WATUMWA 17

1Ale, wa Pawulo na Sila, waza kola ku Amufipoli na Apoloniya, wakafika ku Tesalonike, kono kwali na nhang'anilo yo wuhembelo ye Wayahudi. 2Nayo Pawulo nha vyono yali yazoweye, yakenjila mu nghang'anilo yo wuhembelo yakuwasimuliziza za mu Mandiko Gono Gelile mu Sabato yidatu. 3Yakalolosa no kulajila vyono yali yimunojeye Kilisito yatamiswe, no kuzuka kanyhi muli wafu. Yakawatya “Yesu yuyo mono nghumuganulilenyi, yo mwene Kilisito.” 4Wanji wayawo wakehuwila wakelumbaniza na Pawulo na Sila. Sunga ne mhuga mbaha ye Wagiliki wono wamogopago Mulungu, na we cicekulu we lilumbo, si wacefu. 5Ninga Wayahudi waza wona vyono wanhu wenji wakumwihuwila Pawulo, wakawona wivu, wakakonghola cipuga ce wanhu we cakacaka kulawa mu sokoni, no kuleta mazozo mawaha mwi'kaya. Wakekongholela ha kaya ya Yasoni, wehwesaga wowagana wa Pawulo na Sila mumo, ho wawalete hamwande ye wanhu. 6Ninga si wawatuga, holeka wakamukwejenha Yasoni, hamonga na we zindugu wanji, sunga hali wawaha we likaya, akuno wakuzoza wakutya, “Awa wanhu wono wayipituye yinze, naluno waza sunga na bahano.” 7Nayo Yasoni kawenjiza mu kaya yakwe. Nawo wose, wakwituma vyono si vinojeye mu malajilizo ga Kayisali, wakutya ti, “Ko yuli mutemi yunji mono yakucemwa Yesu.” 8Na muli zinghani zizi, iwawaha wa mwi'kaya, ne mhuga ye wanhu, wakenjilwa ne mahwele. 9Nawo waza kuwalifya wa Yasoni ne wayagwe, ho wakawa kuwaleka wabite. 10Na mu cilo cico, we zindugu wakawaswaswaniza wa Pawulo na Sila wabite ku Beloya. Nawo waza fika kuko, wakenjila mu nhang'anilo yo wuhembelo ye Wayahudi. 11Wanhu wa kuko wali waswanu muno, wacizize awalya wa ku Tesalonike. Wayibocela nghani na nhumbula yono yina nyhilu mbaha, wakalondolalondola nhondo zose mu Mandiko Gono Gelile, ho wawone zono wazilongaga wa Pawulo na Sila hono zali za mbeka. 12Wenji wa muli wene wakehuwila, sunga na muli we cicekulu we Cigiliki we lilumbo, ne walume nhavivyo. 13Ninga Wayahudi wa ku Tesalonike, waza hulika nha vyono inghani yo Mulungu yikuganulwa na Pawulo na kuko Beloya, wakaza na kuko, wakawasagahaza wanhu no kuleta mazozo. 14Nawo we zindugu wakamusindiciza Pawulo mbela mbela, yabite sunga ko kwilenga, ninga Sila na Timoteyo, wakekala ku Beloya. 15Nawo we zindugu wono wamusindicizaga Pawulo, wakamufisa sunga ku Atene. Hanyuma wakawa kuwuya, hamonga ne malajilizo gono galawa kuli Pawulo, vyono wa Sila na Timoteyo wamutyatyaje mbela mbela. 16Nayo Pawulo lono yawalindilizaga wa Sila na Timoteyo kuko ku Atene, yakakalala muno mu nhumbula yakwe, yaza wona vyono likaya lilyo limemile vihwanicizo vye milungu. 17Holeka yakawaloloseza mu nhang'anilo yo wuhembelo Iwayahudi, ne wanhu wanji wono wali wamogopilo Mulungu, na nhondo zose kanyhi, yekalaga yakuwaloloseza wanhu mu sokoni, hamonga ne wanhu wo wose wono vyetang'anilaga nayo. 18Na wanji wono wali webate mejizo ge Waepikuliyo ne Wasitoyiko, wakewanganila nayo. Wanji wakatya “Alu yakusaka kulonga cici yuyu Cilomo?” Na vyono Pawulo yaganulaga za Yesu na zo wuzuce, wanji wakatya, “Yikwijela kotya mono yakuganula ze milungu mijenzi.” 