1 WAKOLINTO 8

1Aluno kuli i zindigwa zono zikumbiciywe vihwani, cimanyile nha vyono ase wose cina uwutanje mu mahala, ninga kanyhi u wutanje wuwo, wuwapelaga wanhu wawo no widunhumuzi, ninga u wendo, wuzengaga. 2Ale, holeka mono yakwihwesa nha yamanyile cinji, i mbeka, yuyo si yamanyile cinji co cose nha vyono yimunojeye kumanya. 3Ninga u munhu mono yamwendile u Mulungu, yuyo langa yo yamanyice kuli mwene. 4Holeka kuli i zindigwa zono zikumbiciywe vihwani, ase cimanyile, vyono vihwani si cinji mono yinze, ase cimanyile vyono u Mulungu yo yumonga du. 5Hamba viwe ho vili vinhu vyono vicemwaga milungu, mu muno mono'nze, hamba ku wulanga, na hamba hawe hoyili milungu mu muno, ne wawaha wenji, 6hamba nhavivyo, kuli'se koyuli Mulungu yumonga du, Baba, u Muwumbi we vinhu vyose, mono sunga na sese nase, cili baha ku soko yakwe. Na kanyhi, koyuli u Muwaha yumonga du, yo Yesu Kilisito, mono nayo mu nzila yakwe, vinhu vyose vikawumbwa, na mu nzila yakwe na sese nase mo cikuwumipila. 7Ninga hamba nhavivyo, si wose wono wena u wumanye wuwuno. Hambi nha howali wanhu wanji wono wavizowela i vihwani, wanhu wono sunga nalu, lono wakulya zindigwa, wakuziwona kotya nha ndigwa zono zikumbiciywe vihwani. Na vyono viselinji vyawo visoceye, wakutipizwa mu viselinji vyawo. 8Ninga ndigwa siyosuma kucitegula behi no Mulungu. Na hamba hono cilece kuyilya, si cocepucilwa na cinji, na hamba hono cilye, si cokonjelezezwa na cinji. 9Ninga mwilanjililaje, u welecele wenyu wuwu, wulece kuwanoza wono wena u wihuwilo wono wusoceye, wagwile mu wubi. 10Hambi u munhu mono i ciselinji cakwe cisoceye, hono yakuwone agwe mono wina wizuce wukulya zindigwa zizo mugati ye cikumbicilo ce vihwani, wule, si kowa wamupela vilungo vyo kulya zindigwa zono zikumbiciywe vihwani? 11Na hobaho yuyo u nduguyo u musocele, mono Kilisito yafwa ku soko yakwe, kokwajilila ku soko yo wumanye wako. 12Na hono muwasutizye wandugu zenyu nhavivyo, no kuvitajila makomele viselinji vyawo, vyono visoceye, mowa mwamusutizya Kilisito. 13Holeka hono ndigwa yiwe yikuwa kumuletela ndugu yangu wugwe, hodu sinolila lukulu nyama, ho ndece kumugwisiza ndugu yangu mu wubi.

will be added

X\