1 TIMOTEYO 4

1Ningo Muhe yakulonga ciwonelela vyono mu vilo vyono vikuza, iwanhu wanji wolowulecela lukulu u wihuwilo, nawo woloyihulicila i myuhe yo wukoci, no kwibata mafundo ge masetani. 2Imafundo ge liwala lilyo, gatandazwaga ne wanhu walambi kanyhi wakonji, wono i viselinji vyawo vinha kotya nha vinyanywe ne cuma cono cili moto. 3Iwanhu we liwala lilyo, wejizaga wakutya, gowa masutya kwitola, sunga no kulya zindigwa zinji zinji. Ninga u Mulungu nha yaziwumba i zindigwa zizo, ho wawalya wono wehuwiye na wono watuga kuyimanya imbeka, wazitumamile kwe lilumbo. 4Hambi vyose vyono yaviwumba Mulungu nha viswanu, hamba hasina cono cinojeye kusemunwa, langa yinojeye vyose vibocelwe kwe malombo no wulumbe, 5ku soko inghani yo Mulungu hamonga no wulombe, vicinozaga i cinhu cico ciwa celile hali Mulungu. 6Hono wuwapele i wandugu wose imalajilizo gaga, kowa mwitumami muswanu wa Yesu Kilisito, akuno wukwijendeleza mu cimuhe mu zinghani zo wihuwilo ne mejizo ge mbeka, gono go mweneco kugatyatyaga. 7Ninga wulecele lukulu zisimo zono zisina dini na zono zisina nhunizo yo yose. Wizowelezaje kwikala mu mikalile yo wogopa Mulungu. 8Hambi wizoweleze wo muwili nha wina cambuzi cayo, ninga wizoweleze we cimuhe, wina cambuzi ce mawala gose, hambi nha wukucihuwiza zo wumi we vilo vivi na wuwo kanyhi we vilo vyono vikuza. 9Hambi wulonje awu nha wa mbeka, kanyhi wunojeye wubocelwe kanyhi wihuwilwe. 10Ase cikupiligala no kwituma cihidimbaye, hambi nha cimuwiciye witumbilo wetu u Mulungu mumi, mono yo Mukombozi wetu co wanhu wose, na ko muno wa walya wono wehuwiye. 11Ale wuwapelaje malajilizo gaga ne mejizo gaga. 12Wulecele lukulu kulumba munhu wo wose ho yakubedegale ku soko yo wudodo wako, langa weze wuli musambo kuli wono wehuwiye: mu wulonje wako, mu mijendele yako, mu wendo, wihuwilo, na mu mikalile miswanu. 13Witumamilaje madaha gako hamonga ne vilungo vyako, mu wusoma calinze Imandiko Gono Gelile, mu wuganule na mu wijize, sunga kolo nghuza. 14Wulece kuleka kucitumamila i cipegwa cicilya ca Kilisito cono cili muli'gwe, cono wapelelwa mu zinghani ze wawizi, na mu wuwicilwe miwoko ne wanyamhala. 15Wuzihwesaje zizo zose muno muno, hamonga no kuzitumama, u wujendelele wako ho wusume kwijela hali wose. 16Wiyikamisaje muno muno go mweneco hamonga ne mejizo gako. Wuhidimbale muno muno mu wituma zizo, hambi nha kokwiponya go mweneco, hamonga na wawo wono wakukuhuliciza.

will be added

X\