2 TIMOTEYO 1

1Ane yo nene Pawulo, mono u Mulungu yakasaka ho niwe mutumwa wa Kilisito Yesu, 2nane nghukwandicila agwe Timoteyo, go mwanangu u mwendece. Lihewa, no lusungu no mulamu, vyono vikulawa kuli Mulungu Baba na kuli Kilisito Yesu u Muwaha wetu, vyeze hamonga nagwe. 3Nghumulumbo Mulungu mono nghumwitumamila ne ciselinji ciswanu, nha vyono wanoza i wasogo zangu, nghumulumbo Mulungu nhondo zose lono nghukukumbucila mu wulombe wangu misi ne cilo. 4Kanyhi nghugakumbucila i mahozi gako, nane nghusulumila muno muno ciwone nagwe, i nyemo yangu ho yimeme. 5Nane nghuwukumbucila wihuwilo wako we mbeka, no wihuwilo wono yali yena nawo mamayo Loyisi, hamonga no nyina yako Ewunike. Nane nitumbiye vyono na gwegwe vyo winha. 6Co cikuleka nghukukumbuciza, wucifwanghanizaje i cipegwa cono wapegwa no Mulungu, lono nakuwicilila i miwoko yangu. 7Hambi u Muhe mono capegwa no Mulungu, si Muhe mono kocinoza ciwe woga, a, a, ng'o, langa yo Muhe mono kocipela wendo no wiyidime. 8Ale, holeka wulece kuwona cevu kumuhomelela u Muwaha wetu Yesu, hamba wulece kuwona cevu ku soko yangu nene no mufungwa, mono funjigwe ku soko yakwe, Yesu. Ninga wuhanje magazo ku soko yo Luganuzi Luswanu, mu nghango ye vilungo vyono Mulungu yakukupela. 9Mwene yacikomboza, kanyhi yakacicema ciwe wanhu wakwe mweneco, si ku soko vyono cinojeye so metumo getu, aa, ng'o, ninga ku so wuhile wakwe mweneco, na so lihewa lyakwe. Nayo yakacipela i lihewa lilyo ku soko ya Kilisito Yesu, lono vilo vyali vikali si vinawa. 10Ninga alu cakondya kugubulilwa so wuze wo Mukombozi wetu Yesu Kilisito, u mwene yakondya kuvidumizya lukulu i vilungo vye lifwa, nayo yakawanzalika u wumi wono wusina lifwa, mu nzila yo Luganuzi Luswanu. 11Nayo u Mulungu yahagula nene, ho niwe mutumwa, kanyhi niwe mwijizi ku soko yo kuluganula Luganuzi Luswanu, 12na ku soko yiyo, holeka nghutamiswa nhavivi. Holeka nghali nina witumbilo wuwaha, hambi nha nimumanyile mono namwihuwila, kanyhi manyiye lukulu vyono mwene kocikamisa cicilya cono yanghoza, sunga Mwizuwa lilya. 13Holeka wugakamisizaje lukulu i mafundo gagalya ge mbeka gono nakwijiza, kanyhi wikalaje du mu wihuwilo na mu wendo wetu wuwo, mu wilunza na Kilisito Yesu. 14Inghani yiyilya swanu yono wakozwa, wuyikamisizaje mu nzila ye vilungo vyo Muhe Mono Yelile, mono kekalaga muli sese. 15Kanyhi nha vyono wumanyile, i wanhu wose wono wali mu yisi ya Asiya, wakondya kundeka, na muli wawo, moyuli Fugelo na Helimogene. 16U Muwaha yayiwonelaje lusungu mhuga ya Onesifolo, vyono yasangalazaga kali kenji mu nhumbula yangu, hamba si yawona cevu vyono ane nali funjigwe mu jela, 17langa yali yeza kufika du ku Lumi, hobaho yakamula kunondola yasimbiliye muno, sunga yakambona. 18U Muwaha yamuwonele lusungu Mwi'zuwa lilya! Kanyhi na gwegwe nhavivyo, wuzimanyile viswanu zi nyinji zono yanyitumamila kuko ku Efeso.

will be added

X\