WAEFESO 5

1Alu vyono muli wana wendece wo Mulungu, yimunojelenyi muwe nha vyono yenha Mwene. 2Imikalile yenyu yeze kulongozwa no wendo, nha vyono Kilisito yacenda, yakelavya ku soko yetu cilavywa ce mhunjile swanu ne likumbiko lyono limwendezaga u Mulungu. 3Ninga wusenyha, no wavu wose, hamba wusulumizi, vilece kutambulilwa lukulu muli nyenye, hambi nha vyo yinojeye kuli anye mo wana wo Mulungu. 4Kanyhi i zinghani ze cevu, na zo wulele, na zo wiwanganile, zose zizo si nghani swanu kuli nyenye, langa yili ciba mweze kumulumba u Mulungu. 5Kanyhi yinojeye mumanye vyono, musenyha, hamba mwavu, hamba u musulumizi (hambi u wusulumizi nha wo wukumbika vihwani,) hamba munhu wo wose mono yenha nhavivyo, si kosuma kutuga co cose mu wutemi wa Kilisito na wo Mulungu. 6Mulece kumuvumila yunji yamukonjenyi na nghani zono zisina cambuzi, hambi nha ku soko ye zinghani zizo, ilikuwo lyo Mulungu likuwa kuwaziza iwana wono si wakumuhulika. 7Holeka mulece kuhanga nawo. 8Hambi ikatali nha mwali mu wutitu, ninga alu mweza muli mu wuzelu so wilunze wenyu no Muwaha. Holeka mwikalaje nhe wana wo wuzelu, 9hambi imana go wuzelu nha gali mu wuswanu wose no wiling'ano ne mbeka. 10Mujele kuzimanya za hayi zono zikumwendeza u Muwaha, 11kanyhi mulece kuhanga mu metumo ge citi gono si ganojeye, ninga mugawikaje mu wuzelu. 12Hambi izinghani zono zitumwaga cinyele, nha cevu hamba kuzilonga. 13Ninga izinghani zose zono zitumilwaga mu wuzelu, imbeka yayo yiwezaga yili cagalanze. 14Na co cose cono cikwanzalikwa cikuwa wuzelu. Na co cikuleka i Mandiko gakutya, “Wusinhuce agwe mono wugonile: Kanyhi wuzuce muli wafu nayo Kilisito kokubulilila.” 15Ale mwilanjililaje mu mikalile yenyu. Mulece kwikala nhe walele, langa nha we mahala. 16Mucitumamilaje viswanu i cilejeho cono mwina naco, ku soko alu i vilo avi vyaweza vibi. 17Holeka mulece kuwa walele, ninga mujele kuzimanya zono zikumwendeza u Muwaha. 18Mulece kugala wujimbi, hambi wuwo nha wuletaga i mikalile ye caka caka, langa mweze mumemile u Muhe Mono Yelile. 19Mweze kwiduwanila nyenye wose mu zinghani za mu Zabuli, na nyimbo no wimbe we cinya Muhe, mumwimbile u Muwaha zinyimbo na Zabuli, mukumulumba mu zinhumbula zenyu. 20Mumulumbaje u Mulungu Baba nhondo zose ku soko ya zose, mwi'tagwa lyo Muwaha wetu Yesu Kilisito. 21Mweze kwiyihulika nyenye wose ku soko yo kumogopa Kilisito. 22Iwacekulu wawahulikaje iwalume zawo nha kotya kumuhulika Muwaha. 23Hambi u mulume nha yo yena uwulajilize kuli mugolece wakwe, nha vyono nayo Kilisito yena wulajilize mwi Kanisa, nayo Kilisito mweneco yo kayikombozaga Kanisa nha cinji u muwili wakwe. 24Alu nha vyono Likanisa likumuhulika Kilisito, ale nhavivyo ne wacekulu wawahulikaje walume zawo muli zose. 25Nanye mo walume muwendaje iwagolece zenyu nha vyono Kilisito yalyenda Likanisa, yakelavya mweneco cilavywa ku soko ye Likanisa. 26Yanoza nhavivyo ho yalyezeze mu nghani yakwe, yaliwice siya kuli Mulungu, lono yakondya kulyeza ko kulihovuga kwe malenga, 27ho yetujile Likanisa lyono lyelile, na lyono yiswanu, Likanisa lyono lisina manamha manamha hamba cilema, hamba ganji go gose gono genha gaga. 28Holeka yiwanojeye i walume wawende iwagolece zawo nha vyono wayendile imiwili yawo weneco. Mono yamwendile u mugolece wakwe, ye yendile mweneco. 29Hambi nha kusina munhu mono yawusulile u muwili wakwe mweneco, langa yakuwulisa kanyhi yakuwuvwika. Nhavivyo na Kilisito nayo vyo yakulidima Likanisa, 30hambi ase nha cili vilunzwa vyo muwili wakwe. 31Nha vyono gakulonga i Mandiko Gono Gelile, “Ku soko yiyo u mulume kowaleka u Sogwe no nyina, vilunze no mugolece wakwe, nawo vyono wejete wowa muwili monga.” 32Mu zinghani zizi moyili i mbeka yono yihundikwe mumo, nane nghuwona vyono yidomile kuli Kilisito ne Likanisa lyakwe. 33Ninga zikumupamizenyi na nyenye nhavivyo, vyono yimunojeye mulume wo wose yamwende mugolece wakwe nha vyono ye yendile mweneco, nayo u mucekulu, yimunojeye yamogope u mulume wakwe.

will be added

X\