WATUMWA 26

1Agilipa yakamutya Pawulo, “Ale, kukombolwa witetele.” Baho Pawulo yakagolola muwoko wakwe, yakawa kwitetela, yakutya, 2“Go mutemi Agilipa, nghwiwona nili ciba zuwali, kwitetela hamwande yako muli ze masitaka gose gono Wayahudi wakugalonga muli'ne. 3Ko muno vyono agwe wuyimanyile myoto yose ye Wayahudi, hamonga ne zinghani zawo, holeka nghukulomba wuhulicizaje ko wukangalizi. 4Imikalile yangu vyono nalawa wudodo wangu, na vyono nekalaga ne we likungugo lyangu kuko ku Yelusalemi. 5Wamanyile Wayahudi wose kwa vilo vinji, na wadahile kulonga hono wende, nha vyono ku wulawa mwamulizo nekalaga nili mu cipuga co wisiwanuzi mu wuhembi wetu, cipuga ce Wafalisayo. 6Na lulu nyimile baha ning'anizwe ku soko yo witumbilo wo wihuwizo wono u Mulungu yawehuwiziza i wakuku zetu. 7No wihuwizo wuwo, wo wuwo wono sunga ne milango yetu yikumi na myejete, wo wetumbiye, wakwihinda kumwitumamila Mulungu cilo na misi. Na ku soko yo witumbilo wuwu, 'gwe go mutemi, holeka Wayahudi wakusitaka! 8Alu nhawulenyi nanye si mukusuma kwihuwila vyono u Mulungu yakuwa kuwazukula iwafu? 9Ane no mweneco mbeka nali nihuwiye vyono, yinojeye nitume nghani nyinji zo kulilema ilitagwa lya Yesu wa Nazaleti. 10Navyo natendaga ku Yelusalemi. Nene no mweneco lono nali napegwa uwulajilize kulawa kuli wakohani wawaha, nghawadindila mu jela wanhu wo Mulungu wenji. Nawo lono wapegwaga wulipicizwe wo kuwulagwa, nane nelumbilizaga ne litumo lilyo. 11Kali kenji nawatowaga mu matang'anilo go wuhembelo gose, nghawa kuwadindimiza watovule wihuwilo wawo. Ne likuwo lyangu kuli wene likacila muno, holeka nghawa kuwalondelela sunga mu matumbi go kutali. 12“Lono nabitaga ku Damesiki, mwizuwa linji nina vilungo no wulajilize we wakohani wawaha. 13Gwe go mutemi Agilipa, lono nali nili mu nzila mwipango lye saa sita ne misi, nghawona wuzelu wulawile ku wulanga, wucizize wumulice we lizuwa, wukamulicila kose kose nene na wono cajendana nawo. 14Ase wose cikagwa hasi, ane nghahulika lizi likulongana nane mu nonga ye Cihebelaniya likutya, ‘Sawulo, Sawulo, nhawule wukungaza? Wukwitamisa bwete nhe ndogowe yono yikubana inghome yo mutwawe.’ 15Nane nghawuza, ‘Yo gwegwe nani Muwaha.’ Nayo Muwaha yakatya, ‘Ane yo nene Yesu mono wukungaza. 16Ninga si nghani yaye, alu winuce, wime wima. Nilajila kuli'gwe ho nghuhagule wuwe mwitumami no muhomelezi kuli wanhu wanji, wa zizi zose zono wuziwene izuwali, sunga na azilya zono nokulajila. 17Nane nokuponya muli wanhu wa Isilayeli, na muli wanhu wono si Wayahudi, kuli wono nghukutuma. 18Kowabunzulula i meso gawo, ho wasume kuwuka ku wutitu, ho wapitucile kuzelu, wawuce mu vilungo vya Setani, wamupitucile Mulungu, na so wihuwilo, ho watuje wunenelwe wo wubi, ho watuje wuhazi, hamonga na walya wono wakondya kuwa wanhu wo Mulungu.’ 19“Holeka, Go mutemi Agilipa, si nasuma kuwa mubezi kuli nghani yiyo yono nalajilwa kulawa ku wulanga. 20Ninga nghamula kamonga kuwaganulila wanya Damesiki na wanya Yelusalemi na wa mu yisi yose ya Yudiya, kanyhi na kuli wanhu we Makungugo ganji. Nghawaswaswaniza wamupitucile Mulungu, kanyhi walajile mu metumo gawo, vyono wakondya kupituka mu zinhumbula zawo. 21Ku soko yiyo, Wayahudi wakanyibata lono nali nili mu Nyumba yo Mulungu, nawo wakajela kumbulaga. 22Ninga u Mulungu yakanhaza, holeka sunga ne zuwalili, nimile cilume-lume, nghuwahomelela wose iwawaha ne wadodo. Sinongaga zinji, langa zizilya du zono wazilonga iwawizi na Musa, vyono zolokwijela, 23nha vyono Kilisito si koleka kutamiswa na kanyhi ho yawe mulongozi mu wuzuce mu wafu, ho yawalonjele zo wuzelu wo wukombozwe, vyono wukuwamulicila alu iwanhu wose, Iwayahudi sunga ne wanhu wono si Wayahudi.” 24Pawulo yaza kanga baho mu witetele wakwe, Fesito yakalonga yazozize yakutya, “Mwene Pawulo! Wina lukwale! Uwusoma muno wako, wo wukupeye lukwale.” 25Ninga Pawulo yakatya, “Ane sina lukwale, 'gwe Fesito umulumbwe; langa nghulonga ze mbeka na ze mahala. 26Gwegwe mutemi wuzimanyile zizi, holeka nosuma kulonga sina woga ha mwande yako. Nane manyile vyono, zizi zose zili calinze hali 'gwe, hambi nha hasina yinji yono yanozezwa kumhelo. 27Gwe mutemi Agilipa, wukuwehuwila wawizi hongo? Manyile vyono wukuwehuwila.” 28Agilipa yakamutya Pawulo, “Mwi'daha lili yifupi, wukwihwesa mo komhitulila niwe Mukilisito?” 29Pawulo yakamupitula, yakatya, “Vyo nghumulomba u Mulungu hono yiwe mwi'daha yifupi, hamba yitali, kanyhi si gwegwe du, langa na wose wono wakuhuliciza ane yizuwali, wawe vyono ninha nene, ninga si ne manyolo gaga.” 30Umutemi Agilipa, no muwaha we yisi Belinike, hamonga na wono wali wekalane nawo, wakenuka. 31Nawo waza kuwuka, wakawa kulongana weneco wose, wakutya, “Munhu ayu si yanozize nghani yo yose yono yomutegula ku wufwe, hamba ku wufungwe.” 32Agilipa yakamutya Fesito, “Munhu ayu mhali yawopolelwe, hono yali yalece kutambula kubita kwa Kayisali.”

will be added

X\