WATUMWA 24

1Vyaza malika vilo vihano, Umukohani Muwaha Ananiya, yakaza ku Kayisaliya, wena ne wanyamhala wanji, hamonga na wakili yunji litagwa lyakwe Telitulo. Wakamubitila ayulya u muwaha we yisi, wakamuloloseza ze masitaka gawo muli Pawulo. 2Nayo Pawulo yakacemwa, nayo Telutiyo yakawa kumusonjeza yakutya, “Go mulumbwe Feliki, vyono cikutuga mulamu muno ku soko yako, na ku so wuling'anizi wako, imasutya gakuwa kunozelezwa viswanu so cambuzi ce nghungugo yetu. 3Cikuyivumila inghani yiyi kwa nyemo, hamonga no wulumbwe wose kuli'gwe nhondo zose ne hanhu hose. 4Ninga ho ndece kucila kukukalaza, nghukunena wucihulicize mu wupolo wako, nghani za ndumula. 5Hambi nha camuwona ayu vyono yo munhu wa mbali muno, mwene yo muwusa wuma muli Wayahudi wose kononze kose, na kanyhi mwene yo mulongola mu mhuga ye Wanazalayo. 6Kanyhi sunga yakajela kuyihodanga ne Nyumba yo Mulungu, nase cikawa kumwibata. [Cikasaka kumuling'aniza nha vyono winho wulajilize wetu, 7ninga Lusiya u muwaha we wasilikale u mulongola, yakaza, yakamusola na vilungo viwaha muno mu mawoko getu. 8Yakawalajiliza wono wakumusitaka, waze hali gwegwe.] Muli mwene, nagwe kohulika, hono wumuwuze go mweneco, kokwizuka zizo zose zono cikumusitaka.” 9Iwayahudi nawo wakazilumbiliza zizo wakutya, “Heya vyo zinha.” 10Nayo u muwaha we yisi, yakamusonhelela Pawulo yalonje, nayo Pawulo yakapitula yakatya, “Nghusangalala kwitetela hamwande yako, akuno manyile vyono waweza muling'anizi we likungugo lili kwa myaka minji. 11Kosuma kuwona go mweneco, vyono vyapuluta kotya vilo si vicizize yikumi na vyejete nhavi, kulawa lono nabitila kuhemba ku Yelusalemi. 12Wayahudi si wanyagana cikwiwanganila na munhu, hamba kusagahaza wuma mu Nyumba yo Mulungu, hamba mu matang'anilo gawo go wuhembelo, hamba hanji ho hose mwi'kaya lilyo. 13Hamba si wosuma kuzigololela zono zikuleka wakusitaka ane alu. 14Langa nghani monga yono nghuyivumilila hali gwegwe yoyi; Ane nghumuhemba u Mulungu we wakuku zetu, nikaye mu Nzila yiyo yono wene wakuyitya, wilunze wo wisiwanuzi. Ane nghuzihuwila zose nha vyono zandicigwe mu Wulajilize, na zono zandikwe ne wawizi. 15Ane nimwitumbiye Mulungu, nawo nhavivilya, wawina witumbilo wuwo, vyono iwanhu iwaswanu ne wabi, wolozuka. 16Ku soko yiyo, nene no mweneco, nghwihidimbaza, ho niwe na nhumbula swanu kuli Mulungu, na kuli wanhu, nhondo zose. 17“Sunga na lono nali nekala kutali kwa myaka minji, nawuya ku Yelusalemi, ho niwategulile wanyawusi wayangu wutazi no kulavya vilavywa. 18Na mwipango lyono netumaga zizo, lo wanyaganila mu Nyumba yo Mulungu, lono nali nakondya kunoza wuhembi wo wezwe wangu. Hali hasina mhuga ya wanhu, hamba mazozo. 19Ninga hali ho wali Wayahudi wanji, wono walawa ku Asiya, nawo wo wali wanojeye wawe baha hono mwande yako, wasitace, hono wawe wena nghani muli nene. 20Hamba, lunji awa weneco wono wali baha, walonje lisutya lyono waliwona muli'ne, lono nali nyimile hamwande ye libalaza lyawo liwaha. 21Langa hono si nghani monga du yono nayilonga, lono nali nyimile ha mwande yawo, yono natya, ‘Mukuning'aniza izuwali ku soko ane nihuwiye vyono iwafu wolozuka.’ ” 22Ninga Feliki, vyono yali yamanyile viswanu ze Nzila yiyi, yakacidiza calo, yakawatya “Noloyiling'aniza yinghani yenyu kolo yakondya kuza baha Lusiya umuwaha we wasilikale umulongola.” 23Yakamulajiliza umuwaha we wasilikale igana, yamukamise Pawulo, ninga yamupelaje ne cilejeho, hamba iwendece wakwe, walece kwimilwa kumupela ivisakwa vyakwe. 24Vyaza puluta vilo vicefu, Feliki yakaza no mugolece wakwe we Ciyahudi ilitagwa lyakwe Delusila. Yakamucema Pawulo, yakamuhuliciza zono yakulonga zo wihuwilo wa muli Yesu Kilisito. 25Ninga Pawulo yaza kwamula kulolosa zo wiling'ano na zo wiyimile na ze ning'aniza yono yikuza, Feliki yakogopa muno yakatya, “Alu wubite, ninga nokucema kanyhi kolo natuga cilejeho.” 26Na mwi'pango lilyo baho, yali yetumbiye vyono Pawulo komupela mapesa. Na ku soko yiyo, holeka yakacila kumucema-cema Pawulo ho wasimulilane nayo. 27Ninga myaka myejete yaza kupuluta, Feliki yakakawanizwa na Polikiyo Fesito yo yakawa u muwaha we yisi. Nayo Feliki vyono yahilaga kwiyendeza kuli Wayahudi, yakamuleka Pawulo muwopwe.

will be added

X\