WATUMWA 2

1Lizuwa lye Pentekote lyaza fika, wono wali wehuwiye, wali wekongholeye wose hamonga. 2Hobaho kukaza nhinicizo cihumbi cikulawa ku wulanga nha ca mbeho mbaha yikukukunza, cikamema mu nyumba yose mono wali wekaye. 3Hobaho zikawalawila zinimi, zikegawa nha malambi go moto ako na ako, zikawatimila yumonga yumonga. 4Wose wakamemywa Muhe Mono Yelile, wakanza kulonga milonjele hayo hayo, nha vyono Muhe yawapela vilungo mu wulonje. 5Ale, ku Yelusalemi ko wali wekaye Wayahudi, wanhu wogopa Mulungu, wa mu zinghungugo zose ze wanhu wa kononze. 6Cihumbi cico caza kuhulikwa, ne lipuga liwaha lye wanhu wakekonghola, likawa kwizina muno, vyono wanhu wose wawahulika wawo wakulonga mu milonjele yawo. 7Wakatinuka wose, wakezina, wakutya, “Ati, wawa wose wono wakulonga si Wagalilaya? 8Alu yiwa wule, ase cikuwahulika wose wakulonga, munhu ne milonjele ya cinyo kwetu kono calelelwa? 9Muli'se, wanji Wapaliti na Wamedi na Welamiti, na wanji wanya ku Mesopotamiya, ku Wuyahudi, na Kapadokiya, Ponto, na Asiya, 10ku Felugiya na Pamufuliya, ku Misili na ku mbavu za Libiya behi na Kilene; wanji muli 'se wajenzi wakulawa ku Lumi, 11Wayahudi, ne wanhu wono si Wayahudi wono wapituciye mu dini ye Ciyahudi, wanji walawa ku Kilete na ku Alabiya. Ase wose cikuwahulika wawa, wakulonga mu nonga zetu co weneco, ze metumo mawaha go Mulungu.” 12Wose wakezina no kugazika akuno wakwiwuza, “Alu nye, cici co cici?” 13Ninga wanji wakazwajiza wakatya, “Nye, wanhu awa wagalile divayi mhya.” 14Ninga Petelo, yakema hamonga ne wayagwe we likumi na monga, yakenula lizi lyakwe muno muno, yakawa kwanza kuwaganulila wanhu yakutya, “Nye wandugu zangu Wayahudi, nanye wose mono mwikaye mu Yelusalemi, muhulicize zono nghulonga. 15Wanhu awa nha si wagalile vyono mukuganiciza nyenye, hambi alu nha yikali saa tatu du ya hakali mitondo? 16I mbeka, wo wutya nghani ayi, yo nghani ayilya yono yalongwa no muwizi Yoweli yono yatya, 17‘Ku vilo vye ndumilizo vyo yolowa, yakutya Mulungu, nolowetila iwanhu wose Muhe wangu. Ne wana wenyu, we cilume na we cicekulu woloziganula izinghani zangu, ne wazelelo wenyu, wolowona wugubulilwe, Ne wakombi wenyu, wololota zindoto. 18Heya, sunga ne wetumami wangu we cilume na we cicekulu, nolowetila zo Muhe wangu mu vilo vivyo, nawo woloyiganula inghani yangu. 19Kanyhi nololajila imezino ku wulanga kucanyha, ne vitanjilo kono'nze hono hasi, kolowa na sakami, no moto ne nghungulyosi yizito. 20Lizuwa lyolopituswa liwe citi, no mwezi wolopituswa wuwe sakami, lono lyowa likali si naza ilizuwa lyo Muwaha, lizuwa liwaha litambule, 21Baho, muli wose mono kololomba mwitagwa lyo Muwaha yo kolopona.’ 22“Nye mo wa Isilayeli, muhulicize zinghani zizi! Yesu wa Nazaleti, munhu mono yahomelelwa no Mulungu kwenyu, mu metumo mawaha ne mezino, ne vitanjilo, vyono Mulungu yavinozeza muli mwene hali nyenye, vyono mumanyile mo weneco, 23na mu wutemezwe no wumanye we katali wo Mulungu, yali yakondya kudumula nghani, vyono Yesu kowikwa mu miwoko yenyu, nanye mukamuwulaga mu nzila yo kuwalecela iwanhu wabi, wamutumbice mu musalaba 24Ninga u Mulungu yamuzukula, yakamuponya mu wusungu we lifwa, ku soko si yali yisumice hamba hadodo lifwa limwibate. 