WATUMWA 19

1Kukawa lono Apolo yali ku Kolinto, Pawulo yaza kukola ku zisi za kusumuka, yakafika ku Efeso, na kuko yakawagana wejizwa wanji. 2Yakawawuza, yakatya, “Wulenyi, mwamubocela u Muhe Mono Yelile lono mwehuwilila?” Nawo wakamupitula, wakatya, “Ng'o, cikali nahulika hamba nhavi vyono yali baho Muhe Mono Yelile.” 3Nayo yakawatya, “Alu mwabaputizizwa mu wubaputizo wa hayi?” Wakatya, “Ku wubaputizo wa Yohana.” 4Nayo Pawulo yakatya, “U wubaputizo wa Yohana, walajilaga du vyono wanhu wanena. Yohana yawalonjelaga wanhu vyono wamwihuwile mono yakuza mu nyuma yakwe, yo mwene Yesu.” 5Waza hulika zizo, wakabaputizizwa mwitagwa lyo Muwaha Yesu. 6Hobaho Pawulo yakawawicila miwoko, no Muhe Mono Yelile yakawatimila, wakanza kulonga milonjele yinji yinji, no kuyiganula inghani yo Mulungu. 7Nawo hamonga wali wanhu yikumi na wejete. 8Pawulo yenjilaga mu nhang'anilo yo wuhembelo mwidaha lya myezi midatu, yakawa kuwalonjela no kuwakwejela ku nghani yo wutemi wo Mulungu. 9Ninga wanji wali wakamu, kanyhi wali wali cibede, wakalema kwihuwila, wakawa kwanza kuyilonga vibi cagalanze i nzila yo Muwaha. Baho Pawulo yakawawucila, yakawatemanula iwejizwa wakwe, nayo yakawa kuduwana nawo nhondo zose, mu nyumba yo wusomelo wa Tulano. 10Yakajendelela kunoza nhavivyo, sunga yidaha lya myaka myejete, sunga wose wekala Asiya, Wayahudi ne wanhu wono si Wayahudi, wakayihulika nghani yo Muwaha. 11U Mulungu yanoza mapoto ga wizine kwe miwoko ya Pawulo. 12Iwanhu wasolaga vitambala, ne myenda yinji ye milimo yono Pawulo yetumamilaga, wakawategulila watamwa, nawo watamwa wakaponywa zinhamwa zawo, na wono wali wena macisi mavu, gakalawa. 13Ninga Wayahudi wanji walavya macisi, wajendajendaga ako na ako, wakujela kulitumamila i litagwa lyo Muwaha Yesu kuli walya wono wali wena macisi mavu. Wakawa kutya, “Nghumulajilizenyi mwi'tagwa lya Yesu mono Pawulo yakumuganula.” 14Ale, iwana mupunghati wa Sikewa, u Mukohani Muwaha we Ciyahudi, wali wo wamonga na wawo wono wanozaga nhavivyo. 15Ninga ilicisi lyavu likawapitula likatya, “Yesu nimumanyile, na Pawulo nayo nimumanyile nhavivyo, ninga lu nyenye wa nani?” 16U munhu mono yali ne licisi lyavu, yakawazumhila, yakawasumiza vilungo, nawo wawo wana wa Sikewa wakatiza mu nyumba yiyo, akuno wali cipwi, wena ne mazeya. 17Inghani yiyo yikamanyika kuli wose wono wali wekaye ku Efeso, i Wayahudi na kuli wono si Wayahudi. Wose wakenjilwa no woga, wakalikumya litagwa lyo Muwaha Yesu. 18Na wenji wono wehuwila wakaza, wakavumila cagalanze ze metumo gawo gono wetumaga. 19Na wanji wono wetumaga i makani ge cihawihawi ha mwamulizo, wakavikonghola vitabu vyawo, wakavinyanya mu moto hamwande ya wose. Wakaganiciza wuguzi we vitabu vivyo, wakawona vyowa nha silinje elufu makumi mahano. 20Na nhavivi, inghani yo Muwaha yikacila kutandala, no kuwiluka kwa vilungo muno. 21Zizi zaza kuwa zamalika, Pawulo yakatemya mu nhumbula, yabite ku Yelusalemi yalaza kuwa yakolela ku Makedoniya na Akaya, yakutya, “Nilaza kukondya kuko, cinojele mbite nghayiwone ne Lumi nhavivyo.” 22Yakawa kuwatuma wa Timoteyo na Elasito, iwetumami wakwe, wamulongolele ku Makedoniya, ninga u mwene yakekala ku Asiya cidaha. 