2 WAKOLINTO 9

1Hambi nhe kataza lya bwete kumwandicilenyi kuli zo witumami wenyu wuwo, ku soko ye wanhu wo Mulungu wono wali ku Wuyahudi. 2Manyile vyono mwina nhumbula yo wutazi, nane nghalumba ku soko yenyu so nghani yiyo kuli wanhu we Makedoniya. Nawalonjela nghatya, “Wandugu zetu wono wali ku Akaya, wali wewikanize kunoza wutazi ku wulawa mwekazo.” Holeka u wihinde wenyu, wakondya kuwaswaswaniza wanhu wenji muno. 3Alu nghuwatuma wandugu zetu wawo, u wilumbe wetu wa muli'nye, ho wijele vyono si nghani ya bwete, na kanyhi vyono mwiwikanizize lukulu so wutazi wenyu nha vyono nalonga. 4Yilece kuwa kanyhi i wanhu we Makedoniya kolo wakuza hamonga nane, cimwaganenyi mukali newikaniza, baho ase cowa cakozwa cevu, ne cevu naco cono mocituga nyenye nyo weneco, cowa si cakulonga, vyono ase cowa cakondya kumwitumbililenyi lukulu. 5Holeka mbona viswanu vyono yinojeye niwanene wandugu zetu wawa, wanongolele kuza kwenyu, ho wasume kuviwikaniziza lukulu vipegwa vyenyu viwaha, navyo viwe vyawikanizwa kolo nghuza, vyono mwehuwiza. Ne vipegwa vivyo, vilajile mbeka, nha vyono vilavywa ko mutima muzelu, hamba si ko wudindimizwe yaye. 6Ninga mweze kukumbucila vyono, “U munhu mono yakuhadika ko wucefu, nayo kolo dudula wucefu, nayo munhu mono yakuhadika ko winji, ale, kolodudula ko winji.” 7Holeka munhu wo wose yalavye mu nghango nha vyono yalamuye, ninga yiweze ko mutima muzelu, hamba si ko wukalale, hamba kwe dindimiza, hambi u Mulungu, nha kamwendaga u munhu mono kalavyaga no wusangalale. 8U Mulungu kosuma kumupelenyi kuciza vyono mukuhila, ho muwe muvikwizize vyose mu visakwa vyenyu, ho mucile kuwa watazi mu milimo yose miswanu, 9nha vyono gakulonga i Mandiko Gono Gelile, gakutya, “Mwene kalavyaga ko wuswanu kawapelaga waciwa, no wuswanu wakwe wikalaga cibitilila.” 10Nayo u Mulungu mono kamupelaga mbeyu mulimi, no kumupela i ndigwa yo kulya, komupelenyi nanye zimbeyu zono mukuhila, nayo kozicindisa no kuziwilusa, hamonga no kumupelenyi ndudula mbaha ku soko yo weza mutima wenyu. 11Nayo komugolifyenyi nhondo zose muli vyose, wanhu ho wasume kumulumbo Mulungu, ku soko ye vipegwa vyenyu vyono wakuvibocelela mu miwoko yetu. 12Hambi u mulimo wuwu wono welile wono mukuwituma, si vyono wowataza i wanhu wo Mulungu du, langa wowanoza wanhu wenji wamulumbe Mulungu. 13Na ku soko ye citanjilo cono cikwijela so mulimo wetu wuwu, i wanhu womukumyo Mulungu ku soko yo Luganuzi Luswanu lwa Kilisito lono mukuluvumila, kanyhi na ku soko yo wuswanu wono mukuwatendela wene hamonga ne wanhu wose. 14Holeka wojendelela kumulombelenyi ko mutima wose, ku soko ye lihewa lyono u Mulungu yamupelenyi. 15U Mulungu yalumbwe so cipegwa cakwe cono ase si cosuma kucikumya nha vyono yicinojeye.

will be added

X\