WATUMWA 23

1Nayo Pawulo, yakawalanga muno wanhu wono wali wali baho he balaza, hanyuma yakawa kutya, “Nye wandugu zangu, ane nikalaga na nhumbula nzelu hali Mulungu sunga nalu.” 2U mukohani muwaha Ananiya, yakawalajiliza wono wali wemile behi, wamutowe kofi Pawulo mu mulomo. 3Nayo Pawulo yakamutya, “U Mulungu kokutowa kofi gwegwe, agwe mono wihwanile lijinji lyono libacigwe swakala! Kosuma nhawule kwikala no kuning'aniza ane nha vyono winho Wulajilize, na kunji gwegwe go mweneco wukuwubena Wulajilize so kunyitya ane nhowe kofi?” 4Iwanhu wono wali wemile baho, wakamutya Pawulo, “Alo wukumutovula Mukohani Muwaha wo Mulungu?” 5Pawulo yakatya, “Wandugu zangu, si nali manyile, vyono yo Mukohani Muwaha, hambi nha yandikwe, Wulece kumulonga vibi muwaha we wanhu wako.” 6Ninga Pawulo yaza kwizuka, vyono mhuga monga ye wanhu wawo, wali Wasadukayo na wanji wali Wafalisayo. Hobaho yakalonga yazozize hamwande ye libalaza yakutya, “Mo wandugu zangu, ane nili Mufalisayo mwana we Wafalisayo, ane wandeta hono mahakama, ku soko yo witumbilo wo wuzuce we wafu.” 7Yaza longa zizi, kukawa wiwanganile muli Wafalisayo ne Wasadukayo, imhuga yose yiketemanuka wejete. 8Ne soko yayo yali nhavi, Iwasadukayo watezaga, kusina wuzuce we wafu, hasina malayika, hamba muhe hasina. Ninga Iwafalisayo wavumilaga vyono hozili zizo zose vyono yidatu. 9Holeka kukawa na mazozo mawaha, ne wejizi wenji wo wulajilize we mhuga ye Wafalisayo, wakema, wakabeza kwe vilungo, wakutya, “Ase si cikuwona nghani yo yose 'mbi muli munhu yuyu, lunji ma hono yawe muhe, hamba malayika kalonga nayo?” 10No wiwanganile waza jendelela kucila, u muwaha we wasilikale mulongola, yakogopa, yakutya mba Pawulo kodemulwanga nawo. Holeka yakawalajiliza wasilikale, wenjile mwipuga lye wanhu, wamuwuse Pawulo wamugomoleze mwigomawakali. 11Mu cilo cico, u Muwaha yakema behi na Pawulo, yakamutya, “Wisindamice, hambi nha vyono wuhomeleye zangu kukuno kono Yelusalemi, nha vivyo vyo yikunojeye kuhomelela na ku Lumi.” 12Waza kwela, Iwayahudi wakekonghola cinyele, wakelahiza wakutya, “Ase sicolya hamba kung'wa, sunga kolo cakondya kumuwulaga Pawulo.” 13Nawo wono wepinga nhavivi, wali wacizize wanhu makumi mane. 14Wakaza kuli wakohani wawaha ne wanyamhala, wakatya, “Ase wose cilahiza vyono, cilece kujeza cinji mu milomo yetu, sunga kolo cakondya kumuwulaga Pawulo. 15Alu anye, hamonga ne libalaza, mumulonjele u muwaha we wasilikale u mulongola, yamulete Pawulo kuli nyenye nha kotya mukusaka kumanya viswanu nha vyono zinha zakwe. Nase ciwikanize kumuwulaga na lono yakali si yanafika baha.” 16Ninga u mwana we cilume wo lumbulye lya Pawulo, yakawumanya u wuhile wawo, holeka yakenjila mwigomawakali, yakawa kumulonjela Pawulo. 17Nayo Pawulo yakamucema yunji wa muli wawaha we wasilikale yigana, yakatya, “Wumusole muzelelo ayu, wumutegule kuli muwaha we wasilikale u mulongola, yena nghani yo kumulonjela.” 18Umusilikale yakamusola, yakamutegula kuli muwaha yuyo, yakatya, “Ayulya Pawulo muwopwe, kanyhema, kanyitya nimulete muzelelo ayu kwako, yena nghani yo kukulonjela.” 19Umuwaha we wasilikale u mulongola, yakamwibata muwoko yuyo muzelelo, wakabitana hanhu ha cilejeho, yakamuwuza yakutya, “Wina nghani ci yono wukusaka kunonjela?” 20Nayo u muzelelo yakatya, “Iwayahudi walagane wakulombe, wumutegule Pawulo kwi balaza imitondo, nha kotya libalaza likusaka kumanya viswanu nha vyono zinha izakwe. 21Ninga agwe wulece kuvumila, hambi nha kowali wanhu wono wacizize makumi mane wono wewikanize ho wamwibate. Nawo welahiza vyono walece kulya hamba kung'wa sunga wamuwulaje. Nalu wewikanize, walindiye uwulamuzi wako du.” 22Umuwaha we wasilikale mulongola, yakamukombola muzelelo, yakamulonjela vyono yalece kumulonjela yunji vyono kamufisiza zizi. 23Umuwaha we wasilikale u mulongola, yakacema wawaha wejete we wasilikale yigana, yakawatya, “Muwikanizize lukulu wasilikale magana mejete, iwapanda fwalasi makumi mupunghati, na we migoha, magana mejete, wabite ku Kayisaliya izuwalili mwipango lya saa tatu ye cilo. 24Muwikanizize lukulu ne zifwalasi zono momupandiza Pawulo, mumutegule yapolile kuli Feliki u muwaha we yisi.” 25Nayo u muwaha we wasilikale u mulongola yakandika baluwa nhavi: 26“Ane Kilawudiyo Lusiya, nghukwandicila gwegwe we lilumbo Feliki umuwaha we yisi, Lamucenyi! 27Munhu ayu, yebatwa ne Wayahudi, na yali yali behi no kuwulagwa nawo, hono nali ndece kumanyizwa vyono mwene munya Lumi, holeka nimubitila hamonga ne wasilikale niwa kumuponya. 28Na vyono nasakaga kumanya yisoko yono wakumusonjezeza, namutegula hamwande ye libalaza lyawo. 29Nane nghawona vyono wakumusonjeza ku soko yo wiwanganile du wa zinji za mu wulajilize wawo, holeka nghawona vyono yasina soko yo yose yo kufwila, hamba yo kudindililwa mu jela. 30Nane niza manyizwa vyono Wayahudi wakumugoza wamuwulaje, mbona viswanu nimulete kwako. Nghawalajiliza wasonjezi wakwe wamusonjeze ha mwande yako.” 31Nawo iwasilikale, nha vyono walajilizwa, wakamusola Pawulo, wakamutegula ne cilo cico sunga ko ku Antipatili. 32Ninga imitondo yaco wawalya iwasilikale wono wajendaga hasi, wakawuya kwigomawakali, wakawaleka awalya iwasilikale wapanda Fwalasi, wajendane hamonga na Pawulo. 33Nawo waza kufika ku Kayisaliya, wakamupela u muwaha we yisi ibaluwa, no kumuwika na Pawulo mu miwoko yakwe. 34Nayo Feliki yaza yisoma baluwa, yakawawuza iyisi yono Pawulo yakulawa. Nayo yaza kumanya vyono yali munya Kilikiya, 35yakatya, “Nohuliciza zo wusonjezwe wako, kolo weza kuwa baha wono wakukusitaka.” Hanyuma yakalajiliza vyono Pawulo yakamisizwe mwikulu lya Helode.

will be added

X\