2 WAKOLINTO 1

1Kulawa kuli nene Pawulo, no mutumwa wa Kilisito Yesu, so wuhile wo Mulungu, no ndugu yetu Timoteyo. Cikumwandicilenyi anye mono muli we likanisa lyo Mulungu, lyono lili kuko ku Kolinto, hamonga ne wanhu wose wo Mulungu we hanhu hose mu Akaya. 2Ilihewa no mulamu vyono vikulawa kuli Mulungu u Sogo yetu, na kuli u Muwaha wetu Yesu Kilisito, viweze muli nyenye. 3Yalumbwe u Mulungu u Sogo yo Mutwa wetu Yesu Kilisito, Baba mono yena lusungu, kanyhi yo Mulungu mono kaletaga u wutuzwe wose. 4Mwene yo kacitazaga ase mu wugazice wetu wose, nase ho cisume kuwatuza wanji mu wugazice wose, mu nzila yo wutuzwe wuwo wono cikulubocela kulawa kuli Mulungu. 5Heya, mu nghango ye magayo ga Kilisito vyono gakucila muli'se, ale, mu nghango yiyo nase mo cikucilila kusindamikwa nayo. 6Holeka hono ciwe cikutuga wugazice, cikugazika ku soko yo wusindamikwe ne mhonelo yenyu. Na kanyhi lono cikusindamikwa, cikusindamikwa ho nanye mutuje wusindamikwe, ne vilungo vyo wukangalila magazo gaga, gono sunga na sese cikagakangalila. 7Holeka uwitumbilo wetu wa muli'nye, wusikame muno muno, kanyhi cimanyile vyono, hono muhanje nase i magazo getu, vyo mohanga no wusindamice wetu nhavivyo. 8Nye nyo wandugu zetu, ase cikusaka kumumanyizenyi, ze magazo gono gacagana ku yisi ya Asiya, i magayo gago gali mawaha muno, sunga gakaciwusiza no witumbilo wose wo kwikala cili womi. 9Heya, cikawa nha wanhu mono ciwiciywe kuwulagwa. Ninga zizi zose, zejela ho cisume kwiyijiza vyono yicinojeye cilece kwiyitumbila co weneco, langa cimwitumbile Mulungu, mono kawazukulaga i wafu. 10U Mwene yaciponya mu mbali mbaha ye lifwa, kanyhi yakali yakujendelela kuciponya, nase cimuwiciye u witumbilo wetu du, nha vyono kajendelelaga kanyhi kuciponya, 11nha vyono mukucitaza so wulombe wenyu. Holeka u wulombe wenyu wono mukucilombela muno, wopitulwa, no Mulungu kocilugutiza, na wanhu wenji wokwinula i mazi gawo, wawe kumulumbo Mulungu ku soko yetu. 12Ase cikwilumbila cinhu cimonga du, vyono viselinji vyetu vikucihomelela vyono, mu wikale wetu wa mono yinze yiyino na ko muno muli'nye, cekala ko winenenyhezi wose hamonga no wele wa mu nhumbula, wono wukulawa kuli Mulungu, hamba si catongwa ne lihala lye cimunhu-munhu, langa catongwa ne lihewa lyo Mulungu. 13Holeka cikumwandicilenyi nanye izinghani zono mosuma kuzisoma no kuzizuka. 14Ninga hamba yiwe aluno mukucizuka hadodo du, nitumbiye vyono hanyuma mocizucila lukulu, Mwizuwa alilya lyo Muwaha wetu Yesu, ho muze musume kwilumbila muli sese, nha vyono nase colokwilumbila muli nyenye. 15Holeka ku so witumbilo wuwo, nahilaga kwamula kuza kwenyu ho mutuje lihewa lye kejete. 16Nahilaga ngholele kwenyu lono nghubita ku Makedoniya, na lono nghuwuya nhavivyo, ho nhuje u wutazi wenyu so muhinzo wangu wo kubita ku Wuyahudi. 17Wulenyi! Mukwihwesa lono nahimaga zizo, nahimaga nha munhu mono yasina wusimyo? Mukwihwesa ane nghunozeza u wulamuzi wangu mu mahweso ge cimunhumunhu nha cinji nghutya “Heya” ne “Ng'o” ho baho hose? 18Ninga u Mulungu yo we mbeka yose, holeka azilya zono camulonjelenyi anye, si zali nghani za “Heya” ne “Ng'o.” 19Vyono Kilisito Yesu, u Mwana wo Mulungu, mono ane na Silivano na Timoteyo camuganulilenyi anye, si yali munhu wa “Heya” na “Ng'o,” langa u mwene yo “Heya” yo Mulungu nhondo zose. 20Ku soko vyono muli mwene u wihuwizo wose wo Mulungu waweza “Heya.” Holeka ku soko yiyo, i “Heya” yetu yikuwa kulongwa mu nzila ya Kilisito, ku soko yo kumukumyo Mulungu. 21U Mulungu mweneco yo kacisikamyaga ase hamonga na nyenye mu wilunza na Kilisito, kanyhi yo kacisiwanulaga, 22kanyhi yo yaciwicila mutozo wo kuwela cili sawo yakwe mweneco, kanyhi yakacipela no Muhe Mono Yelile mu zinhumbula zetu, ho ciwe co cipingo ca zose zono yaciwiciye. 23No Mulungu yo muhomelezi wangu, mwene yo yayimanyile i nhumbula yangu! Ane, sinawuyajila kanyhi kuza ku Kolinto, ku soko du yo kumuwonelenyi lusungu. 24Ase si cikusaka cimutemenyi mu wihuwilo wenyu, anye mono mwakondya kuwa mukamile mu wihuwilo wenyu. Langa yicinojeye, ciwitume u mulimo hamonga nanye, ku soko ye nyemo yenyu.

will be added

X\