3 YOHANA 1

1Ane no munyamhala, nghukwandicila agwe Gayo, u mwendece wangu, mono nghwendeye mu mbeka. 2Go mwendece, nghulomba wumote muli zose, kanyhi nghulomba weze wuli muswanu telele mu muwili, nha vyono winha mu nhumbula. 3Hambi nha nasecelela muno lono we zindugu wanji waziza baha, wakanonjela zo wihuwilwa wako wa mu mbeka, nha vyono agwe wukujendela mu mbeka nhondo zose. 4Hasina cinji cono cikusangalaza muno, si nho kuhulika vyono i wanangu wakujendela mu mbeka. 5Go mwendece wangu, agwe nhondo zose kuwezaga wuli mwihuwilwa lono wukuwetumamila wandugu, hamba wawe wajenzi. 6We zindugu wawo, waliloloseza likanisa lya bahano zo wendo wako. Alu nghukulomba, wuwatazaje ho wajendelele no muhinzo wawo, mu nzila yono yomwendeza u Mulungu. 7Hambi nha wakwanziza u muhinzo wawo mu witumami wa Kilisito, hamba si wobecela wutazi wo wose kulawa kuli wanhu wono si wehuwiye. 8Holeka ase yicinojeye ciwapele wutazi wanhu wawa, nase ho cihanje u mulimo wawo ku soko ye mbeka. 9Nandika baluwa fupi ku kanisa yiyo, ninga Diyotelefe mono kahijililaga kuwa mulongola wawo, si yakusaka kuhuliciza hamba hadodo. 10Holeka nane kolo nghuza, nozilajila zose zono yakwituma, sunga ne zinghani i zimbi zono yakucilonga, hamonga no wulambi wono yakuwulonga. Kanyhi hamba si nhavivyo du, ninga u mwene kanyhi, si yakuwa kusaka hamba kuwacemela kwakwe, wawo i wandugu wono wali mu muhinzo, kanyhi yakuwa kuwalemeza sunga na wanji wono wakusaka kuwacemela, kanyhi yakujela kuwawinjila kunze ye likanisa. 11Gwe mwendece wangu, wulece kutyatya u musambo mubi, langa u musambo muswanu. Munhu wo wose mono yakwituma i ziswanu, yo wo Mulungu, ninga mono yakwituma i zimbi, yuyo yakali si namuwona u Mulungu. 12I wanhu wose wakumukumya Demeteliyo, heya, sunga ne mbeka yeneco yikumukumya. Sunga na sese wose cikumuhomelela, nagwe wumanyile vyono zono cikulonga zo ze mbeka. 13Nali nina nyinji zo kukwandicila, ninga si nyendile kwandicila wino ne kalamu. 14Ninga nitumbiye vyono si notinya kukuwona, baho ho coduwana cidomile. 15U mulamu wuwezane nagwe. I wendece wako wakukulamusa. Wuwalamusaje i wendece wetu wose munhu ne 'tagwa lyakwe.

will be added

X\