2 TIMOTEYO 4

1Nane nghukukong'onheza hali Mulungu na hali Kilisito Yesu, mono kowaling'aniza wanhu i womi ne wafu, na ku soko vyono yakuza kutema nha Mutemi, 2holeka wuyiganulaje nghani yiyo, wiyohaje du kuyiganula (mu cipango cono cinojeye, hamba yiwe mu cipango cono si cinojeye), kalipile no kulanjiza, kanyhi wuwaswaswanizaje wanhu wose, akuno wukuwejiza ko wukangalizi wose. 3I lipango lyokuza lyono wanhu si wolokwenda kugahuliciza i mejizo ge mbeka, langa wene wokwenda kutyatya masulumizi gawo weneco, no kwilundila wejizi wenji wono wowalonjela zinghani zizo du zono i makutu gawo gowa gewikanize kuwuhulicize. 4Hamba si wokwendela lukulu kuyihulika imbeka, langa wokwenda kuzihulicila zisimo zo wulambi. 5Agwe, ninga wikalaje meso muli zose, wukangalile magazo, witumaje u mulimo wo muganula Luganuzi Luswanu, wuwufisilizizaje lukulu u witumami wako. 6Ninga ane ku lubavu lwangu, niwikanize du, ku wulavywa niwe yikumbiko, ne lidaha lyo wufwe wangu nha lyasejelela. 7Hidimbala muno mu wisumanize, muhinzo niwumala viswanu, sunga no wihuwilo nawo niwukamisa. 8Alu yisigaye yo wubocela i cipegwa co wisumanize wangu, ku soko ye mikalile yo wiling'ano, i cipegwa cono Muwaha Muling'anizi we ling'ani, kolomhela Mwizuwa lilya, kanyhi hamba si nene du nili wene, langa na wose wono wakulanjilila ko wendo i mazizo gakwe. 9Wuhidimbale kuza kuli'ne mbela. 10Hambi Dema nha yandeka, mwene yenda ze yinze ya lulu, yakabita ku Tesalonike. Kileseke nayo yabita ku Galatiya, na Tito yabita ku Dalumatiya. 11Alu yo Luka yali wene du mono yali hamonga nane bahano. Wumusolaje Maluko muzane nayo, hambi nha kosuma kumhelo'tazi mu mulimo wangu. 12Tukiko nayo, namutuma akulya ku Efeso. 13Nagwe kolo wukuza, wundetelezezaje ne likoti lyangu lyono nalileka kwa Kalupo ku Tulowa, wundetelaje ne vitabu vivilya, ko muno avilya vyono vinozezwe nyhingo. 14Ayulya u mutyani we vyuma vidunghu, mono kacemwaga Alekizanda, yanhendela vibi muno muno, ningo Muwaha komulipa nha vyono genhe metumo gakwe. 15Ale, wilanjililaje kuli mwene, hambi nha yayibezaga inghani yetu ko wukali muno. 16Ha witetele wangu wulongozi, hasina hamba munhu monga mono yema ku lubavu lwangu, langa wose wandeka. Ninga Mulungu yalece kuwawalila wubi wawo! 17Ningo Muwaha yali yali hamonga nane, yamhela vilungo, sunga nghasuma kuyiganula inghani nha vyono yinha, i wanhu wono si Wayahudi ho wayihulice, kanyhi nghaponywa mu waling'anizwe wo kuwulagwa. 18Holeka u Muwaha si koleka kumhonya muli makani gose i mabi, kanyhi konghamisa sunga ko ku wutemi wakwe wa ku wulanga. Ale, kuli Mwene, lweze lukumyo cibitilila ne cibitilila! Heya. 19Ale, wuwalamusaje wa Pilisika na Akila, hamonga ne mhuga ya Onesifolo. 20Elasito yasigala ku Kolinto, nayo Tulofimo namuleka ku Mileto, vyono yali yatamigwe. 21Ale, wusimbilile kuzo kwangu lono lipango lye cinyuli likali sinafika. Ewubulo, Pude, Lino, na Kilawudiya wose wakukulamusa, sunga na we zindugu wanji, wose wakukulamusa. 22Ale, du, u Muwaha yawezane nagwe mu nhumbula yako. Ne lihewa liwezane nanye wose.

will be added

X\