WATUMWA 21

1Caza kwitemanuka nawo, cikatuluka mu ngalawa, cikajenda cigolocile sunga ko ku Koso, ne mitondo yaco cikafika ku Lodo, caza kulawa kuko cikabita ku Patala. 2Na kuko cikayagana ngalawa yikulowoka yikubita ku Foyinike, cikenjila, cikatuluka. 3Ale caza kufika i hanhu hono casumaga kuliwona lizingwa lya Kupulo, cikalikola ku lubavu lwayo lwa kutakama, cikajendelela mu ngalawa sunga ko ku Siliya, cikatimila Tulo, hambi kuko ingalawa nha ko yatimizyaga mitegulo yayo. 4Cawagana wejizwa kuko, nase cikawa kuko vilo mupunghati. Iwejizwa wawo wakawa kulonga mu vilungo vyo Muhe, wakamulonjela Pawulo, yalece kubita ku Yelusalemi. 5Ninga cali ceza kukwiza vilo vyetu vyo wikala baho, cikatuluka, cikajendelela no muhinzo wetu. Nawo wose, hamonga ne wagolece zawo, hamonga ne wana wawo, wakacisindiciza sunga kunze ye likaya. Caza kufika ha mwejelele we lilenga, cikafugama, cikalomba. 6Cikeyilaga nawo, ase cikenjila mu ngalawa, nawo wakawuya kwawo. 7Nase cikajendelela no muhinzo wetu ku wulawa Tulo, cikafika Pitolemayi, cikawalamusa we zindugu, cikaswezana nawo izuwa limonga. 8Imitondo yaco cikatuluka, cikafika Kayisaliya. Na kuko ku Kayisaliya, cikenjila mu kaya ya Filipo u muganuzi. Umwene yali yo muyagwe na walya wo mupunghati, wono wahagulwa ku Yelusalemi. 9Na yuyo Filipo, yali yena wanagwe wadatu wahinza, wono wali wena cipegwa co kuwila. 10Caza kuwa cekalakala vilo vinji, yakaza muwizi yunji yakulawa ku Yudiya, litagwa lyakwe Agabo. 11Nayo yakaza kuli'se, yakasola musipi wa Pawulo, yakewopa mweneco mu magulu na mu mawoko, yakatya, “U Muhe Mono Yelile yakutya nhavi, Iwayahudi ku Yelusalemi wolomuwopa nhavivi u munhu munya musipi wuwu, nawo womutajila mu miwoko ye wanhu wono si Wayahudi!” 12Caza hulika zizi, ase hamonga na wono wali bahalya, cikamunena Pawulo yalece kubita ku Yelusalemi. 13Ninga mwene Pawulo yakapitula yakatya, “Alo mukusaka kunoza cici? Mukulila no kunyenyanga mutima wangu? Hambi ne nha nilumbiye si kuwopwa du, langa no kufwila kuko ku Yelusalemi, ku soko ye litagwa lyo Muwaha Yesu.” 14Ale yaza kuwa si yakusumika, cikanyamala, cikatya, “Wuhile wo Muwaha witumwe.” 15Vyaza malika vilo vyo wikale wetu baho, cikayiwopa mitegulo yetu, cikajendelela no muhinzo wetu, cikabita ku Yelusalemi. 16Wejizwa wanji wayagwe na walya wa ku Kayisaliya, wakajendana nase wakacitegula ku kaya ya Munasoni, munya Kupulo, kono cabitaga kwikala kwa cipango. 17Caza fika ku Yelusalemi iwe zindugu wakacibocela na nyemo mbaha. 18Imitondo yaco Pawulo yakabita hamonga nase, kumulamusa Yakobo, ne Wanyamhala wose we likanisa wali wali baho. 19Yaza kondya kuwalamusa, Pawulo yakawa kuwaloloseza zose zono Mulungu yali yetuma mu wanhu wono si Wayahudi so witumami wakwe. 20Nawo waza hulika wakamukumya Mulungu, wakamutya Pawulo, “Wukuwona agwe ndugu yetu, vyono kowali Wayahudi maelufu, wono wehuwila, nawo wose wapiligazi ku wibata u Wulajilize wa Musa. 21Nawo walonjelwa i zako, nha vyono wali kuwejiza i Wayahudi wono wekaye mu wanhu wono si Wayahudi, walece kuwucelelela Wulajilize wa Musa, wukutya, walece kuwategula ku calamo wana, hamba kutyatya myoto ye Wayahudi. 22Alu ho zowa nhawule? Hambi nha si woleka kuhulika vyono wuzize bahano. 