WAGALATIYA 2

1Hanyuma yaza kupuluta myaka yikumi na mine, nghawuyajila kanyhi kubita ku Yelusalemi cina hamonga na Balanaba, nghamusola na Tito cikabitana nayo. 2No wubite wangu walawilila mu wugubule wono yangubulila Mulungu. Na muwihangulize we cinyele, nghasuma kuwaloloseza wawo iwalongola ze nghani yo Luganuzi Luswanu lono naluganula kuli wanhu wono si Wayahudi. Nanoza nhavivyo ho mulimo wangu wono nali nakondya kuwituma, sunga na wono nali nghali kuwituma, wulece kuwa nha nghani ya bwete. 3Ninga sunga no muyangu Tito mono cali cina nayo mono yali Mugiliki, si yadindimizwa kwalama, 4hamba yiwe hali howali wandugu wo wulambi wono wali wahijiliye Tito yalame. I wanhu wawa weyinjiza ko wusugu, wakawa kuwulondola u welecele wetu wono cina nawo muli Kilisito Yesu, ho wacinjize mu wuwanda. 5Nase si celumbaniza nawo hamba hadodo, i mbeka yo Luganuzi Luswanu ho yikale muli nyenye nhondo zose. 6Ninga i wanhu wawa wono wakutegwa wo walongola, hono mbeka vyo wali wenha, hamba yiwe si nhavivyo, kwangu si nghani yaye, hambi u Mulungu nha siyakuwa kuling'aniza so wulanga za kunze, ne wanhu wawa wali wasina cinji cono wali wadahile konjeleza mu Luganuzi lulu Luswanu nha vyono ane nghuluganula no mweneco. 7Hamba nhavivyo, wali wamanyile vyono u Mulungu yo yanhuma kuluganula u Luganuzi Luswanu kuli wanhu wono si Wayahudi, nha vyono Petelo yali yatumigwe kuwaganulila i Wayahudi. 8Ku soko vyono yuyo mono yamupela Petelo i vilungo vyo kuwela mutumwa kuli Wayahudi, yo yuyo kanyhi mono yamhela nane i vilungo vyo kuwela mutumwa kuli wanhu wono si Wayahudi. 9Holeka wa Yakobo na Kefa hamonga na Yohana, wono wakwijela nha wo walongola wawaha, wali wamanyile vyono u Mulungu yo yamhela lihewa lilyo, holeka wakawa kucilamusa ane na Balanaba kwe miwoko yawo, wakulajila i citanjilo co wuhangane hamonga. Na yikawa yicinojeye ase ciketume u mulimo kuli wanhu wono si Wayahudi, wene nawo kuli Wayahudi. 10Ninga hamba nhavivyo, wacilomba ase cinhu cimonga, nha cinji ciwakumbucile wanhu waciwa, na yo nghani yono nghuhidimbala muno kuyituma. 11Ninga Kefa yaza kuza ku Antiyokiya, namwimila cagalanze hamwande ya wose, ku soko yali yasutizye. 12Ku soko vyono ha mwamulizo, i wanhu wanji wono watumwa na Yakobo, lono wali wakali si nafika baho, Petelo vyalizanaga hamonga ne wanhu wono si Wayahudi. Ninga waza kufika wanhu wawo, hodu Petelo yakawa kulecela lukulu kulizana ne wanhu wono si Wayahudi, ku soko vyono yawogopa i wanhu wawo wono wahilaga i wanhu wono si Wayahudi walame. 13Sunga ne wandugu wanji we Ciyahudi wakevumila hamonga na Petelo mwi'tumo lilyo lyo wukoci, sunga na Balanaba yakenjizwa nayo mu wukoci wawo. 14Holeka nane naza kuwuwona u wuwe wawo wa mu mbeka yo Luganuzi Luswanu, vyono si wuli mu nzila yono yili mu mbeka, hobaho nghawa kumulonjela Kefa hali wose, nghamutya, “Hamba wuwe agwe wuli Muyahudi, ninga wukwikala mu mikalile nha vyono wekaye wanhu wono si Wayahudi, hamba si wikaye kotya Muyahudi! Alu kosuma nhawule kujela kuwadindimiza i wanhu wono si Wayahudi wekale mu mikalile ye Wayahudi?” 15Heya mbeka, ase kulawa katali cili Wayahudi, hamba si cili wanhu we wono si Wayahudi, wawo i wahodanji! 16Ninga cimanyiye lukulu vyono u munhu si kosuma kuvumilwa hali Mulungu ku soko yo kuwibata u Wulajilize, langa so kumwihuwila Yesu Kilisito du. Na sese cimwihuwiye Yesu Kilisito nhavivyo ho cisume kuvumilwa hali Mulungu mu nzila yo wihuwilo wetu kuli Kilisito, hamba si so wibate wo Wulajilize. 17Alu hono yiwe mu wulondola wuvumilwe hali Mulungu muli Kilisito, cikwijela cili wabi nha vyono wenha i wanhu wono si Wayahudi, wule! Nghani yiyo yowa yina nhunizo yo wutya Kilisito yakutaza mu wituma wubi? Aa ng'o! 18Langa hono niwe nghuzenga kanyhi cicilya cono nakondya kucikumula, baho langa nghwilajila vyono nili muhodanji. 19Ku soko ane nakondya kufwa mu Wulajilize wuwo, u Wulajilize weneco wo wambulaga, ho niwe nili mumi muli Mulungu. Ane nawulagwa hamonga na Kilisito mu musalaba, 20ninga nghuwumipa, ninga yo si nene kanyhi, langa Kilisito yo yakuwumipa muli nene. No wumi wuwu wono nina nawo lulu, nghuwumipila u wihuwilo, u wihuwilo wa muli Mwana wo Mulungu mono yanyenda sunga yakelavya wumi wakwe ku soko yangu. 21Si nghwenda kulema lihewa lyo Mulungu. Hono yiwe munhu kanozwaga ling'ani hali Mulungu mu nzila yo Wulajilize, kumbe Kilisito yafwa bwete.

will be added

X\