WATUMWA 16

1Pawulo yakafika ku Delibe, na ku Lusitela, kono yekalaga mwijizwa yunji litagwa lyakwe Timoteyo, u nyina yali Muyahudi, nayo nhavivyo yakawa mwijizwa. Ninga u sogwe yali Mugiliki. 2Nayo Timoteyo yakawa ne lilumbo yiwaha muli we zindugu wa kuko ku Lusitela na Ikoniyo. 3Pawulo yakamusaka Timoteyo wajendane nayo, holeka yakamutegula ku calamo. Yanoza nhavivyo, vyono Wayahudi wose wono wekalaga mbavu zizo, wali wamanyile vyono sogwe wa Timoteyo yali Mugiliki. 4Na lono wakolaga mu makaya gago, wakawapela malajilizo gono galajilizwa ne watumwa, ne wanyamhala wa ku Yelusalemi, wagakamise. 5Ne Makanisa gago gakacila kuwa ne vilungo mu wihuwilo, ne liwalo lya wono wehuwilaga, likacila konjelezeka nhondo zose. 6Wakakolela mu zisi za Felugiya na Galatiya, ninga wakalemezwa no Muhe Mono Yelile, walece kuyiganula nghani mu zisi za Asiya. 7Nawo waza kufika mu mipaka ya Musiya, wakajela kubita ku Bituniya, ninga Muhe wa Yesu si yawakombola ho wabite. 8Holeka wakakolela Musiya wakabita sunga ko ku Tulowa. 9Mu cilo cico, Pawulo yawona wugubulilwe, nha kotya yakamuwona munhu wa Makedoniya yemile, yakumunena, yakutya, “Wulowoce wuze Makedoniya wucitaze.” 10Pawulo yaza kuwuwona wugubulilwe wuwo, cikewikaniza ho cibite mbela ku Makedoniya, cikehuwila vyono u Mulungu yacicemile ciwaganulile u Luganuzi Luswanu. 11Caza kuwuka ku Tulowa, cikajendela mu ngalawa sunga Samotelake, ne mitondo yaco, ku Neyapoli. 12Caza lawa kuko, cikabita sunga ku Filipi, likaya liwaha lya mu yisi ya Makedoniya, nalyo lyali mu wutemi we Cilumi. Cikekala kuko mwi'kaya lilyo vilo vikatelatela. 13Mwi'zuwa lye Sabato, cikalawila mwi'lango lya kudeha, sunga ku nyenje ye likolongo, kono caganicizaga mba, ho hanhu ho kuhembela, hono i Iwayahudi wehangulizaga. Cikekala cikaduwana ne wacekulu wono wekonghola baho. 14Mucekulu yunji wa muli wawo wono wacihulicizaga, litagwa lyakwe Ludiya, mono yamogopago Mulungu, wa mwi'kaya lya Tuwatila, mono yaguzaga myenda ye bafuta, ye liwala lyo lugandu. U Muwaha yayidigula inhumbula yakwe, yakazibocela zinghani zono Pawulo yazilongaga. 15Nayo yaza kubaputizwa, u mwene na wa mu nyumba yakwe wose, yakacinena yakutya, “Hono yiwe mbeka mwawona vyono nane nimwihuwiye Muwaha, ale mwinjile mu kaya yangu.” Yakacinena cibite. 16Mwizuwa linji, lono cabitaga bahalya ha wuhembelo, ciketang'anila na muhinza yunji, mono yali yena licisi lyavu, lyono lyamupelaga wusume wo kuwila. U muhinza yuyo, yawatujilaga watwawe mapesa menji so wuwile wakwe. 17Hodu, muhinza yuyo, yakawa kumutyatya Pawulo na sese, akuno yakuzoza, yakutya, “Wanhu awa wo wetumami wo Mulungu Mono yalawiliciye Muli vyose, wono wakumuganulilenyi nzila ye mhonelo.” 18Yakawa yakunoza nhavivi mu vilo vinji. Sunga mwizuwa linji, Pawulo yakakalala muno, yakamupitucila no kulitya licisi, “Nghukulonjela, mwi'tagwa lya Yesu Kilisito, wuwuce muli yuyo.” Nalyo licisi likawa kuwuka lwa kamonga. 