1 WAKOLINTO 1

1Ane yo nene Pawulo, mono nacemwa ko wuhile wo Mulungu, ho niwe mutumwa wa Kilisito Yesu, hamonga na Sositene u ndugu yetu, 2nase, cikumwandicilenyi anye mono muli likanisa lyo Mulungu lyono lili kuko ku Kolinto. Anye mono mwakondya kwezezwa mu wilunza na Kilisito Yesu, kanyhi mukacemwa ho muwe wanhu wo Mulungu, hamonga ne wanhu wose, hanhu ho hose, wono wakumulomba u Muwaha wetu Yesu Kilisito, u Muwaha wawo, sunga na sese nhavivyo. 3Ilihewa no mulamu, wono wukulawa kuli Mulungu u Sogo yetu, na kuli u Muwaha Yesu Kilisito, viwezane nanye. 4Nane nghumulumba u Mulungu wangu nhondo zose, ku soko yenyu, ku soko vyono yakondya kumupelenyi, anye, i lihewa lyakwe mu nzila ya Kilisito Yesu. 5Hambi nha ku soko yo wilunze wenyu na Kilisito, nha mwakondya kuwa muli wagoli we vinhu vyose. Kanyhi, mwakondya kupegwa u wumanye wose hamonga ne vilungo vyose vyo kuganulila, 6hambi inghani ya Kilisito nha yakondya kukangazwa muli'nye, 7hamba si mucepuciywe cinji muli icipegwa co cose ca mu nhumbula, hono muwe mukuwulindila u wugubulwe wakwe u Muwaha wetu Yesu Kilisito. 8U mwene Yesu, komusikamyenyi nyenye wose sunga ko ku ndumo, ho muze mwijele musina yilema lyo lyose, kwizuwa alilya lyo Muwaha wetu Yesu Kilisito. 9Nayo u Mulungu mono yamucemenyi anye, ho muwe no wumonga no Mwanagwe Yesu Kilisito u Muwaha wetu, mwene yo mwihuwilwa. 10Nye wandugu zangu, cikumunenenyi muno, mwi'tagwa lyo Muwaha wetu Yesu Kilisito, vyono mweze mulaganiye kumonga, muli yo yose yono mukulonga, halece kuwa na matemanuko ganji go gose muli nyenye, muweze ne 'hweso limonga kanyhi no wuhile wumonga. 11Nye, wandugu zangu, izinghani azilya zono nazituga kulawa kuli wanhu wanji we mhuga ya Kuloye, zikulajila calinze vyono hagati yenyu, ho wuli wula kwiyitanga. 12Ane nha cinji nghusaka nitye nhavi, vyono, muli nyenye u munhu yakulonga na lwakwe, vyono yunji yakutya, “Ane nili wa Pawulo,” na yunji nayo yakutya, “Ane nili wa Apolo,” yunji nayo yakutya, “Ane nili wa Kefa,” na yunji nayo yakutya, “Ane nili wa Kilisito.” 13Alu wo wutya, Kilisito Mwene yatemanuce? Hamba lunji Pawulo yo yatumbikwa mu musalaba ku soko yenyu? Hamba kowa lunji mwabaputizizwa mwi'tagwa lya Pawulo lo? 14Ninga ane nghumulumba u Mulungu, vyono si namubaputiza munhu wo wose muli nyenye, langa wanhu wejete du, wo wa Kilisipo na Gayo hodu du. 15Holeka hasina munhu wo wose mono kosuma kutya yeze yabaputizizwa mwi'tagwa lyangu nene Pawulo. 16(Oo! Munenelaje, kumbe nawabaputiza na we mhuga ya Sitefano nhavivilya, ninga si nitumbiye vyono nowa namubaputiza munhu yunji wo wose kanyhi kuciza wawano.) 