23Ale wunoze nhavi vyono cikukulonjela, cina wanhu wane baha, wono wali mu wilahize, 24wuwasole wawo mubitane ku wuhembi wo wezwe, no kuwalipila, wacete mu mitwe yawo, holeka wanhu wose womanya vyono, zono walonjelwa za muli gwegwe zisina imbeka, langa vyono agwe go mweneco wukali wibate Wulajilize wa Musa. 25Ninga kuli walya wono si Wayahudi wono wehuwila, cawandicila, cikawalajiliza, Walece kulya cinhu co cose cono cikumbiciywe milungu yo wulambi, walece kung'wa sakami, walece kulya nyama yono yinyonjigwe, kanyhi weleje mu wusenyha.” 26Hobaho Pawulo, imitondo yaco yakawasola i wanhu wa walya iwejete, yakeyeza hamonga nawo, hanyuma yakenjila mu Nyumba yo Mulungu, yakalajila wufisilizwe we vilo vyo wezwe, sunga likumbiko lyono lyolavywa ku soko ya wose vyono wenha. 27Vilo mupunghati vyaza kuwa behi no kumalika, Iwayahudi wanya Asiya waza muwona Pawulo mu Nyumba yo Mulungu. Wakayisagahaza mhuga yose ye wanhu, wakamwibata Pawulo. 28Wakazoza, wakutya, “Nye nyo wanyawusi wa Isilayeli, Ayu yo yuyo munhu, mono yakuwejiza wanhu hanhu hose, zinghani zono zisimajiye kuli wanhu wa Isilayeli, hamonga no Wulajilize wa Musa, sunga ne hanhu aha hono Helile, sunga nalu kawenjiza wanhu wono si Wayahudi mu Nyumba yo Mulungu, no kuhavufya ihanhu hono Helile.” 29Walonga nha vivyo ku soko wali wamuwona Telofimo Mwefeso wena na Pawulo mwi'kaya, wakaganiciza vyono Pawulo 'mba, yali yamwinjiza mu Nyumba yo Mulungu. 30Likaya lyose likasagahala, iwanhu waketang'anila lumangho, wakamwibata Pawulo, wakamukwejenhela kunze ye Nyumba yo Mulungu, na ho baho imilango ye Nyumba yo Mulungu yikawa kudindwa. 31Wakawa wewikaniza ho wamuwulaje, ninga izinghani zikamuficila u muwaha mulongola we lipuga lye wasilikale we Cilumi, vyono Yelusalemi yose yisagahaye. 32Hobaho yuyo muwaha we lipuga lye wasilikale, yakasola wasilikale, hamonga ne wawaha wawo, yakalibitila lipuga lye wanhu lumangho, nawo waza kumuwona u muwaha yuyo ne wasilikale, wakawa kuleka kumutowa Pawulo. 33U muwaha we wasilikale u mulongola, yakasejelela, yakamwibata Pawulo, yakalajiliza wamuwope ne manyolo mejete. Hanyuma ho yakawa kuwawuza, yakutya, “Alu yuyu nani, na kanyhi cono yanozize ci cici?” 34Na wanji wa mwi'puga lye wanhu, wakanza kulonga nhavi wanji nhavi. Na ku soko yo wusagahale we wanhu, umuwaha we wasilikale si yasuma kuyimanya i soko yeneco. Holeka yakawa kuwalajiliza wanhu wakwe wamutegule Pawulo mwigomawakali. 35Pawulo yaza kufika ha zingazi, wasilikale wakawona viswanu wamudinghule Pawulo ku soko ye mazozo ge wanhu. 36Ku soko wanhu wenji wali wamulondeleye mu nyuma, wakuzoza, wakutya, “Mumuwulagaje si.” 37Nawo wasilikale lono wamwinjizaga Pawulo mwigomawakali, Pawulo yakamulomba u muwaha we wasilikale, yakutya, “Wule, ndahile kukulonjela nghani?” Nayo u muwaha we wasilikale yakamutya, “Wule, wumanyile kulonga Cigiliki? 38Si yo gwegwe yaye Mumisili yulya we mazuzi galya, mono yasagahaza wuma, yakawategula ku nyika wanhu elufu yine i wawulaji?” 39Pawulo yakatya, “Ane nili Muyahudi, munya Taliso ya ku Kilikiya, ane nili munya kwi'kaya lyono lina lilumbo. Nghukunena wunghombole nonje ne wanhu.” 40Nayo muwaha we wasilikale, yakamukombola. Hobaho Pawulo yakema mucanyha ye zingazi yakawapunjila wanhu muwoko, nawo waza kunyamala twii, yakawa kwanza kuwalonjela nghani mu milonjele ye Cihebelaniya, yakutya.

will be added

X\