2 WAKOLINTO 11

1Mwali munghangalilile hadodo du, hamba niwe nha nili mulele ku lubavu lunji! Heya, ale munghangalilile ta hadodo. 2Ane nha nghumuwonelenyi wivu, ninga wivu wa kuli Mulungu, hambi anye nha mwihwanile u muhinza musindile mono nimubanyiye u mulume monga du, nayo yo Kilisito. 3Ninga nghogopa yilece kuwa nhe lizoka lyono ko wusugu walyo wo wulambi, likamukoca Hawa, i mahweso genyu gadahile kwajilizwa no kuwuleka u wihuwilwa wenyu we mbeka kuli Kilisito. 4Hambi nye nha mukumukangalila u munhu wo wose mono kokuza no kumuganula Yesu mono yesimajiye na yulya mono camuganula, kanyhi mukubocela muhe no luganuzi vyono visimajiliye lukulu no Muhe no Luganuzi vyono mwavibocela kulawa kuli'se. 5Si nghwihwesa vyono ane nili mudodo si nha wawo “I Watumwa wenyu wono wakumucile!” 6Lunji nowa sina wunghula wo wulolosa milonjele, ninga u wumanye awo langa nina nawo, ne nghani yiyi cayilajila calinze kuli'nye hanhu ho hose, na mu vipango vyose. 7Hamba si namudayenyi musahala wo wose, lono namuganulilenyi u Luganuzi Luswanu lo Mulungu, langa nenenenyheza ho sume kumwinulenyi anye. Alo nanoza vibi? 8Lono netumaga mulimo muli'nye, i visakwa vyangu nha vyalawaga mu makanisa ganji. Nha cinji wo wutya nawasolela sawo yawo, ho sume kumwitumamilenyi anye. 9Na lono nali nanye, hamba si namugaza munhu wo wose so wusaka pesa, langa i wandugu zetu wono wakalawa Makedoniya, wo wandetela vyose vyono nasakaga. Kanyhi nelanjilila muno muno ho ndece kuwa mutegulo kuli'nye, mu nzila yo yose yilya, na nojendelela du kunoza nhavivyo. 10Nane nghwihuwiziza mu mbeka ya Kilisito yono yili muli'ne, nha vyono hasina cono cosuma kunyimila mu wilumbe wangu so nghani yiyi hanhu ho hose mu Akaya. 11Alo nhawule nghulonga nhavivi? Vyono si nimwendilenyi nyenye? Ninga Mulungu yamanyile vyono nimwendilenyi nyenye muno! 12Nojendelela kwituma du nha vyono nghwituma alu, ho ndece kuwapela cilejeho awalya wono wakusaka kutuga icilejeho co kwilumbila nha vyono ati wakwituma mulimo nha sese. 13Hambi wawo nha wo watumwa wo wulambi, wetumami wo wukonji, wono wakwinoza nha watumwa wa Kilisito. 14Kanyhi hamba si nghani ya wizine, hamba na Setani mweneco nha kenozaga kawa nha malayika wo wuzelu! 15Holeka si nghani mbaha yaye, hono wawo i wetumami wakwe wenoze nha wetumami wo wiling'ano. Ninga mudumo wawo, wocituga cico cono ciwanojeye vyono genhe metumo gawo. 16Kanyhi nghutya, Munhu yalece kumbona ane nha nili mulele. Ninga hono munyihweseze nhavivyo, ale munozaje nha nili mulele nhavivyo du, nane ho nicituje co kwilumbila hadodo vivi. 17Naco cono nghucilonga aluno, si nghulonga cono yandajiliza Muwaha, hambi mu nghani yiyi yo wilumbe, ane nghuyilonga du nha nili mulele. 18Alu vyono kowali wenji wono wakwilumbila za mononze, ale nane nhavivyo nokwilumba. 19Anye muli we mahala, na holeka mukuwakangalila i walele! 20Mukusuma kumukangalilila sunga no munhu mono yakumunozenyi muwe wawanda, u munhu mono kumusolelenyi vinhu vyenyu, mono yakumwiwonelenyi, mono yakumubedegalenyi no kumutowenyi ku wusu! 21Nane nghuvumilila cevu, vyono ase cali cisoceye mu wituma zizi zose. Ale du kanyhi, na yiwe vyono yowa, ninga hono hawe hoyuli yunji wo wose mono yakwijelela kwilumbila muli cinji co cose, alu nghulonga nha munhu mulele, nane nokwijelela nhavivyo. 22Wule, alo wene Wahebelaniya? Ale na nene nhavivyo. Hamba wene Waisilayeli lo? Nane nhavivyo. Wene wamu lulelo lwa Abulahamu? Hamba na nene. 23Alo iwene wetumami wa Kilisito? Na nene ye, alu nhondo, neza kulonga cimangha-lukwale, ane nili mwitumami wa Kilisito kuciza wene. Ane netuma mulimo muzito muno muno, nadindilwa mu jela kali kenji muno, nghatowangwa kali kenji, sunga nghawa nili behi no kufwa kali kenji. 24Kali kahano nghakunwa viboko vivilya makumi madatu ne cenda ne Wayahudi. 25Nakunangwa ne viboko kadatu, nghabogolangwa ne mabwe kamonga, kanyhi nghabenecelwa ne nghalawa mwi'lenga kali kadatu, na kamonga nekala mumo mu malenga cilo cose sunga wukela, kanyhi nghaswa muno misi yose. 26Kenji na kenji mu mihinzo yangu, netang'anilaga na mbali nyinji, zimbali zo wulapuce we malenga mu makolongo, zimbali ze malimu makali, zimbali ze wahizi, zimbali zono zalawaga kuli wanyawusi wayangu Wayahudi, na zono zalawaga kuli waono si Wayahudi, ne zimbali za mu makaya mawaha, zimbali za mu mbago, zimbali za mwi'lenga, ne zimbali zono zikulawa kuli wandugu wo wulambi! 27Netuma mulimo hamonga ne magayo, nekala meso hamba kugona cilo cose kali kenji, nghadabuka no kuwona nyhilu. Nghaleka kulya, nghekala mu mbeho nghali, akuno sina myenda. 28Ninga hamonga na zinji nyinji, kocili cono cikumvuna nhondo zose, nha cinji u mulimo we makanisa gose. 29Hono hoyuli yunji musocele, ale nane nili musocele nhavivyo, na munhu wo wose hono yakwejelwe mu wubi, nane nghutuga wukalale muno. 30Holeka hono yiwe yinojeye nilumbe, ale, nokwilumbila wusocele wangu. 31U Mulungu Sogo yo Muwaha Yesu, ilitagwa lyakwe lilugutwe cibitilila! U Mwene yamanyile vyono si nghulonga wulambi. 32Lono nali Damesiki, u muwaha we yisi, mono yali yali hasi yo mutemi Aleta, yalidimaga likaya lya Damesiki, ho yasume kunyibata. 33Ninga nghatimizizwa mu nhoto mbaha, nghakozwa mwidilisha sunga ko kunze, holeka nghatiga mu miwoko yakwe.

will be added

X\