2 TIMOTEYO 2

1Holeka agwe mwanangu Timoteyo, weze ne vilungo mwihewa lyono cikulituga so wilunza na Kilisito Yesu. 2Ale, wugasolaje i mafundo gono wagahulika nghuganula ha mwande ye wahomelezi wenji, nagwe wuwakoze wanhu wehuwilwa, wono nawo wosuma kuwejiza wanji nhavivyo. 3Wuhanje mu magazo nha musilikale mwihuwilwa wa Kilisito Yesu. 4U musilikale lono yali ku wulugu, keyimilaga zose ze mikalile ye nhondo zose, ho yasume kumwendeza u muwaha wakwe mono yamwandika wusilikale. 5Nayo u munhu wo wose mono kesumanizaga mu midawalo, si kosuma kwisumaniza viswanu no kusuma, sunga yabocele ne cipegwa co wusume wakwe, hono yalece kutyatya u wityatye wono wukusakwa mu midawalo. 6Nayo u mulimi mono yakondya kwituma mulimo muzito, yuyo yanojeye yabocele i lifungu lilongozi lye nhwanga. 7Ale, Timoteyo, wuzihwesaje muno zizo zono nghulonga, hambi u Muwaha nha kokupela wusume wo kuzizuka zose. 8Wumukumbucilaje Yesu Kilisito mono yazukulwa muli wafu, mono yali wa mululelo lwa Dawudi, nha vyono lukulonga u Luganuzi Luswanu lono niluganulaga. 9Na ku soko yiyo yo kuluganula Luganuzi Luswanu, holeka ane nghugazika, na kanyhi holeka mbopigwe ne manyolo nha nili musutyi. Ninga inghani yo Mulungu siyosuma kuwopwa ne manyolo, 10holeka nghukangalila muli vyose ku soko ye wahagulwa wo Mulungu, nawo nhavivyo ho watuje u Wukombozi wono wukuziza mu nzila ya Yesu Kilisito, kanyhi wono wuletaga lukumyo lwe cibitilila. 11No wulonji wuwu wo we mbeka, wono wukutya, “Hono ciwe cafwizana nayo, ale, cowumipana nayo nhavivyo. 12Na hono cijendelele no wukangalile, ale, colotemana nayo nhavivyo. Ninga hono cimukane, ale, kolocikana nayo nhavivyo. 13Na hono cilece kuwa wehuwilwa, ninga mwene kekalaga mwihuwilwa cibitilila. Hambi mwene nha sikosuma kwiyikana mweneco.” 14Ale, wuwakumbucizaje wanhu wako izinghani zizino, kanyhi wuwalonjelaje hali Mulungu, vyono walecele lukulu wiwanganile wa mu zinghani. Hambi wiwanganile wuwo, nha si wukwiliye cinji hamba hadodo, langa wuletaga wuhodanjice wuwaha kuli awalya wono wakuwuhulika. 15Wupiligale muno kwiwika mu mikalile ye lilumbo hali Mulungu nha mwitumami mono si yakuwuwonela cevu u mulimo wakwe, kanyhi mono yakwijiziza mu wulunji inghani ye mbeka. 16Kanyhi wilegaje mu wiwanganile we ciyinze-yinze na wo wulele, hambi zizo nha zicilaga kuwatemanula wanhu, no kuwawika kutali no Mulungu. 17I mafundo ge liwala lilyo, genha lilonda lyono lilizaga muwili. Ne wanhu wono wejiza imejizo gago, muli wawo wo wa Humenayo na Fileto. 18Awo wajilila, kanyhi wali kutali ne mbeka, kanyhi wakuwatajila wanji mu wukangamyanje mu wihuwilo wawo, vyono ti, u wuzuce wetu wakondya kupuluta. 19Ninga musinji wono wukamile, wono wawikwa no Mulungu si wusinjisikaga yaye, na mucanyha yo musinji wuwo, zandikwe zinghani azi, “U Muwaha yawamanyile i wakwe,” na kanyhi, “Na muli wose mono yakwiyitya, mwene yo wo Muwaha, yimunojeye yeleje no wavu.” 20Mu makaya mawaha, mozili bakuli ne viya vye mawala gose, viya vinji vya fweza, vinji vya zahabu, vinji vya mbawo, na vinji vya wulongo, na vinji viwicigwe viwe vitumamilwa vye siya, na vinji kanyhi viwe vitumamilwa vye nhondo zose. 21Holeka hono munhu yeyeze ko kwilega ne makani gago gose go wavu, yuyo yo kowa co ciya ce vitumamilwa vye siya, vyono yakondya kuwikwa siya, nayo yuyo yakumunojezo Muwaha wakwe, nayo kanyhi yakuwa yewikanizize lukulu so mulimo wo wose muswanu. 22Ale, kanyhi wilegaje no wusulumizi we cizelelo zelelo, wutyatye wiling'ano, wihuwilo, wendo, mulamu, hamonga ne wanhu wose wono wakumulomba Muwaha kwe nhumbula swanu. 23Kanyhi wilegaje no wuwanji wo wulele, na we ciwula mahala, wumanyile vyono zizo ziletaga wugombane. 24Yimunojeye mwitumami wo Muwaha yalece kugombana ne wanhu. Langa yimunojeye yawe mupolo kuli wanhu wose, yeze mwijizi muswanu, kanyhi mono yena no wukangalizi, 25mono mupolo, lono yakuwalanjiza walugu wakwe, lunji u Mulungu kowapela cilejeho co kunena, nawo ho wayimanye i mbeka. 26Nawo u wizuce wawo, ho wowawuyila kanyhi, nawo ho wawuce mu mutego wa Setani mono yali yakondya kuwebata no kuwanoza wamuhulice muli zose zono yakuzisaka mwene.

will be added

X\