19Nawo watwawe waza wona vyono witumbilo wawo wo kutujila zisawo wamalika, wakawebata wa Pawulo na Sila, wakawakwega ciwonelela sunga hamwande ye wawaha. 20Wakawasitaka kuli wahakimu, wakutya, “Wanhu awa vyono Wayahudi, wakuleta wutilibule mwi'kaya lyetu. 21Wakwijiza myoto yono ase co Walumi, si cosuma kuyibocela, hamba kwituma.” 22Ne lipuga lye wanhu wakelunza nawo, no kuwatowanga. Nawo wawalya iwahakimu, wakayidemulanga i myenda ya Pawulo na Sila, wakalajiliza wawakune viboko. 23Waza kondya kuwakunanga muno ne viboko, wakawatajila mu jela, wakamulajiliza u musilikale mukamise jela, yawalanjilile muno. 24Nayo musilikale yaza kupegwa wulajilize wuwo, yakawatajila mu jela ya kugati muno muno, no kuyiwopa imigulu yawo mwi'sumbili. 25Ninga mu cilo mugati, Pawulo na Sila walombaga no kumwimbila u Mulungu nyimbo, zo kumukumya Mulungu, kuno wafungwa wayawo wawahulicize. 26Ho baho likaza yitulo yiwaha, sunga ne majinji ge jela, gakasinjisika, na lulo baho, i milango yose yikadiguka, ne viwopelo vya wose vikawopoka. 27No musilikale mukamise jela yaza kusinhuka mu nhongo, nayo yaza kuyiwona imilango ye jela yidiguce, yakehwesa vyono wafungwa wose watiza. Hobaho yakawukwega mumaje wakwe, yakasaka kwiwulaga. 28Ninga Pawulo yakacema kwe lizi yiwaha yakutya, “Wulece kwitamisa go mweneco, hambi ase nha cili baha wose.” 29Yaza kumucema yunji ho yalete tala, u mwene u musilikale mulindilize jela yakamanyhila kugati, yakagwa ha magulu ga Pawulo na Sila akuno yakucicima so woga. 30Yakawaleta kunze, yakatya “Nye wawaha, alo nhende wule ho mhone?” 31Nawo wakamutya, “Wumwihuwile u Muwaha Yesu, nagwe kowa wapona, na wa mu nyumba yako.” 32Wakamulonjela inghani yo Muwaha, na wose wono wali mu nyumba yakwe. 33Nayo musilikale, yakawasola mwidaha lilyo ne cilo, yakawahovuga madali, hanyuma u mwene na wa mu nyumba yakwe lulo baho wose wakabaputizwa. 34Hanyuma yakawasola wa Pawulo na Sila, yakawategula ku nyumba yakwe, yakawatenjela zindigwa. Nayo mwene na wa mu nyumba yakwe wose, wakasangalala muno, vyono alu, wali wamwihuwila Mulungu. 35Waza kwela, iwahakimu wakawatuma wawalya iwawaha we wasilikale, wakutya, “Muwawopolele wanhu walya.” 36U musilikale mulindilize jela, yakamusimuliziza Pawulo zinghani zizi, yakutya, “Iwahakimu watumwa, wakutya muwopolelwe. Holeka mulawile mubite mupolile.” 37Ninga Pawulo yakatya, “Ati wukutya cici? Ase cali cisina yisutya, ninga wacikuna viboko hamwande ye wanhu cikali naling'anizwa na kumbe ase cili wanhu we Cilumi. Kanyhi wacitajila mu jela, alu kanyhi wakusaka kucilavyaniza mu jela cinyele hongo? Si yosumika hamba hadodo. Yiwanojeye waze weneco bahano, wo wacilavye kunze.” 38Iwawaha we wasilikale nawo wakawasimuliziza iwahakimu izinghani zizi. Nawo waza kuhulika vyono Pawulo na Sila, walumi, wakogopa. 39Wakaza wakawalomba wawanenele, nawo waza kuwalavyaniza kunze, wakawanena wawuce mwi'kaya lilyo. 40Pawulo na Sila, wakawa kulawila mu jela wakabita ku kaya kwa Ludiya. Nawo waza wawona we zindugu, wakawasindamika, wakawa kutuluka.

will be added

X\