2 WAKOLINTO 13

1Alu lo lwe kadatu lo kuza kwenyu. “I makamu go gose, gahulicizwe hamwande ye wahomelezi wejete hamba wadatu.” I Mandiko vyo gakutya. 2Nakondya kulonga nha vyono yali yinha mu muhinzo we kejete, nalu nghulonga kanyhi lono nili kutali nanye, vyono wawalya wose wono wetuma wubi hamba kunena yaye, sunga na wawalya wanji, kolo nghuza, ale woviwona. 3Alu langa ho mokwiwonelela nyo weneco, vyono Kilisito yakulonjela muli nene. Mono kuli'nye, Kilisito si yasoceye yaye, langa i vilungo vyakwe vikwituma muli nyenye. 4Hamba yiwe nha yatumbicilwa mu musalaba mu wusocele, ninga alu yakuwumipa kwe vilungo vyo Mulungu. Nase cisoceye nhavivyo so wilunza nayo, ninga ciwumipana hamonga nayo kwe vilungo vyo Mulungu ku soko yenyu. 5Ale mwiyijele nyo weneco ho mumanye hono mbeka mwina wihuwilo. Mwiyihenje nyo weneco. Alo si mumanyile vyono Kilisito Yesu yali muli nyenye? Na hono yiwe si nhavivyo, anye waco mwalemwa. 6Ninga nitumbiye nha vyono anye mumanyile vyono ase cikali nalemegwa. 7Cikumulomba u Mulungu, ho mulece kwituma wubi wo wose, ninga si vyono ho cijele nha wanhu wono wakondya kusuma, langa ho musume kwituma ziswanu, hamba ase ciwe kwijela kotya nha cilemigwe. 8Hambi nha si cosuma kwituma cinji kusutana ne mbeka, vyono u wusume wono cina nawo, nha cina wusume wo kuyijendeleza mbeka. 9Ninga cikusangalala vyono cili wasocele, langa anye muli vilungo, holeka cikulomba muwuficile u wukwilanicile. 10Ale holeka nghuyandika baluwa yiyi lono nili kunji, nilawa neza kufika kuko, ho ndece kuwa nili mukali kuli'nye no kuwitumamila u wulajilize wono napegwa no Muwaha, u wulajilize wo kumusikamyenyi hamba si wo kumugwisenyi yaye. 11Na ye ndumilizo, wandugu zangu, nghutya, mwikalaje! Mweze mukamile, muwibataje muno muno u wijize wangu, mweze mulaganiye kumonga, mwikalaje mwilamuye. Nayo u Mulungu wo wendo no mulamu, kowa hamonga nanye. 12Mwilamusizaje mu winonele wono welile. I wanhu wose wo Mulungu wono wali akuno, wose wakumulamusenyi muno. 13Ilihewa lyo Mutwa wetu Yesu Kilisito, no wendo wo Mulungu, no wuhanje wo Muhe Mono Yelile, viwezane nanye wose.

will be added

X\