2 WAKOLINTO 4

1Holeka, u Mulungu ku soko yo lusungu lwakwe luwaha, yacipela u mulimo wuwuno ho ciwitume, holeka nase si cikutukuwika mitima. 2Nase cakondya kuzilecela lukulu i zinghani zose ze cevu, na ze cinyele. Hamba si cili mu mikalile kanyhi yo wukonji, hamba kuyipitulasa nghani yo Mulungu, langa cikuyilajila i mbeka mu witume mbeka, na mu nzila yiyo, mo cikwiwicilila mu wulamuzi we viselinji vye wanhu, hali Mulungu. 3Hambi u Luganuzi Luswanu lono cikuluganula, hono luhundikwe, lowa luhundikwe kuli wono wakwajilila du. 4Wawo si wehuwiye vyono mulungu we yinze yiyino yawatajila wutitu mahala gawo, ho walece kuwuwona calinze u wuzelu wo Luganuzi Luswanu lo lukumyo lwa Kilisito, mono yo cihwani ce mbeka co Mulungu. 5Hambi ase, nha si cikwiyiganula sese co weneco, langa 'se cikumuganula Kilisito mono yo Muwaha, nase nha cili wetumami wenyu ku soko ya Yesu. 6U Mulungu mono yatya, “Uwuzelu wubulile mu wutitu,” yo yuyo kanyhi mono yakuwa kuzibulilila ne zinhumbula zetu, kanyhi yo kacipelaga u wumanye wose wo lukumyo lo Mulungu, wono wukuwa kung'alala mu wusu wa Kilisito. 7Hamba nhavivyo, ase mono cina cico i ciwutwa co Muhe, cihwanile i viya vye lilongo, ho yijele calinze vyono i vilungo vivyo viwaha, vikulawa kuli Mulungu hamba si muli sese co weneco. 8Cikugazika nhondo zose, ninga hamba nhavivyo si cikukatala, kanyhi cikwihwelela, ninga si cikutukuwika mitima yaye, 9cina walugu wenji, ninga wutazi wuli baho, hamba ciwe cikugwiswa ho hasi, ninga si cikongomezwa yaye. 10Ase cikalaga cidinghuye mu miwili yetu nhondo zose i lifwa lya Yesu, uwumi wa Yesu nawo nhavivilya ho wanzalikwe mu miwili yetu. 11Heya, vyono mu mikalile yetu yose, cili mu mbali ye lifwa ku soko ya Kilisito, u wumi wakwe Yesu ho wanzalikwe mu muwili wetu wuwu wono wukufwa. 12Nha cinji wo wutya, i lifwa likwituma mugati mwetu, ninga nawo wumi wukwituma mugati mwenyu. 13I Mandiko Gono Gelile gakutya, “Nehuwila, holeka nghalonga.” Nase nhavivyo ku soko yo wuwa ne nhumbula yiyo yo wihuwilo, cihuwiye, na holeka ku soko yiyo, nase cikulonga. 14Nase cimanyile vyono, u Mulungu mono yamuzukula u Muwaha Yesu muli wafu, kocizukula nhavivilya na sese hamonga na Yesu, no kucinyasula hamonga nanye no kuciwika hali mwene. 15Na zizi zose zili ku soko ye cambuzi cenyu nyenye, ho yiwe nha kotya, lihewa lyo Mulungu, likuwaficila wanhu wenji muno muno, nawo ho wasume kulavya lilumbo muno muno ko lukumyo lo Mulungu. 16Holeka si cikutimba, u munhu wetu wa kunze hamba yakombipe, ninga mugati mwetu, cikunozwa wapya nhondo zose. 17Hambi u wugaye wono cikuwutuga nha wudodo, kanyhi wa cidaha cidodo vivi du, ninga hamba nhavivyo, wosuma kucipela u lukumyo lono lucizize u wulanjilile wetu wose, u lukumyo lono lusina ndumo. 18Holeka ase cikuvilanjilila muno muno vinhu vyono si vijelaga, hamba si vinhu vyono vijelaga. Ku soko vyono vijelaga, nha vya cidaha cidodo du, ninga avilya vyono si vijelaga, vyo vikalaga cibitilila.

will be added

X\