WATUMWA 4

1Petelo na Yohana lono wali wakali wakuwaganulila wanhu, Wakohani no muwaha we walindiliza Nyumba yo Mulungu hamonga ne Wasadukayo, wakawaziza; 2wakugazika muno mu zinhumbula, vyono wawo watumwa, wawaganulilaga wanhu vyono Yesu yazuka, inghani yono yikulajila cagalanze vyono iwafu wolozuka. 3Wakawebata, na vyono cilo cali casejelela, wakawatajila mu jela, sunga imitondo yaco. 4Ninga wenji wono wayihulika i nghani, wehuwila, na ku wuwale, wali waficile nha wanhu elufu yihano. 5Kukawa waza kwela, iwawaha wawo ne Wanyamhala ne wejizi wo Wulajilize, wakekongholela ku Yelusalemi, 6na Anasi u Mukohani Muwaha yali yali baho, na Kayafa, na Yohana, na Alekizanda, na wose wono wali we mhuga yo Mukohani Muwaha. 7Waza kuwawika iwatumwa hamwande yawo, wakawawuza wakutya, “Alu 'nye, mukwitumila zizi mu vilungo vya hayi, na mwitagwa lya nani?” 8Hobaho Petelo, yamemile Muhe Mono Yelile, yakawatya, “Nye mo walongola we wanhu, na mo wanyamhala! 9Hono yiwe mukuciwuza izuwali, zo witume wuswanu wono yatendeywe ayulya munhu mono yali yali citewe, na vyono yatujile yuyu wupone. 10Ale, yimanyice kwenyu wose, na kuli wanhu wose wa Isilayeli, vyono, mwi'tagwa lya Yesu Kilisito wa Nazaleti, mono mwamutumbika nyenye, mono Mulungu yamuzukula muli wafu, mwi'tagwa lilyo, yuyu holeka yemile baha hali nyenye mutelevu. 11Yo mwene mono Mandiko Gono Gelile gakutya, ‘Ilibwe lyono mwalilema anye nyo wazenji Lyanozwa kuwa yibwe yiwaha lyo musinji.’ 12“Hamba hasina mhonelo muli yunji wo wose, hamba yitagwa linji nha hasina hono hasi yo wulanga, lyono wapegwa wanhu, lyono linojeye ciliponele.” 13Wawo wanyamhala wo mukung'ano, wali wawamanyile wa Petelo na Yohana vyono wali wanhu du wono si wasomile, ninga wakawezina kuwawona wakulonga kwe vilungo wasina hamba woga. Wakawezuka, vyono wawezanaga na Yesu. 14Nawo waza kumuwona munhu mono yaponywa vimane nawo, wakawa wasina ya kulonga. 15Holeka wakawatya walawile kunze yo mukung'ano, wene ho watuje cilejeho co kwiheha. 16Wakawa kwiwuza, “Alo ciwatende wule wanhu wawa? Hambi i nghani ye lipoto lili nha yimanyice kuli wanhu wose wa mono Yelusalemi, nha vyono linozwa na wene, hamba ase sicosuma kulikana. 17Ninga hono cisace nghani yiyi yilece kutandala muli wanhu, ale ciwogofyaje, ho walece kujendelela kulonga kanyhi na munhu wo wose mwi'tagwa lya Yesu.” 18Holeka wakawacema wenjile, wakawalonjela vyono walecele lukulu kuganula calinze, hamba kwijiza mwi'tagwa lya Yesu. 19Ninga Petelo na Yohana wapitula wakawatya, “Ale mulonje, hono yo ling'ani hali Mulungu cimuhulicenyi nyenye si nho kumuhulika Mwene. 20Hambi nha si cosuma kuleka kuzilonga zono cawona no kuhulika.” 21Nawo wawo iwanyamhala wo Mukung'ano waza cila kuwogofya, hanyuma wakawaleka. Hambi nha si wayiwona yo kuwatamisiza, hambi wanhu wose nha wamukumyaga Mulungu, so nghani yiyo yono yanozeka. 22Nayo u munhu yuyo mono yaponywa nha yali yaficile myaka makumi mane no musapu. 23Nawo wa Petelo na Yohana waza kukombolwa, wakabita kuli wayawo, wakawaganulila zose zono walonjelwa ne wakohani wawaha ne wanyamhala. 24Na wawo, waza hulika, wakenulila hamonga i mazi gawo kuli Mulungu, wakatya, “Gwe Muwaha, mono wanoza wulanga ne yinze ne lilenga, na vyose vyono vili mugati! 25Mono wamunoza sogo yetu Dawudi, mwitumami wako, yalonje kwe vilungo vyo Muhe Mono Yelile, yakutya: ‘So cici i wanhu wono si Wayahudi wakalipe? Ne wanhu wehwesa gono gali musina? 26Iwatemi we yinze wakewikaniza, Ne wawaha wakekonghola hamonga, Ho wamuleme Muwaha na Kilisito wakwe.’ 27“Kwaco mbeka, Helode na Pontiyo Pilato, wena ne wanhu wono si Wayahudi, ne zimhuga za Isilayeli, nha wekongholela baha mu kaya yiyi ku soko yo mwitumami wako mono yelile, Yesu mono wamunoza yawe Kilisito. 28Heya, wetang'anila ho wanoze zizilya, zono wetemezezya no kuziwikaniza kwe vilungo vyako, na ko wendo wako, ku wulawa mwamulizo. 29Alu Muwaha wulanje wogofye wawo. Wucipelaje vilungo co wetumami wako ho ciyiganule nghani yako cisina woga. 30Wugolole muwoko wako no kuwaponya wanhu. Mapoto ne mezino, ganozezwe mwi'tagwa lyo Mwitumami wako mono yelile, Yesu.” 31Nawo waza kukondya kulomba, i hanhu baho hono wali wehangulizize, hakasinjisika, nawo wose wakamemywa u Muhe Mono Yelile. Nawo wose wakawa kwanza kuyiganula nghani yo Mulungu wasina woga. 32Ne mhuga yawo wose wono wehuwila, wali na nhumbula monga no mutima monga. Hasina hamba yunji mono yali yena cinji co cose, mono yatya, yo sawo yakwe mweneco, langa wali wahanjile vyose. 33Na mu vilungo vinji, watumwa wakahomelela zo wuzuce wo Muwaha Yesu, nayo u Mulungu yakawapela ko winji lihewa lyakwe. 34Hambi nha kwali kusina muyawo mono yali yanjiye cinji, hambi wose wono wali wena migunda, lunji nyumba, waviguzaga, 35no kuziwika zipesa zayo mu miwoko ye watumwa, wakagawilwa wose, viling'aniye munhu ne visakwa vyakwe. 36Hakawa na mulawi yumonga mulelelwa ku Kupulo, litagwa lyakwe Yusufu, mono watumwa wamucemaga Balanaba, (nhunizo yayo, “Mwana wo wutuzwe.”) 37Nayo yali yena mugunda wakwe, yakawuguza, yakazileta zipesa, no kuziwika mu miwoko ye watumwa.

will be added

X\