WATUMWA 27

1Ale waza kulamula vyono cijendele mu ngalawa ku wubita ku Italiya, wakamuwika Pawulo ne wafungwa wanji, mu miwoko yo muwaha we wasilikale yigana, litagwa lyakwe Yuliyo, wa mu mhuga yono yacemwaga, “Mhuga ya Kayisaliya.” 2Caza kupanda mu ngalawa ya Andelamutino, yono yabitaga no kukolela mu zikaya za ku mhwani za Asiya, cikatuluka, cali cina na Alisitaliko, Mumakedoniya wa Tesalonike. 3Imitondo yaco cikakola ha Sidoni. Yuliyo yakamutendela viswanu Pawulo, yakamukombola yabite ku wendece wakwe ho yasindamikwe. 4Caza tuluka kuko mu ngalawa, ninga vyono mbeho yaputaga muno, yikulawilila ku mwande yetu, cikakolela ku lubavu lwe cizingwa ca Kupulo kono mbeho si yali na vilungo. 5Hanyuma caza lowoka lilenga lyono lili ha Kilikiya na Pamufuliya, cikafika Mula, litumbi lya Lukiya. 6Na kuko yuyulya u muwaha we wasilikale yigana, yakawona ngalawa ya Alekizandeliya yono yikubita ku Italiya, yakacinjiza mumo. 7Cikajendelela no muhinzo wetu mholamhola kwa vilo vinji, hamonga no wugaye, sunga cikafika behi na Nido. Na vyono mbeho yali yikali yikucimila, cikajendelela kumwande du, cikakolela kulubavu lwa Kilete, vyono yidomile Salimone ku lubavu lono mbeho yali si mbaha. 8Cikakolela mu mhelo mhelo yayo mholamhola, sunga cikafika hanhu hanji hono hatezagwa, “Bandali Swanu,” behi ne likaya lya Laseya. 9Lyaza puluta yidaha mututu, ne lizuwa lyo kuleka kulya lyali lyapuluta. No muhinzo wa mwi'lenga wukawa mubi, Pawulo yakawasugula wayagwe, yakatya, 10“Nye wayangu, ane nghuwona vyono umuhinzo wuwu wowa na malema, no wambuce wowa wuwaha, si wa vya mugati ne ngalawa du, langa na wo wumi wetu.” 11Ninga u muwaha we wasilikale yigana, yahulicila wulonje wa mono yayijendyaga ngalawa, no munya ngalawa si nha azilya zono yazilonga Pawulo. 12Na vyono ha bandali yiyo hali si hanhu haswanu, ku wikale mwi'pango lye cinyuli, wenji wakenda wajendelele no muhinzo, na hono yisumice wafice sunga ku Foyinike kono wali wasume kwikala mu cipango ce cinyuli. Foyinike yo bandali ya Kilete yono yidomile kutakama ye mwezi na kusumuka ye mwezi. 13Yaza puta imbeho ndodo ya kutakama, wakaganiciza nha vyono watujile zono wahilaga, holeka wakasuka i cimizizo ce ngalawa, wakawa kwelela, wayikozize ngalawa ha mhelo ya Kilete, wasejeleye kwi'sangha. 14Caza kupuluta cidaha cidodo, imbeho yo mukukunzo yikatowa cihumbi, yikulawa ku cizingwa, imbeho yono yitezagwa, “Mbeho ya kusumuka.” 15Ngalawa yaza kwibatwa ne mbeho, na vyono si casuma kwisumaniza nayo, hodu cikawa kwisuza, cikawa kusolwa ne mbeho yiyo. 16Cizingwa cinji cono cikucemwa Kawuda, co cacicitila hadodo ne mbeho yiyo, nase cali ceza puluta ku lubavu lwayo lwe takama, ho cikasuma kuciwopa cipugu ce ngalawa, hamba yiwe yali hamonga no wugazice. 17Waza kucinjiza mugati ye ngalawa, wakayizinga ngalawa na milejehe no kuyiwopa kwa vilungo. Wogopaga, wakutya lunji wosuma kudodomela ha nhumbi ye lilenga lya Libiya. Holeka wakacitimya cimizizo no kuyileka ngalawa yitegulwe ne mbeho. 18Na lono cesumanizaga muno ne mbeho, imitondo yaco wakanza kuvitaga mwi'lenga vya mugati mu ngalawa. 19Ne lizuwa lye kadatu, wakawa kwanza nhavivilya kuvitaga ne miwoko yawo weneco ivinhu vye ngalawa. 20Hamba izuwa, hamba zinyelezi zose, si zejelaga kwa vilo vinji, ne makukunzo mawaha ge mbeho gakaciziliza, sunga no witumbilo wose wo kupona, cikawa cisina. 