye, vyono mukuzifisiliza za mu Wulajilize hongo, hamba vyono mukuluhulika u Luganuzi Luswanu no kulwihuwila? 6Ta, cilanje za Abulahamu; u mwene yamwihuwila u Mulungu, nayo u Mulungu yakamuvumila no kumuwona yali ling'ani. 7Holeka mumanye vyono i wanhu wono wakumwihuwila, wawo wo wana wa Abulahamu. 8I Mandiko Gono Gelile gakulajila vyono, u Mulungu kowanoza i wanhu wono si Wayahudi ho wavumilwe hali mwene mu nzila yo wihuwilo. Holeka i Mandiko Gono Gelile galongola kumulonjela Abulahamu u Luganuzi Luswanu gakutya, “I wanhu wose wono si Wayahudi wolomotesezwa muli gwegwe.” 9Holeka wawo wono wena u wihuwilo, wolugutizwa nha vyono Abulahamu yalugutizwa vyono yali yehuwiye. 10Holeka wose wono wetumbiye kufisiliza za mu Wulajilize du, wali mu wulijitwe, hambi i Mandiko Gono Gelile nha gakutya, “Muli wose mono si yakwibata no kufisiliza zose zono zandikwe mu citabu co Wulajilize, mulijitwe.” 11Nha yanzalikwe, vyono u Wulajilize si wosuma kumunoza munhu ho yavumilwe hali Mulungu, hambi i Mandiko nha gakutya, “Mono yakuvumilwa hali Mulungu ku so wihuwilo, yuyo kowumipa.” 12Hambi u Wulajilize no wihuwilo, siyo cinhu cimonga yaye, langa i Mandiko gakutya, “Mono kozifisiliza zose zono zikusakwa mu Wulajilize, yuyo kowumipa.” 13Kilisito yacikomboza mu wulijitwe wo Wulajilize, hambi nha yawusola u wulijitwe wuwo ku soko yetu, vyono i Mandiko gakulonga, “Muli wose mono kotumbikwa mu musalaba, yuyo mulijitwe.” 14Nghani yiyi yanozwa ho wulugutwe awulya wono yapegwa Abulahamu, wusume kuwaziza i wanhu wono si Wayahudi mu nzila ya Yesu Kilisito, na mu nzila yo wihuwilo, cisume kuwubocela u Muhe yulya mono u Mulungu yacihuwiziza. 15Wandugu zangu, nomulonjelenyi i cihwanicizo ca mu mikalile yetu ye nhondo zose. Mwihwesaje ta muli ze cilagane ca wanhu wejete. I cilagane cila kuwa cawikwa cakondya, hamonga no kutajilwa sayini, hasina munhu mono kacidelengulaga, hamba kuconjeleza cinji. 16Ale Abulahamu nayo yapegwa cilagane mweneco hamonga no lulelo lwakwe. Ne Mandiko si gakutya, “Ne zindelo zakwe.” Nha kotya wenji, langa gakutya “No lulelo lwakwe” nha kotya yumonga du nayo yo Kilisito. 17Na cono nghusaka kucilonga nha coci, u Mulungu yanoza i cilagane cakwe kanyhi yakacikangaza, holeka u Wulajilize wono waza lono yali yakondya kupuluta myaka magana mane na makumi madatu, si wosuma kucidelengula i cilagane hamba kucinoza ciwe nha nghani ya bwete. 18Hambi i cipegwa co Mulungu hono ciwe cikwitumbila u Wulajilize, i cipegwa cico si cosuma kwitumbila kanyhi i cilagane co Mulungu. Ninga u Mulungu yamupela Abulahamu ku soko ye cilagane. 19Alu u Wulajilize waci? Wonjelezwa ho wuwulajile u wuhodanji co cici, sunga kolo yakuza ayulya wo lulelo lwa Abulahamu mono yalaganizwa. U Wulajilize waletwa na malayika ko muwoko wo mulamuzi. 20Yene yili mbeka vyono u mulamuzi si kasakwaga hono nghani yiwe kuli munhu monga, langa u Mulungu yo yumonga. 21Alo u Wulajilize vikusutana ne vilagane vyo Mulungu? Ng'o si nhavivyo yaye! Hambi hono wali wulavywe Wulajilize wono wosuma kuwapela wanhu wumi, baho cali cisume kuvumilwa hali Mulungu mu nzila yo Wulajilize. 22Ninga si nhavivyo, i Mandiko Gono Gelile gakondya kulonga nha vyono, i yinze yose yili mu vilungo vyo wubi, wono wehuwiye ho wapegwe i cilagane so wihuwilo muli Yesu Kilisito. 23Na lono cali cikali si napegwa wuwo u wihuwilo, u Wulajilize wali wuciwopile, sunga wugubulwe u wihuwilo wuwo wono wazaga. 24Holeka u Wulajilize wuwo wali nha mwijizi wetu sunga Kilisito yakaza, ho cisume kuvumilwa hali Mulungu mu nzila yo wihuwilo. 25Ninga alu vyono u wihuwilo waza, hodu, u Wulajilize wawa si mwijizi wetu kanyhi. 26Na mu nzila yo wihuwilo, anye wose mwawa wana wo Mulungu muli Kilisito. 27Nanye wose mono mwabaputizwa, mukelunza na Kilisito, alu mwamuvwala Kilisito. 28Holeka hasina kanyhi wisimajile wa muli Muyahudi na mono si Muyahudi, hamba muwanda no munhu mulelele, mucekulu hamba mulume. Hambi anye wose nha mwaweza cinhu cimonga muli Kilisito Yesu. 29Holeka anye hono muwe muli wakwe Kilisito, ale muli lulelo lwa Abulahamu, kanyhi mozibocela zizo ze cilagane co Mulungu.

will be added

X\