19Holeka wakamusola Pawulo, wakamutegula sunga ku Aleyopago, wakutya, “Cikusaka nase ta, ciyimanye inghani yiyi yimhya, yono wali kuyilonga. 20Vinhu vinji vyono cihulice co weneco ne makutu getu, vikijela nha vinhu vijenzi kuli'se. Holeka cendile kumanya inhunizo ya zizi.” 21Iwa Atene wose wajenzi wono wali wali kuko, si waduwilaga nghani yinji, langa kulonga lunji kuhulika nghani mhya mhya. 22Pawulo yakema ha mwande ye libalaza lya Aleyopago, yakatya “Anye wanya Atene! Muli zose, nghumuwonenyi nha muli wanhu mono mwendile muno wuhembi. 23Ku soko, lono nali kukola ako na ako, nghulanga vihwani vyo wuhembelo wenyu, niwa kuwona wuhembelo wunji wono wina mandiko aga, ‘Kuli mulungu yulya mono si yamanyice.’ Ale, yuyo mono mumuhembaga si mumumanyile, yo yuyo yo nghumulonjelenyi anye. 24U Mulungu mono yawumba yinze, na vyose vyono vili mumo, yo Muwaha wo wulanga ne yinze, si kekalaga mu nyumba zo Mulungu zono zinozwaga ne miwoko ye wanhu. 25Hamba si ketumamilwaga ne miwoko ye wanhu, yawe nha yanjiye cinji, hambi mwene nha kawapelaga wose wumi, no wehele, na vyose. 26Mu wulawilila mo munhu yumonga, mo yanozeza imakungugo gose ge wanhu, gekale kono'nze kose. Lono yali yakondya kuwawicila mapango gono yali yalamuye na katali muno, vyono hayi na nili, hono makungugo gago gokwikala. 27Nayo yanoza nhavivyo, imakungugo gago ho wamulondole Mulungu, na lunji walabate walabate sunga wasume kumuficila. Ninga hamba nhavivyo, u Mulungu nha si yali kutali nase wose. 28Nha vyono yalonga yunji yakatya, ‘Hambi muli mwene nha mo cikaliye womi, mo cikujendela, na mo ciweleye.’ Nha vyono wanji wayenyu wemba Mashayili wakutya, ‘Hambi na sese nha cili wanagwe.’ 29“Ale, holeka hono ase cili wana wo Mulungu, si yicinojeye kumuganiciza u Mulungu nha cihwanicizo ca Zahabu, lunji Pesa, lunji yibwe lyono lisesigwe no kutajilwa wihambo ne wanhu. 30Imyaka lono iwanhu wali wakali walele u Mulungu yakenoza kotya nha siyakuwona. Ninga alu yakuwalajiliza wanhu wose kono walila, wanene, wayilece imikalile yawo mibi. 31Hambi nha yakondya kuwika lizuwa lyono koloyiling'aniza yinze mu ling'ani, mu nzila ya muli munhu yumonga mono yamuhagula. No Mulungu yawapela wanhu wose wuhomelezi we nghani yiyi, ko kumuzukula munhu yuyo mu wafu!” 32Waza muhulika Pawulo yakulonga ze nghani yo wuzuce we wafu, wanji wakamuseka, ninga wanji wakatya, “Cikwenda kukuhuliciza kanyhi mu nghani yiyi.” 33Hodu nayo Pawulo yakawaleka, yakawuka muli wene. 34Ninga wanhu wanji wakelunza nayo, wakehuwila. Muli wawo, mukawa na Diyonesiyo wa Aleyopago no mucekulu litagwa lyakwe Damalisi, wali wena na wanji wayawo.

will be added

X\