21Na lono wali wekala kwa vilo vinji si waliye ndigwa, baho Pawulo yakema haciligati yakatya, “Nye wayangu, cinojele hono mwali muhulice izangu, mulece kutuluka ku Kilete, u wubi wuwu no wiyambuze wuwu si mhali ciwutuje. 22Na lulu nghumunenenyi mwisindamice, hambi nha hasina hamba yumonga mono kokwajiliza uwumi wakwe, langa ngalawa du yo yokwajilila. 23Ku soko Malayika wo Mulungu wangu, mono nimuhembaga, kema hali nene mu cilo ce zuwali, 24kawa kunyitya, ‘Pawulo, Wulece kogopa, nha si koleka kwima hali Kayisali, na langa ta, u Mulungu so wuswanu wakwe, kakuwonela lusungu ko kuwaponya wose wono mukujendana nawo ho walece kwajilila.’ 25Ku soko yiyo, holeka mwisindamice 'nye wayangu, hambi nha nimwihuwiye u Mulungu vyono zowa nha vivi vyono nonjeywe. 26Ninga hamba nhavivyo, si coleka kutagwa mwi'zingwa linji.” 27Mu cilo ce lizuwa lye likumi na yine, cikawa cikutegulwa ako na ako mwi'lenga lya Meditelaneya. Mu cilo mugati, iwetumami we ngalawa waganicizaga nha wayisejeleye yisi nghavu. 28Wakasaka kumanya uwutali we malenga ku wubita hasi, holeka wakawugwiliza mulejehe wono wali muwopeleze cinhu cizito, wakawona vyono wutali wali mita makumi mane. Hanyuma hadodo wakapima kanyhi, wakawona mita makumi mejete. 29Alu vyono cogopaga cikutya lunji cogumilwa mu mabwe, holeka wakatajila vimizo vine kunyuma ye ngalawa. Wakalomba wele mbela. 30Iwetumami we ngalawa wasakaga kutiza mu ngalawa, nawo wali wakondya kucitimya cipugu mwi'lenga, akuno wakwikojela nha kotya wasakaga kutajila vimizo kumwande ye ngalawa. 31Ninga Pawulo yakamulonjela u muwaha we wasilikale yigana, hamonga ne wasilikale wakwe, yakatya, “Hono wawa wetumami walece kwikala mu ngalawa, anye wose si mopona ng'o.” 32Lo lulo lulo iwasilikale wakayidumula milejehe yono yali yibate cipugu, wakacileka cisolwe ne malenga. 33Na lono wali weza kwela, Pawulo yakawanena wose walye ndigwa, yakutya, “Vyeza vilo yikumi na vine alu, vyono mwali mu mahwele, mukawa kuswa ne nzala hamba kulya cinji. 34Holeka nghumunenenyi, mulye ndigwa, hambi nha yo mhonelo yenyu. Hambi nha hasina hamba luvwili lumonga lwa mu mitwe yenyu lono lokwajilila.” 35Yaza longa zizi, yakasola mukate, yakamulumbila Mulungu hali wene wose, yakawubegula, yakanza kulya. 36Wakasindamikwa wose, wakasola na weneco ndigwa, wakawa kulya. 37Cikawa mu ngalawa wose nha wanhu magana mejete na makumi mupunghati na mutandatu. 38Waza kwiguta ndigwa, wakawugumila uwuhemba mwi'lenga, ho wacepuze uwuzito mu ngalawa. 39Waza kwela, iwetumami siwasuma kuyitanga yisi yiyo, langa wakawona yiwokowoko lina ne sangha, wakalongana hono wosuma lunji kuyikundujiza mumo ngalawa. 40Holeka wakavidumula vimizo, wakavileka mwi'lenga, wakadohola milejehe ye vitonjelo, na waza nanusa litote ho lyambe mbeho, wakabita ku kulya ku mwejelele. 41Ninga wakagana hanhu ha wutang'anilo we malenga mejete, ingalawa yikehimbiza mu muhangha. Kumwande yayo yikehimbiza yikebatwa zii, ninga kunyuma yayo, yikanza kubenanjika so vilungo vye mawingo. 42Iwasilikale wahilaga iwafungwa wose wawulagwe, vyono wogopa lunji wokojelela sunga kunhumbi watize. 43Ninga u muwaha we Wasilikale yigana, vyono yendaga kumuponya Pawulo, yakawemila walece kwituma nghani yiyo. Yakalajiliza wono wamanyile kojelela, wetajile mwi'lenga wojele sunga ku yisi nghavu, 44na wono wasigala webate mu zimbawo, hamba mu vinhu vinji vya mu ngalawa. Kukawa nha vivi wose, vyo casuma kufika ku yisi nghavu cili watelevu.

will be added

X\