17Ane Kilisito si yanhuma ho niwe kubaputiza wanhu, langa yanhuma ho niluganule u Luganuzi Luswanu, kanyhi na vyono mu wuganule wangu, ndece kwitumbila i mahala no wulonji we wanhu wanji, i vilungo vyo wufwe wa Kilisito wa mu musalaba, ho vilece kuwa nha nghani ya bwete du. 18Hambi inghani yono yikulolosa zo wufwe wa Kilisito mu musalaba, yikuwa nha nghani ya wulele kuli walya wose wono wali mu mukumbo wo wajilile, ninga kuli ase mono cili mu nzila ye mhonelo, inghani yiyo, vyo vilungo vyo Mulungu. 19Hambi i Mandiko Gono Gelile nha gakulonga gakutya, “Nogahodanga i mahala ga we mahala, Kanyhi nowuwembula no wizuce wa wono wasomile.” 20Alu wa hayi wa muli nyenye, we mahala? Hamba wahayi lu, u mwijizi wo wulajilize? Hamba u munghula wo wuwanji wa mu vilo vivi, yali hayi lo? Ninga u Mulungu, yaganoza i mahala ga mononze yiyi, kuwa wulele du, hali Mwene. 21Ninga nha vyono yinha inghani ye Mahala go Mulungu, iwanhu si wosuma kumumanya u Mulungu, ko kwitumamila i zinzila ze mahala gawo weneco. Ninga hanhu hayo, u Mulungu yenda kuwakomboza wawalya wono wakwihuwila mu nzila ye cinhu cono i we mahala, wakuziwona nha kotya wulele du, nha cinji inghani yono cikuyiganula. 22Alu ati i Wayahudi wakusaka citanjilo, nawo i Wagiliki wakulondola mahala, 23ninga 'se, cikumuganula Kilisito du mono yatumbikwa mu musalaba. Ninga kuli Wayahudi inghani yiyi, yili cikobazo kuli wene, na kuli iwanhu wono si Wayahudi, inghani yiyi, wulele du kuli wene, 24ninga kuli awalya wono wakondya kucemwa, i Wayahudi na wono si Wayahudi Kilisito vyo vilungo vyo Mulungu ne mahala go Mulungu. 25Hambi cono cikwijela nha wo wulele wo Mulungu, nha co cina i mahala gono gacizize i mahala ge wanhu, na cono cikwijela kotya nha wo wusocele wo Mulungu, co cina vilungo muno muno si nha ivilungo vye wanhu. 26Nye wandugu zangu, muvikumbucilaje ivilo lono mwacemelwa no Mulungu, vyono wanji wa muli nyenye, mu wulanje we cimunhumunhu si mwali we mahala, ne vilungo, hamba we lilumbo lya hacanyha. 27Nha cinji wo wutya, u Mulungu yagahagula agalya, gono yinze yigawonaga nha wulele du, ho yasume kuwakoza cevu i we mahala, na kanyhi yagahagula agalya gono yinze yigawonaga nha wusocele du, ho yawakoze cevu wawo wono wali vilungo. 28Kanyhi u Mulungu yakazihagula zizilya zono hamba mu mahweso ge ciyinze-yinze, zikwijela vyono zisina cambuzi hamba hadodo kanyhi zibedegaywe muno muno, zo nghani zono si zali zili baho kulawa na katali, na mu nzila ya zizo, ho yasume kuziwusiza lukulu mu mahweso ge wanhu, izinghani zono wanhu wehwesaga vyono zina cambuzi. 29Holeka hasina munhu wo wose mono kowa yena cinhu co cose co kwilumbila hali Mulungu. 30U Mulungu mweneco du yo yamulunzenyi anye na Kilisito Yesu. U Mulungu yamunoza Kilisito, yo yawe go mahala getu, na mu nzila yakwe du, ase mo cikulamulilwa no Mulungu, cikuwa cili wanhu wo Mulungu mono celile, kanyhi mono cakondya kukombozwa nayo. 31Ale, nha vyono i Mandiko Gono Gelile gakutya, “Holeka mono yakusaka kwilumba yelumbilaje du u mulimo wo Muwaha.”

will be added

X\