1 WATESALONIKE 2

1Hambi nha mumanyile nyo weneco wandugu zetu, u wuze wetu wa kuko kwenyu vyono si wali wa bwete. 2Mumanyile vyono catamiswa, no kutovulwa akulya ku Filipi, lono cali cikali si nafika u kwenyu ku Tesalonike. Hamba kuwe kwali kowuli wiwanganile winji, ninga u Mulungu wetu, yakacipela wuluwuce wo kumuganulilenyi u Luganuzi lwakwe Luswanu. 3Ne nghani yono cikumusinjenyi, si nghani ya wulambi, hamba lunji yono yina wuhile wubi, hamba si cendile ho cimukonje munhu wo wose. 4Ase cilongaga nhondo zose nha vyono yendile u Mulungu, hambi nha yo mweneco mono yaciwona ase cikwiliye, yakawa kucipela u mulimo wuwu wo Luganuzi Luswanu. Wo si wuhile wetu hamba hadodo ho ciwendeze wanhu, langa cikuhila kumwendeza u Mulungu, mono yazimanyile zinhumbula zetu sunga mo mugati. 5Nanye mumanyile vyono lono caziza kwenyu, si caza ne zinghani zo wutelemezi, hamba si cetumamila u wulonji wo wusugu wo kwihundika cinji muli sese, u Mulungu yo muhomelezi! 6Hamba si calondola lilumbo muli wanhu hamba muli nyenye, hamba kulawa kuli munhu wo wose, 7ninga ase nha vyono cili wetumami wa Kilisito, cali cisume kusaka cinji kwenyu. Ninga ase cikawa wapolo lono cali cili hamonga nanye, nha vyono yenha u nyina yo munhu muli wanagwe. 8Ale nhavivyo, vyono cikamwendenyi anye muno muno, cikawa ciwikanize kumugawilenyi si u Luganuzi Luswanu du lo Mulungu, langa sunga no wumi wetu. Nhavivyo nanye vyo mwali mo wendece wetu! 9Nye wandugu zangu, mukumbuciye vyono cetuma u mulimo hamonga ne magaziko. Lono camuletelenyi u Luganuzi Luswanu lo Mulungu, hambi nha cetumaga mulimo ku misi na ku cilo, ho cilece kuwa mutegulo kuli munhu wo wose muli nyenye. 10Nanye nyo weneco muli wahomelezi, no Mulungu nayo muhomelezi nha vivyo, vyono i mikalile yetu hali nyenye mono mwihuwiye, vyono yali miswanu kanyhi ye ling'ani yono yisina yilema. 11Kanyhi mumanyile nyo weneco vyono ase camutendelenyi nyenye yumonga yumonga, nha vyono u sogo yo munhu kawatendelega wanagwe mweneco. 12Cikamulanjizenyi, kanyhi cikamusindamicenyi, no kumuswaswanizenyi, ho mwikale mu mikalile yono yikumwendeza u Mulungu mono yamucemenyi ho muhanje u Wutemi no lukumyo lwakwe mweneco. 13Kanyhi cina ne soko yinji yo kumulumbila u Mulungu; lono camuletelenyi i nghani yo Mulungu, anye mwayihulika kanyhi mukayibocela si nha vyono yinha nghani yono yikulawa kuli wanhu, langa mwayibocela nha nghani yo Mulungu, nayo mbeka vyo yinha. Hambi u Mulungu nha yakwituma muli nyenye mono mwihuwiye. 14Nye wandugu zangu, nanye nha zamwaganenyi zono zagagana i Makanisa go Mulungu ga ku Yudiya, zinghani zono zawagana i wanhu wa Kilisito Yesu. Nanye mwatamiswa ne wanyawusi wayenyu, nha vyono iwene nawo wagazwa ne Wayahudi wayawo, 15wono wamuwulaga u Muwaha Yesu ne wawizi, wakacigaza sunga na sese nhavivyo. Iwanhu wono si wakumwendeza u Mulungu, kanyhi wali sili ne wanhu wose. 16Kanyhi wakajela kucimila cilece kuwaganulila wanhu wono si Wayahudi i nghani yono yosuma kuwapela mhonelo. Na mumo mo wakumemelezeza i liwalo lyo wubi wawo wono wetumaga nhondo zose. Ninga alu i likuwo lyo Mulungu liwagwiliye. 17Nye wandugu zangu, u witemanuce wetu na nyenye, wali wa cipango du, kanyhi no witemanuce wuwu wali wa mu muwili du hamba si wa mu nhumbula. Ninga hanyuma ye cipango cifupi, cikamwisukwenyi muno no kuhila kumuwonenyi kanyhi! 18Holeka cikawona viswanu ho cize kuko kwenyu kanyhi. Nane no Pawulo najela ho nize kuko kwenyu nghanghulo monga hamba ne kejete, ninga Setani yakacimila. 19Wulenyi cilaza kwima hali Muwaha Yesu yalaza kuza, u lukumyo lo wusume wetu wolowa cici? Wolowa nyenye nyo weneco, vyono anye yo nyenye, wo witumbilo wetu ne nyemo yetu. 20Heya, hambi nha yo nyenye lukumyo lwetu ne nyemo yetu!

will be added

X\