25Hambi Dawudi nha yakulonga zo mwene nhavi, ‘Namuwonaga Muwaha ha mwande yangu nhondo zose, hambi nha yali hamonga nane ku lubavu lwangu lo kulume, holeka sinosinjisika. 26Ku soko yiyo nhumbula yangu yikasecelela, nane nghatowa lucenze lo wusangalale. No muwili wangu wokwikala mu witumbilo, 27Hambi nha si koyileka inhumbula yangu mu yisi ye wafu, hamba si komukombola Mono Yelile wako yawolele mu citenjelo. 28Wangubulila zinzila zo wumi, wuwe wako, wo kuwa wuli baho, wukumhela nyemo!’ 29“Nye wandugu zangu, nyendile kumulonjelenyi cagalanze, zo kuku yetu Dawudi. U mwene yafwa, yakazikwa, ne citenjelo cakwe cili baha hono hetu sunga nalu. 30Ninga Dawudi vyono yali muwizi, yali yamanyile vyono u Mulungu yamwilahila ko wilahe, vyono mu lulelo lwakwe, kolomwikaza yunji mwigoda lyakwe; 31mwene Dawudi vyono yamula kumanya zizo, holeka yawulonga wuzuce wakwe Kilisito, lono yatya, ‘Inhumbula yakwe si yalekwa mu yisi ye wafu, hamba u muwili wakwe si wawolela mu citenjelo.’ 32Yuyo Yesu, Mulungu yamuzukula, nase wose cili wahomelezi we nghani yiyo. 33Yesu yawuya kucanyha, sunga ku lubavu lo kulume lo Mulungu, yakabocela kuli Sogwe cicilya cipegwa cono yehuwiza, co Muhe Mono Yelile; holeka azi zono mukuwona alu, no kuhulika, wo wumwajilwe wa yuyo Muhe. 34Hambi Dawudi mweneco, nha si yabita sunga ku wulanga, ninga umwene yakutya: ‘U Muwaha yamutya Muwaha wangu, Wikale ku lubavu lwangu lo kulume, 35Sunga niwawice walugu wako wawe nha cibawo co wukanyago we magulu gako.’ 36“Ne mhuga yose ya Isilayeli yiwanojeye wamanye manyi manyi, nha vyono, u Mulungu yamunoza yuyo, kuwa yo Muwaha kanyhi yo Kilisito, yuyo Yesu mono mwamutumbika nyenye.” 37Iwanhu waza hulika zizi, wakahomeka mu nhumbula zawo, wakamutya Petelo ne watumwa wayagwe, wakatya, “Alo citende wule wandugu zetu.” 38Petelo yakawatya, “Nenenyi no kubaputizwa wose, mwitagwa lya Yesu Kilisito, ho mutuje wunenelwe wo wubi wenyu; no kubocela acilya icipegwa co Muhe Mono Yelile. 39Hambi wihuwizo wuwo nha wehuwizwa ku soko yenyu, na ku soko ye wana wenyu, na ku soko ya wose wono wali kutali, na kusoko ya wo wose walya wono Muwaha Mulungu kowacemela kwakwe.” 40Petelo yakawahomelela kwa nghani zinji nyinji; yakawakangaziza no kuwakong'onheza iwanhu yakutya, “Mwiponye mu lulelo lulu ulubi.” 41Wenji mwizuwa lilyo, wakayibocela nghani yakwe, no kubaputizwa. Wakonjelezeka wanhu nha elufu yidatu wono wehuwila. 42Na wawa wose wakajendelela kwiyijiza kulawa kuli watumwa imikalile ye cindugu, mu wubegule wo mukate ne malombo. 43Mapoto menji ne vitanjilo vinji vikanozwa ne watumwa, sunga wanhu wose wakenjilwa no woga. 44Na wose wono wali wehuwila wakajendelela kuwa cinhu cimonga, wakawa wahanjiye vyose; 45wakaguza sawo zawo, ne vitumbilwa vyawo, wakawa kugawana zipesa wose, munhu nha vyono yasakaga. 46Nawo wakajendelela kwitang'anila mu Nyumba yo Mulungu no wuhile wumonga vilo vyose. Langa mwi'daha lyo wubegule wo mukate, wetang'anililaga mu zinyumba zawo, no kuhanga wose ndigwa yiyo ne nyemo na nhumbula nzelu, 47wakumulumba Mulungu, wakendwa ne wanhu wose. U Muwaha yakawa kuwonjelezeza nhondo zose iwanhu wono yawaponyaga.

will be added

X\