WATUMWA 6

1Mu vilo vivyo, lono liwalo lya wono wehuwiye lyonjelezekaga, gakejela mang'ung'uliko hagati ya Wayahudi wono wali wehuwila, wono walongaga nonga ye cigiliki, na wono walongaga Cihebelaniya, awalya wono walongaga Cigiliki, wang'ung'ulikaga wakutya, iwafwile wawo siwakukumbucilwa mu wupegwa visakwa vyawo vye nhondo zose. 2Nawo iwatumwa we likumi na wejete, wakayicema mhuga yose ya wono wehuwiye, wakawatya, “Si yinojeye ase cilece kuyiganula nghani yo Mulungu, no kwinjila mu mulimo wo wugawi we visakwa. 3Holeka wandugu zetu, mwiyihagulaje muli nyenye, wanhu mupunghati, we lilumbo, wono wamemile Muhe ne mahala, ciwawice mu mulimo wuwu. 4Ninga ase, cowa kuswa mu wulombe, na mu mulimo wo kuyiganula nghani yo Mulungu.” 5Inghani yiyi yikawendeza imhuga yose ya wono wali wehuwila, wakawa kuwahagula, Sitefano, munhu mono yamemile wihuwilo no Muhe Mono Yelile, na Filipo, na Polokolo, na Nikanoli, na Timona, na Palimena, na Nikolasi munya ku Antiyokiya, mono si Muyahudi, mono yali yayipitucila dini ye Ciyahudi. 6Wakawawika ha mwande ye watumwa, nawo wakawalombela no kuwawicila miwoko. 7Inghani yo Mulungu yikacila kutandala, ne liwalo lya wono wehuwila kuko ku Yelusalemi, likacila konjelezeka, ne mhuga mbaha ye Wakohani, wakawubocela u wihuwilo. 8Mulungu yakamupela Sitefano lihewa ne vilungo vinji, sunga yakawa kwituma mapoto ne mezino muli wanhu. 9Ninga wakenuka wanji, ho wawangane na Sitefano, wanji wa muli wanhu wawo, wali we nhang'anilo yono yitezagwa “Nhang'anilo yo wuhembelo ye Wanhu Welecele,” nawo walawilila ku Kilene, na ku Alekizandeliya, wanji wakalawa ku Kilikiya na Asiya. 10Hamba si wamusuma ng'o, ku soko ye mahala gakwe, na ku soko ya yuyo Muhe mono yamutongaga mwipango lono yalongaga. 11Hobaho wakawafupa wanhu wanji cinyele, ho watye, “Cimuhulika Sitefano yakulonga nghani za nhovu kuli Musa, na kuli Mulungu.” 12Na so yiyo wakawasagahaza wanhu, iwanyamhala, ne wejizi wo Wulajilize. Wakamuziza Sitefano, wakamwibata, wakamuleta ha mwande ye libalaza liwaha. 13Wakawika wahomelezi wo wulambi wono watya, “Munhu ayu si kalekaga kulonga nghani za nhovu muli hanhu aha hono helile, na muli u Wulajilize wa Musa. 14Hambi nha camuhulika yakutya ati, ayu Yesu wa Nazaleti, kohahodanjila lukulu ihanhu baha, no kuyiwusiza lukulu imyoto yono yacilajiliza Musa.” 15Na wose wono wali wali baho he balaza, wakamulanga Sitefano, wakawuwona wusu wakwe weza winha wusu wa Malayika.

will be added

X\