23Mu cidaha cico, ho gejelela imawuma mawaha kuko ku Efeso, ku soko ye Nzila yiyi yo Muwaha. 24Kwali na mutyana Pesa yunji ilitagwa lyakwe yacemwaga Demeteliyo, mono yali yena mulimo wo kunoza sanamu za mu nyumba yo mulungu we cicekulu, mono kacemwaga Alitemi. No mulimo wuwo, wamutujilaga Demeteliyo hamonga ne wetumami wakwe, cambuzi ciwaha. 25Demeteliyo yakawakonghola wawo iwetumami, hamonga na wanji wono wetumaga mulimo nha wuwo, yakawatya, “Nye wayangu, mumanyile nha vyono mu mulimo wuwu mo mozili sawo zetu. 26Alu mosuma kuhulika no kwiwonelela moweneco zono Pawulo yakwituma, si baha du hono Efeso, langa sunga na mu Asiya yose nhavivyo. Mwene yawakwega wanhu no kuwapitula, sunga walumba vyono, milungu yiyo yono minozwe ne wanhu, si milungu hamba hadodo. 27Holeka hoyili mbali, hambi uwukwawi wetu wuwu, nha si woleka kuwa ne 'tagwa yibi. Hamba si nhavivyo du, ninga nghani yiyi yosuma kuyinoza sunga ne nyumba yo wuhembelo ya Alitemi kuwa nha cinhu cono cisina nhunizo yo yose. Hanyuma ne lilumbo lyakwe yuyo mono Asiya, sunga ne yinze yose wakumuhemba, lyoduma.” 28Waza kuhulika zizo, wakakolwa ne 'kuwo, wakawa kwanza kuzoza. Wakutya, “Yo muwaha Alitemi wa Efeso.” 29Likaya lyose likamema sasamo yiyo. Wakawebata wa Gayo na Alisitaliko, wanya Makedoniya, wono wajendanaga na Pawulo, wakamangha nawo sunga ko ku nyumba yo mwidawalo. 30Nayo Pawulo yasakaga kwiyinjiza mu winji we wanhu, ninga iwejizwa wakamwimila. 31Iwawaha wanji wa mu yisi yiyo ya Asiya, wono wali wendece wakwe, wamutumila nghani wakumulomba, yalece kwiyinjiza mu mbali, so wubita ku nyumba yo mwidawalo. 32Na mu cipango cico wanhu walongaga munhu na zakwe, wanji nhavi na wanji nhavi, sunga ne wanhu wakasagahala. Sunga na wanji wenji, si wamanya soko yo wikonghole wawo. 33Vyono Wayahudi wamunoza Alekizanda yeme hamwande, wanji wa mwipuga lye wanhu wakatya mba yo mweneco mono yena u wulajilize. Alekizanda, yakawenulila muwoko, yahilaga kwitetela kuli wanhu. 34Ninga waza manya vyono mwene Muyahudi, wose wakazozeza hamonga, wakutya, “Yo muwaha Alitemi wa Efeso!” Wakajendelela-kuzoza zoza nhavivyo, kwa cipango ca saa nyejete. 35Hanyuma kalani we likaya yakasuma kuwanyamaza wanhu, yakawatya, “Nye wayangu wanya Efeso, munhu wo wose yamanyile vyono likaya lili lya Efeso yo mukamise nyumba yo mulungu Alitemi, kanyhi ne cihwani cono cagwa kulawa ku wulanga. 36Hasina mono kosuma kuzibeza zizi. Holeka mutulane mulece kunoza cinji co cose musunho. 37Muwaleta iwanhu wawa bahano, na kuno si wayitovuye nyumba yo mulungu, hamba si wamulijile mulungu wetu we cicekulu. 38Holeka, hono Demeteliyo ne wetumami wakwe wena nghani muli wanhu wawa, mahakama gali baho, ne wawaha we yisi, holeka wosuma kwisitaka kuko. 39Na hono hawe ho zili zinji, ale muzitegule ha wulamuzi wono wunojeye. 40Ku soko cali cisume kusonjezwa ku so wuma we zuwali, kusoko vyono cisina soko hamba ndodo muli wene, hamba si cosuma kupitula nghani yono yokwila mu wuma wuwu.” 41Yaza kukondya kulonga zizi, hodu yakawiyagaza mukung'ano.

will be added

X\