1 TIMOTEYO 1

1Nene Pawulo mutumwa wa Yesu Kilisito ku soko ye lilajilizo lyo Mulungu u Mukombozi wetu na Yesu Kilisito u witumbilo wetu, 2nghukwandicila gwegwe Timoteyo umwanangu tuti mu wihuwilo. Ilihewa liweze kuli'gwe, hamonga no lusungu no mulamu vyono vikulawa kuli Mulungu u Sogo yetu na kuli Kilisito Yesu Mutwa wetu. 3Nyendile 'gwe wikale kuko ku Efeso, nha vyono nakunena lono nabitaga ku Makedoniya. Iwanhu wanji wali kuko wono wakwijiza imejizo go wulambi. Wuwagomezaje wanhu wawo wapelele lukulu. 4Kanyhi wuwalonjelaje walecele lukulu zisimo zizilya zono zisina nhunizo yo yose hamba hadodo, hamonga ne zinghomo zinhali ze zindelwa ze walezi wetu, zono ziletaga wiwanganile wa bwete, hamba siziwazengaga wanhu mu wuhile wo Mulungu wono wumanyice mu nzila yo wihuwilo. 5Ale u wulunji we lilajilizo lili, nha wukukong'onheza uwendo wono wukulawa mu nhumbula nzelu, no mutima muswanu, na mu wihuwilo we mbeka. 6Hambi iwanhu wanji nha wajilila no kupitucila ku wulonga zinghani zo wulele zono zisina cambuzi co cose. 7Wendile kuwa wejizi wo Wulajilize, ninga akuno ho si wakuzizuka ne zinghani zawo weneco, hamba kuzimanya bwete na zizo zono wakuzikong'onheza muno muno. 8Cimanyile vyono u wulajilize wuswanu, hono witumamilwe vyono yinojeye. 9Ninga yicinojeye cikumbucile vyono u wulajilize si wukuwa kuwikwa so wanhu waswanu, langa wuwikwaga ku soko ye wahodanji na wono wasina cihuliko, wono siwamogopile u Mulungu ne wanyo wubi, iwanhu wono wasina dini, kanyhi we ciyinze yinze. Kanyhi wuwikwaga ku soko ye wanhu wono wawulagaga i wasogo zawo ne wanyina zawo, wawulaga wanhu, 10kanyhi wulajilize nha wuwicigwe ku soko ye wanhu wasenyha, i wamelopezi, i wahiza wanhu, walambi, na wono welahaga ko wulambi, hamba na wono wetumaga zono zili suta ne mejizo ge mbeka. 11Hambi imejizo gaga nha gali mu Luganuzi Luswanu lo Mulungu wo lukumyo kanyhi u mulugutwe. 12Nghumulumba u Mutwa wetu Yesu Kilisito mono yamhela i vilungo ku soko yo mulimo wangu. Kanyhi nghumulumba vyono yambona ane nili mwihuwilwa, yakahagula nimwitumamile, 13hambe bahalya halulongozi nene no mweneco nghamuliga no kumugaza no kumugalila. Ninga mwene Mulungu yakambonela lusungu, ku soko nali nghali sina wihuwilo, na holeka si nali manyile cono netumaga. 14Ninga u Mutwa wetu yakamhela i lihewa lyakwe ko winji, kanyhi yakamhela wihuwilo no wendo mu wilunza na Kilisito Yesu. 15No wulonje wuwu nha wa mbeka, na kanyhi wunojeye wuvumilwe muno muno, vyono Kilisito Yesu yaza kononze kuwaponya wanyo wubi. Nane nha nili mubi kuciza wawo wose. 16Ninga mwene Mulungu yakambonela lusungu, ho Kilisito yawulajile wukangalizi wakwe wose kuli'ne, wuwe nha musambo kuli awalya wono hanyuma yayo wolomwihuwila no kubocela wumi we cibitilila. 17Ale, kuli mwene Mutemi we cibitilila na we sakalakale, mono sikawonagwa, umwene Mulungu we ciwene, lyeze lilumbo no lukumyo cibitilila na cibitilila! Heya. 18Go mwanangu Timoteyo, nghukupela lilajilizo lili, nha vyono zinha i zinghani zo wuwizi, zono zawilwa katali muli gwegwe. Ale wuzitumamilaje i zinghani zizo ziwe nha citwalo cako, ho wusume kulewa milewo miswanu, 19kanyhi wuwukamisaje u wihuwilo wako ne ciselinji ciswanu. Hambi iwanhu wanji vyono si wasaka kuvihuliciza i viselinji vyawo, holeka wakawuhodanga u wihuwilo wawo. 20Na muli wawo, wo wa Himenayo na Alekizanda, wono nawakombola kuli Setani, ho wejizwe wapele kumutovula u Mulungu.

will be added

X\