1 WAKOLINTO 16

1Alu, kuli zo wuhangulize we vinhu ku soko ye wanhu wo Mulungu, munoze nha vyono nawalajiliza we makanisa ga ku Galatiya. 2Wose muli nyenye, mu vilo vyose vye jumapili, mweze kuwika siya zipesa, nha vyono yinha, munhu ha nghango ya vyono katugaga, ho halece kuwa na soko kanyhi yo kuwa no wuhangulize wunji wo wose kolo nghuza. 3Nane kolo nghuza kwenyu, nowatuma wanji wa muli nyenye, wono mowahagula nyenye, ho wategule i baluwa, hamonga ne vipegwa vyenyu vye lihewa ku Yelusalemi. 4Na hono nane yiwe yinojeye mbite, ale cobitana nawo. 5Nolokuza u kwenyu kolo nakondya kukolela Makedoniya, hambi nha nina wuhile wo kukolela kuko Makedoniya. 6Lunji nolokwikalakala kuko kwenyu hadodo, hamba lunji nosuma kwikalana nanye mwipango lyose lye cinyuli, ho musume kunhaza njendelele no muhinzo wangu ko kose kono nobita. 7Sinyendile ho nghole kuko kwenyu musunho musunho du, lono nghujendelela no muhinzo wangu. Ninga nitumbiye kwikalana nanye kwa cidaha, hono u Muwaha yende. 8Ninga nowa nili baha hono Efeso sunga mwizuwa lye Pentekote. 9Hambi nha ndiguliywe mulango mugazi muno muno ku soko yo mulimo wangu muwaha wono wuli baha, hamba hawe howali na wenji wono wakumhinga mhinga. 10Na kolo Timoteyo yakuza kwenyu, ale mulanjilile, yalece kuwa na woga woga wo wose mwipango lono yali hamonga nanye, hambi u mwene nha yakwituma u mulimo wo Muwaha nha nene. 11Holeka munhu wo wose yalece kumubedegala, langa mumutazaje ho yawe no mulamu mu wujendelela no muhinzo wakwe, ho yasume kuza kwangu kanyhi, hambi ane no mweneco, nha nimulanjiliye muno muno, hamonga ne wandugu zetu. 12Kuli ze ndugu yetu Apolo, ane nimunena muno muno ho yaze kwenyu, hamonga na we zindugu wanji, ninga mwene si yakuhila kuza kuko lulu, langa kolokuza du kolo yikusumika. 13Ale, mwikalaje meso, kanyhi mwimaje mukamile mu wihuwilo, akuno musina woga, kanyhi mweze muli vilungo. 14Na zo zose zono mowa kunoza, muzinozezaje mu wendo. 15Nye wandugu zangu, si kotya muyimanyile i mhuga ya Sitefano vyono i wene, wo wanhu walongozi muno muno wo kuwubocela u wihuwilo we Cikilisito mu Akaya, na vyono welavizye ho wawetumamile i wanhu wo Mulungu. Nane nghumunenenyi anye nyo wandugu zangu, 16muwegaje i wanhu wono wenha wawo mu wutonji wawo, kanyhi no wutonji wo munhu wo wose mono vikwitumana nawo. 17Nane nghusangalala muno muno so wuze wa Sitefano, Fotunata na Akayiko ku soko wakondya kuhomela uwanjile wono cali cina nawo lono anye muli hasina. 18Hambi nha wayisangalaza nhumbula yangu, nha vyono wazisangalaza zinhumbula zenyu. Holeka yinojeye muwalumbe wanhu wawa. 19I makanisa gose ga ku Asiya gakumulamusenyi. Nayo Akula na Pilisika, hamonga ne wanhu wose wo Mulungu, wono wali mu kaya yawo, wakumulamusizenyi mu Cikilisito. 20We zindugu wose wakumulamusenyi. Nanye wose mwilamusizaje mu wendo wo Mulungu. 21Nane Pawulo nghumulamusenyi muno muno, no wandice wo muwoko wangu nene no mweneco. 22U munhu wo wose mono siyamwendile Muwaha, yaweze mulijitwe. Go Muwaha wuze! 23Ilihewa lyo Muwaha wetu Yesu Kilisito, liwezane nanye. 24No wendo wangu wuweze hamonga nanye, mu wilunza na Kilisito Yesu.

will be added

X\