WATUMWA 20

1Wuma wuwulya wa ku Efeso waza kukondya kutula, Pawulo yakawacema hamonga wawalya wejizwa, yakawasinyhimika. Hanyuma yakawelaga, yakatuluka, yakabita ku Makedoniya. 2Yakakolela mu zisi zizilya, no kuwasindamika na nghani nyinji. Hanyuma yakafika ku Wugiliki. 3Yaza mala myezi midatu kuko, na lono yasakaga kubita ku Suliya, yakamanya vyono Wayahudi wali wena wuhile wubi kuli mwene, holeka yakalamula ha wuwuye, yakolele Makedoniya. 4Sopateli mwana wa Pulo munya Beloya wakabitana nayo, na wanya Tesalonike, wa Alisitaliko na Sekundo, hamonga na Gayo munya Delibe na Timoteyo, na wanya Asiya, Tukiko na Telofimo. 5Ninga wawa walongola, wakawa kucilindila ku Tulowa. 6Ase cikatulucila mu ngalawa ku Filipi, lono vyali vyapuluta vilo vye mikate yono si yisasize, cikawagana ku Tulowa mwizuwa lye hano, na kuko cikekala vilo mupunghati. 7Mwi'zuwa lye jumamosi cinyamihe, cikekonghola ho ciwubegule umukate. Alu vyono Pawulo yahilaga kwilawa kuwuka hakali mitondo, holeka yakajendelela kuwaganulila nghani, sunga mu cilo mugati. 8Na mu cinyumba mono cali cikongholeye ca ku golofa, kwali na tala nyinji zikwaka. 9Hali na muzelelo litagwa lyakwe Ewutuko, yali yekaye mucanyha ye lidilisha, mwipango lyono Pawulo yajendelelaga kuganula. Ewutuko yakanza kusinzila hadodo hadodo, na hanyuma zinhongo zikamwibata, yakagwa ho hasi ku wulawa ku golofa ye kadatu. Wakamutondola yakondya kufwa. 10Pawulo yakatima, yakenama, yakamukumbatila yuyo muzelelo mono yali yafwa, yakatya, “Mulece kugazika, hambi wumi wakwe nha wukali muli mwene.” 11Yakabita kucanyha kanyhi kugolofa, yakawubegula mukate, yakalya, yakajendelela kuganula muno, sunga wukela, ho yakatuluka. 12Wawalya wanhu wakamutegula ku kaya yakondya kuwa mumi yuyulya u muzelelo, nawo wakasinyhimikwa muno. 13Ase cikatulucila mu ngalawa, cikalongolela kubita ku Aso, kono casakaga ko cimusole Pawulo. Hambi nha vyo yali yawikanize, yasaka kufika kuko kwa magulu ko kukolela mu yisi nghavu. 14Holeka yakacagana kuko ku Aso, cikamwinjiza mu ngalawa, cikazana nayo ku Mitilene. 15Na ku wulawa kuko, cikajenda sunga imitondo yaco cikafika ku Kiyo. Ne lizuwa lye kejete cikafika Samo, ne mitondo yaco kanyhi cikafika Mileto. 16Hambi Pawulo nha yali yatemizye kujendelela no muhinzo mu ngalawa, no kupulutiza Efeso, ho yalece kucela ku Asiya. Hambi nha yasunhaga ho yawe ku Yelusalemi mwizuwa lye Pentekote hono yisumice. 17Na Pawulo lono yali yali ha Mileto, yakatuma wanhu ku Efeso, yakawacema wanyamhala we Likanisa, ho wetang'anile nayo. 18Nawo waza kuza kwakwe, yakawatya, “Anye mo weneco mumanyile, vyono kulawa lizuwa lilongozi lono nakanyajila baha Asiya, nha vyono nali ninha kono kwenyu nhondo zose, 19nghumwitumamila Muwaha ko winenenyhezi wose, ne mahozi, ne magazo gono ganyagana so wungwele we Wayahudi, 20mumanyile vyono sinaleka hamba hadodo kumuganulilenyi cagalanze na mu zinyumba zenyu, no kumwijizenyi yo yose yono yomukwilenyi. 21Nawahomelela wose, Wayahudi hamonga ne wanhu wono si Wayahudi, ho wamupitucile Mulungu no kumwihuwila Muwaha wetu Yesu. 22Alu hulicizenyi! Ane vyono nghumuhulika u Muhe, holeka alu nghubita ku Yelusalemi, nhunyice mu nhumbula, nane si manyile zono zonyagana kuko. 23Ninga yono manyile du yoyi, vyono u Muhe Mono Yelile yakundajila mu makaya gose, yakutya, wuwopwe no wutamiswe vikunindila. 24Ninga ane si nghuganiciza wumi wangu nha cinji cikamu kuli'ne, si nho wukondeleze wo muhinzo wangu, no witumami wono nabocela kuli Muwaha Yesu, kuluhomelela u Luganuzi Luswanu lwe lihewa lyo Mulungu. 25“Sunga na lulu, ane manyile vyono nyenye wose, mono nakola ako na ako mono mwenyu, nghuganula zo wutemi wo Mulungu. Si molombona wusu wangu kanyhi. 26Holeka nghumuhomelelenyi nyenye wose zuwali, vyono hono yunji yaze yajilile muli nyenye, ane sina wuhoswe wo wose. 27Hambi nha sinaleka kumuganulilenyi nghani zose zo Mulungu. 28Mwikamisaje mo weneco, mulikamisaje na lilyo i litewa lyose, lyono u Muhe Mono Yelile yamuwicenyi anye ho mulidime. Mulidimaje ilikanisa lyo Mulungu, lyono yaligula ne sakami yo Mwanagwe. 29Manyile vyono ane kolo neza kuwuka, imaminzi makali golomwinjililenyi, si gololileka litewa. 30Na muli nyenye mo weneco, wolokwinuka wanhu wono wolonga zinghani zo wulambi ho wawajilize wanhu, ho wawatyatye weneco du. 31Holeka mwikalaje meso, mweze kumbucila vyono, mu myaka midatu cilo na misi, si nadilaga kumulanjizenyi wose ne mahozi. 32“Alu nghumuwicenyi mu wukamiswe wo Mulungu, na kuli nghani ye lihewa lyakwe, yono yidahile kumusikamyenyi, no kumupelenyi wuhazi wono yawawiciye wanhu wakwe. 33Ane hamba kamonga, si nasulumila mapesa, hamba zahabu, hamba vivwalo vya munhu. 34Mo weneco mumanyile, vyono netuma milimo kwe miwoko yangu no mweneco, ho nitujile visakwa vyangu, na vya awalya wono cali cina nawo. 35Muli zose, namupelenyi nzila yo kwiga, kotya, mu wituma nhavivi ko wuhidimbazi, yicinojele ciwataze wono wasina vilungo, no kukumbucila, zinghani zo Muwaha Yesu zono yatya mweneco, ‘Ciba kulavya, ko yili nyemo, si nho kupegwa.’ ” 36Yaza kokondya kulonga zizi, Pawulo yakafugama, yakalomba hamonga na wose. 37Wose wakalila muno, wakamukumbatila Pawulo mu singo, wakamunonela. 38I nghani yono yawakalaza muno, yali yo nghani yono Pawulo yatya, vyono, siwolomuwona kanyhi. Wakamusindiciza sunga wakamufisa ko ku ngalawa.

will be added

X\