1 Gà dàmər gà, i ndìv a à bazlam ŋa ka, nda magwàɗà a kurumaha ka: Ŋgeywim ba agəra ana kurum mandzà ŋa i tə̀v ilik ŋa nda gà Batsàh kwa ŋa ya. I ye a ba tsà, na aà mewètsè a kurumaha gà bazlam ana ì wetse a kurumaha akahər ata ya. I mè a aka mewètsè a kurumaha asa. Kàmala taŋa ya na dìte ki ndzwim a hiywe nda metsèhe, duwa a ge a kurum a tsìye. 2 Gwim metsèhe nda tə̀v gà na ta gewa dukw ana ŋgwal ŋa tsìye, ti ne kàmala gà kəra ya, àràŋgaf àràŋgaf, dìte ti tsetsef a duwa a mburma, ta gweɗe a ter a ka, sasayum ba ya. 3 Ama kwa na gà masàsà ŋa nda ndzer a, tsə̀ka, tar tsà. Kàmala taŋa ya, kwa na kà nekwa gà mburma Mbulum a. Kwa asa na kà hamawukwa a Mbulum nda ndzə̀ɗa Mèzìte Mesife ŋgar a. Dìte ki ŋgeyekwe a ba ka, agəra ana kwa mandzà ŋa i tə̀v ilik ŋa nda gà Yesuw Kiristi ya. Ama kwa ka, ki dzèkwe a are aà dukw ana mburma ta gewa, ta gweɗe a naha ka, ŋgwal ŋa ya tsà. 4 Na mege gà dukw ata ti ne ndzer ka, ana ka, ìye tèkeɗè, i ŋget a vatwa aà medzèr zləm mbàŋa te. Na wùra a gweɗe a, ìye ka, ŋgwal ŋa, àma taŋa ka, i sle a aà metsìkè a, à zè a taŋa. 5 Aɗàbà ìye ka, gà Yahuda ndzer ŋana, tar na ta wa ìye ya. Kàmala taŋa ya, ìye tèkeɗè, kəla gà Israyel, dìte ìye ka, i gwala Benyamin. I tə̀v ana ta wa ìye, ì ge mehine tsàmàkə̀r a ka, tə sàs ìye. Nda tə̀v mazàzàmà məpàlà àhəm gà Yahuda ka, ìye i lìwiŋ gà Farisa. 6 Yàa zazam fəla gà Yahuda kalkal lèlè. Yàa ɗif dər a mburma tèrihhwè lèlè mbàŋa, i tə̀v ana ì sèwèr are a gà na tə zazam vatwa Yesuw a. Yàa nəs à məpàlà àhəm mə̀r ilik tsìdze. Nda tə̀v fəla mə̀r ka, ìye ka, ŋgwal ŋa hinne. 7 Akahər ata ì dzala ka, ì gwa: Gà dukw ata ka, a giŋ a ŋgùlùm, tì zlèk a ìye. Ama kinèhe, aɗàbà Yesuw Kiristi ka, i fə̀r ahər kàmala dukw taf masak ŋa ya, a giŋ a ŋgùlùm asa tsà. 8 Ama kəla ka, ndzer kaɗə̀ŋ, gà dukw ata ɗekɗek tsà, ì fə̀r aà gà dukw ana tserdze ya ka, kàmala dukw taf masak ŋa ya, aɗàbà ana ì sər Yesuw Kiristi Batsàh ga ŋa ka, taŋa a zè a gà dukw ŋgìɗ tserdze. Aɗàbà ŋgat ka, i miyek a à gà duwa tserdze. I fə̀r ahər ka, safar safar kàmala gwastak ana masak ŋa ya, na dìte i ta ŋget a Kiristi ya. 9 Say mandzà ŋa nda ŋgat ilik na ì waya ya. Ama i ta gweɗe a ka, ìye ŋgwal ŋa ika miɗ Mbulum, agəra dukw ana piŋŋè ì ge ŋgwal ŋa, ì zazam məpàlà àhəm gà Yahuda ya ka, i gweɗe a asa tsà. Ama kəla ka, duwa a riŋ ilik ì sir a dər, i gweɗe a, ìye ŋgwal ŋa ika miɗ ŋgar a ka, agəra ana ì gə̀s Yesuw Kiristi nda gə̀zlə̀ŋ a. Mbulum na a ne à ìye ŋgwal ŋa ya, aɗàbà megìse ana ì gə̀s ŋgat a. 10 I waya ka, duwa ilik pəra. A sèsiŋ ka, masə̀rà Kiristi nda ndzə̀ɗa ŋgar ana a mbəl dərra i məmə̀ta ya