1 WAKOLINTO 2

1Ane nane, mo wandugu zangu, lono naziza kwenyu, si namuganulilenyi inghani yo Mulungu ko wusugu wa nonga, hamba kwe mahala ge cimunhumunhu. 2Na kanyhi, hamba si nasaka ho manye nghani yo yose ya muli nyenye, langa nghani monga du, heya, nimumanye Yesu Kilisito du, u mwene Kilisito mono yatumbikwa mu musalaba. 3Lono nali nili kuko kwenyu, nali nili musocele, na kuno kanyhi nghucicima so woga winji. 4Sunga na muwulonje hamba na mu wuganule wangu, sinetumamila i zinghani zo kuwendeza wanhu, hamba za mu mahala gangu, langa zali za mu wulajile wo Muhe, na we vilungo vyo Muhe Mono Yelile. 5Nane nanoza nhavivyo, u wihuwilo wenyu ho wulece kwitumbila imahala ge cimunhumunhu, langa ivilungo vyo Mulungu. 6Hamba nhavivyo, ase citumamilaga u wulonje we mahala kuli walya wono wakangaye mu mikalile yawo ye cimuhe, kanyhi ne mahala gago go si mahala ga mononze yiyi, hamba si ge watemi wa mono yinze yiyi, wono wali mu mukumbo wo wajilile. 7Imahala gono cikwitumamila ase, go mahala ge zinghani zo Mulungu zono hundikwe, imahala gono mahundikwe, go mahala gono u Mulungu yali yagatemizye ku wulawa ku mwamulizo, ku soko yo lukumyo lwetu. 8Go mahala gono i watemi we yinze yiyi, si wasuma kugatanga, ku soko hono wali wagatanje, hamba si wali wamutumbice u Muwaha wo lukumyo mu musalaba, 9ninga nha vyono gakulonga i Mandiko Gono Gelile, “Izinghani zono hamba liso likali si naziwona, hamba i likutu kuzihulika izinghani zono, hamba munhu yakali si nazihwesa mu nhumbula yakwe, zizo zo Mulungu yawawikaniziza wa walya wono wamwendile.” 10Alu zizo zo nghani zo Mulungu zono yacigubulilila mu nzila yo Muhe wakwe. Hambi u Muhe mweneco nha yo kavisunjililaga i vinhu vyose, sunga zinghani zo wuhile wo Mulungu mugati muno muno zono sizijelaga. 11Hambi nani mono kosuma kuzimanya zono zili mu nhumbula yo munhu yunji, langa hono si nhumbula yakwe u munhu mweneco? Yo nhavivyo kanyhi vyono, hasina mono kosuma kuzimanya i zo Mulungu, langa hono si u Muhe wo Mulungu du. 12Ninga ase alu, si cabocela u muhe we yinze, langa camubocela u Muhe mono yakulawa kuli Mulungu, ho yacipele u wumanye wo kuzimanya azilya zono capegwa no Mulungu. 13Holeka ase cikwijiza, ninga si kwe zinghani zono cejizizwa mu mahala ge cimunhumunhu, langa kwe zinghani zono cejizwa no Muhe, cikuzilolosa i zinghani zo Muhe kuli wono wena u Muhe yuyo. 14U munhu we ciyinze-yinze si kazibocelaga izinghani zo Muhe wo Mulungu. Hambi u munhu we liwala lilyo, izinghani zo Mulungu, nha wulele du kuli mwene, ku soko vyono zimupulute imahala gakwe, hambi zene, nha zitanjikaga ko wutazi wo Muhe du. 15Ninga u munhu mono yena u Muhe yuyo, yuyo langa yo kosuma kuwumanya u wuswanu wa vyose, nayo hamba sikosuma kuhoswa na munhu wo wose. 16Nago i Mandiko Gono Gelile gakutya, “Yo nani mbi mono kosuma kugamanya i mahala go Muwaha? Yo nani 'mbi mono kosuma kumulanjiza?” Ninga ase, cina i lihala lya Kilisito.

will be added

X\