WATUMWA 22

1“Nye wandugu zangu ne wasogo zangu, hulicizenyi zono nghwibombola alu hali nyenye!” 2Waza hulika vyono yakuwalonjela mu milonjele ye Cihebelaniya, wakacila muno kunyamala twii. Nayo Pawulo yakajendelela kutya, 3“Ane nili Muyahudi, nalelelwa ku Taliso ya ku Kilikiya, ninga mbilucila mone kaya lili lya Yelusalemi, ha magulu go mwijizi wangu Gamaliyeli, nghejizwa, nghamanya no kuyityatya muno muno imyoto ye wakuku zetu, nane nghelavya muno kuli zo Mulungu nha vyono mwinha nyenye wose zuwali. 4Nghawagaza wose wono wayityatyaga Nzila yiyi. Nghawawopa iwalume ne wacekulu no kuwatajila mu zijela. 5U Mukohani Muwaha, hamonga ne mhuga yose ye Wanyamhala, wosuma kuyihomelela inghani yiyi. Hambi nha wo weneco wono wamhela zibaluwa, zono wandicilwa we zindugu i Wayahudi wono wali, wali kuko ku Damesiki. Nane nghabita kuko ku Damesiki, ho niwawope wanhu wawo, niwalete wawopwe sunga ku Yelusalemi, ho walipicizwe. 6“Ale, lono najendaga, na lono nali nasejelela ku Damesiki, nayo yali nha saa sita ne misi, nghawona lwa kamonga wuzelu wuwaha wukalawilila ku wulanga, wukamulicila kose kose. 7Baho nghagwa hasi, nghahulika lizi likunonjela likutya, ‘Sawulo, Sawulo, alo so cici wukungaza?’ 8Nane nghapitula nghatya, ‘Gwegwe nani Muwaha?’ Nayo yakanonjela yakatya, ‘Yo nene Yesu wa Nazaleti mono agwe wukungaza.’ 9Wawalya wayangu wakawuwona uwuzelu du, ninga ilizi lya mono calonganaga nayo, si walihulika ng'o. 10Ale nane nghawa kuwuza, ‘Alu nhende wule Muwaha?’ Nayo Muwaha yakamhitula yakatya, ‘Winuce wubite ku Damesiki, na kuko, kolonjelwa zose zono zikunojeye witume.’ 11Alu, ku soko yo wung'alale wo wuzelu wuwulya, si nasuma kuwona, holeka iwayangu wono cali cina nawo, wakanyibata muwoko, wakanhonga sunga nghenjila Damesiki. 12“Kuko ku Damesiki kwali na munhu yunji litagwa lyakwe Ananiya, munhu muswanu, mukamisa wulajilize, mono yali yena lilumbo kuli Wayahudi wose, wono wekalaga kuko ku Damesiki. 13Umwene yakanyiziza, yakema behi nane, yakatya, ‘Ndugu yangu Sawulo, wutuje kuwona.’ Nane ho baho baho du, nghawa kuwona, nghenula meso, nghawa kumulanga. 14Nayo Ananiya yakatya, ‘U Mulungu we wakuku zetu, kakuhagula agwe, ho wumanye u wuhile wakwe, no kumuwona u mwitumami wakwe Mono Yali Ling'ani, no kulihulika ilizi lya mu mulomo wakwe mweneco. 15Hambi nha kowa muhomelezi wakwe kuli wanhu wose, muli zizi zono wuziwene, na zono wuzihulice. 16Nhawule lu wukucela? Winukaje, wubaputizwe wuwusizwe lukulu uwubi wako, kuno wukulicemeleza ilitagwa lyo Muwaha.’ 17“Hanyuma nghawa kuwuya ku Yelusalemi, na lono nalombaga mu Nyumba yo Mulungu, baho nghawona nghani yo wizine. 18Nghamuwona Muwaha, nayo yakanyitya, ‘Wusunhe, wuwuce mbela mu Yelusalemi, hambi iwanhu wa baha, nha si wowuvumila wuhomelezi wako wa kuli'ne.’ 19Nane nghatya, ‘Muwaha, na weneco nha wamanyile vyono ane nawatajilaga mu jela no kuwatowanga mu matang'anilo gose go wuhembelo, wose wono wali wakwihuwiye gwegwe. 20Na lono muhomelezi wako Sitefano yawulagwaga, nane no mweneco nali nili baho, nane nghelumbaniza ne litumo lilyo, sunga nghawa nigalindilize imakoti ga walya wono wamuwulagaga.’ 21Nayo Muwaha yakawa kunyitya, ‘Wubite, vyono alu, nokutuma kutali kuli i wanhu wono si Wayahudi.’ ” 22Iwanhu wakamuhuliciza Pawulo sunga yakayidumya nghani yiyi, hanyuma wakawa kwanza kuzoza wakutya, “Munhu mono yenha yuyu, mumuwuse mononze, mumuwulagaje, hambi u munhu we liwala lili, nha si yanojeye kuwumipa.” 23Wakajendelela kuzoza nhavivyo, akuno wakugayunza makoti gawo mucanyha, no kutimula manghundi mucanyha. 24Umuwaha we wasilikale mulongola, yakalajiliza Pawulo yenjizwe mwigomawakali, yakawalonjela, wamukune viboko, ho wamanye yisoko yono yikuleka Wayahudi wakumuzozeza nhavivi. 25Ninga waza kukondya ku muwopa, ho wamukune, ne viboko, Pawulo yakamuwuza u muwaha we wasilikale yigana, mono yali yemile behi yakatya, “Ati, wulenyi, yili ling'ani kuli'nye, kumukuna viboko munhu Mulumi, lono yakali sinaling'anizwa?” 26Nayo u muwaha we wasilikale yigana yaza hulika zizi, yakamubitila u muwaha u mulongola yakamutya, “Alu wukusaka kutenda wule? Hambi munhu ayu nha Mulumi!” 27Umuwaha u mulongola yakaza, yakamutya Pawulo, “Ale ta, wulonje, ati wuli Mulumi hongo?” Nayo Pawulo yakamupitula, yakatya “Heya.” 28U muwaha u mulongola yakapitula yakatya “Ane nawutuga wunyawusi wuwu wo kuwa Mulumi kwa sawo nyinji.” Nayo Pawulo yakatya, “Ninga ane nili Mulumi ku ndelwa.” 29Awalya iwanhu wono wali wewikanize kumuwuza wuza Pawulo, ho wamumanye izakwe, hodu wakawa kumuleka. Sunga na yuyo u muwaha we wasilikale nayo, yakogopa, yaza manya vyono Pawulo Mulumi, na kanyhi vyono yali yamuwopa. 30Imitondo yaco, u muwaha we wasilikale, vyono yasaka kumanya i mbeka yono Wayahudi wakumusonjezeza Pawulo, yakamuwopolela Pawulo manyolo gakwe, yakalajiliza wakohani wawaha ne wanyamhala wose wekonghole. Nayo yakamuleta Pawulo, yakamuwika ha mwande yawo.

will be added

X\