ya. I waya asa ka, i ŋget a a mesèwère ŋgar ana a sèwèr a mbàŋa, na dìte i ne a kàmala ŋgat ana a mə̀t a. 11 Na yàa ge kataya ka, ku mege meme, ìye tèkeɗè ka, i ta mbilere a i məmə̀ta ya, kàmala ŋgat a mbàŋa asa. 12 I gweɗe a ka, yàa ŋgat dukw ana i veve a ya ka, i tsik a tsà. Dìte i gweɗe a asa ka, ìye ka, ŋgwal ŋa, bakal a riŋ i tə̀v ga tsə̀ka, i gweɗe a tsà asa mbàŋa. Ama ka, i de a aka miɗ aka miɗ nda məmə̀rà àba dzəŋdzəŋ, na dìte i ŋget a gà dukw ata ya ìvaɗ, aɗàbà Yesuw Kiristi na a làh mezle ìye, ì ne mburma ŋgar a. 13 Gà dàmər gà, i gweɗe a, gà dukw ata tàa ne biy gà ka, i gweɗe a zùkw tsà. Ama dukw ilik na i ge a ya pəra: Yàa miyak à gà dukw ana i dəba ya, i mir a àba aà maŋgàtà dukw ana ika miɗ gà ya, kàmala gà wele ana tì dzìr a ba aà mivele, ta waya maŋgàtà duwa ya. 14 Iye ihər i vel a ɗigìrgìr aà mendze a tə̀v ana i ndze a iɗəm a ya, dìte i ta ŋget a dukw mayàba ana Mbulum a gwa, a ta vil a kwe a ya. Na a ne dukw mayàba ata ka, mesife awiya ŋa ana i ŋget a i tə̀v ŋgar i gər ŋa aɗàbà Yesuw Kiristi ya. 15 Aɗàbà taŋa, kwa ana kinèhe kàa simekwa ika vatwa Mbulum a ka, say dzalakwa kàmala taŋa ya. Na wùra a dzele a dukw ŋgìɗ pàm ika màgə̀r kurum a ka, Mbulum a ti ɗifer a dər parakkà. 16 Ama kəla ka, ku mege meme tèkeɗè, say zazamakwa ka, vatwa ana ki tèkwe a dər, kà zazamakwara haa kinèhe ya. 17 A kurum gà dàmər gà, kurum tserdze ka, gwim kàmala ìye ya. Fə̀rum aà gà na mede tar ŋgwal ŋa kàmala mə̀r ana mìi ɗif a kurum a à mede mə̀r ana ŋgwal ŋa ya mbàŋa. 18 Aɗàbà gà mburma riŋ hinne na mede tar à pèt a ka, tar gà ɓə̀zla menè are a Kiristi ana a mə̀t aà dìzl magə̀làwà ŋa ya. Yàa tsikeye a kurum gà dukw ata ka, sik dìŋ. Ama kinèhe ka, i tsik a kurum a asa hiywe. I tsik a kurum a ka, ɓə̀zl ɓə̀zl nda gà tuwa aà are. 19 A tə̀v ana mandzà aà bəra tar aka ndə̀v a ka, Mbulum a dzeye a à tar, ti de a a akwa ana a mbete a tsìye, aɗàbà ana ti zezem a ŋgat tsìye. Tə zazamawa ka, dukw ana gə̀zlə̀ŋ tar a waya ya ɗekɗek pəra. Ta gewa ka, dukw ana zirìm zirìm a ndeɗe aka ter a hwarwa ya. Dìte ka, ta ge a dər zlapa ìvaɗ asa. Tə dzalawa ka, aka dukw gər àhə̀ɗ ɗekɗek asa mbàŋa. 20 Ama kwa ka, gà mburma ana i ga i bəra Mbulum a. Kwa ihər ki vevekwe a Yesuw Kiristi Batsàh kwa ŋana mala məmbə̀là à kwa ya, dìte a dere a i gər ŋa ya, aà malə̀mà akaba nda gà kwa ya. 21 I tə̀v ana a dere a ya ka, a ta mbìɗ a à ba kwa ana tsèfek tsèfek ndzə̀ɗa iɗəm tsìye, na dìte ba kwa a nis a asa tsà, a ndze a aà bəra aà biybiy kàmala biy ŋgar ana ti zlìb a dər a. A ta ge a kàmala taŋa ya ka, nda ndzə̀ɗa ŋgar ana a kwere a gà duwa tserdze ya.
