1 WAKOLINTO 12

1Nye wandugu zangu, kuli ze vipegwa vyo Muhe, ane nyendile hono muzimanye viswanu zinghani zizino, 2nanye mumanyile vyono lono mwali si munapituka, mwali mutemigwe no kwajilizwa ne vihwani vye bwete. 3Ninga alu mumanye vyono u munhu wo wose mono yakutongwa no Muhe wo Mulungu si kosuma kutya, “Yesu mulijitwe!” Na kanyhi nha vivyo, u munhu wo wose si kosuma kutya, “Yesu yo Muwaha,” hono yalece kutongwa no Muhe Mono Yelile. 4Ne vipegwa vyo Muhe vili henji, ninga u Muhe mono yakuvilavya yumonga du. 5No witumami nawo wuli henji, ninga u Muwaha munya kwitumamilwa yo yumonga du. 6Kanyhi ko wuli no witumami nawo wuli henji, ninga u Mulungu yo monga du, mono yakulavya ivilungo vyo witume muli wose. 7No munhu wo wose kapegwaga u wuzelu wo Muhe so cambuzi ca wose. 8U Muhe kamupelaga yunji i nghani ye mahala, na yunji i nghani yo wusome, nha vyono yendile u Muhe yuyo du. 9Kanyhi u Muhe yuyo alu, kamupelaga yunji wihuwilo, na yunji kamupelaga cipegwa co kuponya, 10kamupelaga yunji cipegwa co kunoza mapoto, na yunji cipegwa co kuyiganula nghani yo Mulungu, na yunji cipegwa co wutanje we vipegwa vyono vikulawa mu Muhe na vyono si vyo Muhe, kamupelaga yunji cipegwa co kulonga milonjele ye cijenzi, na yunji kanyhi cipegwa co wulolose. 11Zizo zose yo milimo yo Muhe yuyo du monga, mono kamupelaga munhu na cipegwa cakwe cono cisimajiye, nha vyono yendile mweneco. 12Nha vyono winha u muwili monga, ninga wina wilunzwa vinji, ninga vikunoza muwili monga, ale nhavivyo vyo yinha kuli Kilisito. 13Hambi ase hamba ciwe cili Wayahudi, hamba ciwe si cili Wayahudi, hamba ciwe cili wawanda, hamba ciwe si cili wawanda, wose cabaputizizwa mu Muhe monga du, mu muwili wuwo monga, kanyhi ase wose cikang'weswa yuyo Muhe monga. 14U muwili si vyono wina cilunzwa cimonga du, langa wina vilunzwa vinji. 15Hambi alu hono u mugulu wali wutye, “Vyono ane no mugulu, si nili muwoko, hodu ane si nili wo muwili,” wule, alu mbeka wali wuwe si cilunzwa co muwili? Hamba hadodo! 16Na hono likutu nalyo lyali litye, “Vyono ane si nili liso, hodu ane si nili wo muwili yaye,” wule ku soko yo wulonje wuwo du, hodu likutu lyowa si cilunzwa co muwili? Aa ng'o! 17Na hono lu u muwili wose wali wuwe liso, alu likutu lyali liwe hayi? Na hono u muwili wose wali wuwe likutu, alu u munhu yali yasume nhawule kuhemvya. 18Ninga nha vyono yinha, u Mulungu yaviwika i vilunzwa vivyo mu muwili nha vyono yenda mweneco. 19Na hono i vilunzwa vyose vyali viwe cilunzwa cimonga, alu u muwili ma ho wali wuwe hayi? 20Hambi i mbeka nha yoyi, i vilunzwa vyo muwili vyo vinji, ninga muwili wo monga du. 21Holeka liso si lyosuma kuwutya muwoko, “Agwe si nghukusaka,” hambo mutwe nawo si wosuma kugatya magulu, “Anye, si nghumusacenyi.” 22Hamonga na zizo, yikwijela vyono vilunzwa vivilya vyo muwili vyono vijelaga nha visoceye, alu vivyo kumbe vyo vikusakwa muno muno. 23Kanyhi ne vilunzwa vivilya vyono cikuvihwesa vyono vyo si vikusaka lilumbo, kumbe vyo cikuvikamisa ko wulanjilile wono wucizize muno, ne vilunzwa vyo muwili vyono vijelaga kotya nha si vikwendeza, alu vivyo vyo cikuvidima muno muno, 24na hovili vilunzwa vinji vyono si vikusaka wulanjililwe. U Mulungu mweneco yawuwicila muwili wityatye wayo, no kucinoza cilunzwa cono cicepuciywe, ho ciwe ne lilumbo muno, 25ho halece kuwa na matemanuko mu muwili, langa vilunzwa vyose ho visume kwiyitaza hamonga. 26Na hono cilunzwa cimonga du, cituje wusungu, i vilunzwa vyose vikuwona wusungu hamonga du na hono cituje lilumbo, ne vilunzwa vinji vyose navyo vikusangalalana hamonga naco. 27Holeka anye wose muli muwili wa Kilisito, nanye wose muli vilunzwa vyo muwili wuwo. 28Nayo u Mulungu yawika mwi'kanisa, walongozi, watumwa, we kejete, wawizi, we kadatu, wejizi, hanyuma yayo, yakawa kuwawika walya wono wena vipegwa vyo kunoza mapoto, kuponya, kutaza, walongola, na wono wakulonga nonga njenzi. 29Alu wose watumwa? Wose wawizi? Wose wejizi? Wose wena cipegwa co kunoza mapoto? 30Hamba wose wena cipegwa co kuponya? Wose wena cipegwa co kulonga nonga njenzi? Hamba wose walolosa milonjele? 31Holeka mweze kusaka kupegwa vipegwa viswanu muno. Alu nane nomulajilenyi i nzila swanu muno muno yono yicizize zinzila zizi zose.

will be added

X\