MATA 1

1Yesuw Kiristi ka, a dara i gwala Davit a. Batsàh tsir tar ìbam, Abəraham. Araha na bazlam mawùba tar a: 2Abəraham a làh mewe Izak, Izak ìbam, a wa Yakuba, Yakuba tèkeɗè, a wa gà Yuda nda gà àsìŋ gà dàmər ŋgar ŋgìɗ tserdze. 3Yuda a wa gà Perez nda Zaraha, məmər tar ìbam, Tamara. Perez a wa Heseruna. Heseruna a wa Aram. 4Aram a wa Aminadab. Aminadab a wa Nasuna. Nasuna a wa Salmuna. 5Salmuna a wa Buwaz, məmər ŋgar ka, Rahab. Buwaz a wa Yubet, məmər ŋgar tèkeɗè, Rut. Yubet a wa Yasa. 6Yasa a wa Davit ana a ne batsàh ə̀bay akahər ata ya. Davit ìbam, a wa Salumun. Na a war ka, mə̀kəs ana a zla aà Wuriya ya. 7Salumun a daha, a wa Rabuwam. Rabuwam ìbam, a daha, a wa Abiya. Abiya tèkeɗè, a daha, a wa Asa. 8Asa ŋgat a wa Yusafat. Yusafat a wa Yuram. Yuram a wa Widziya. 9Widziya a wa Yutam. Yutam a wa Akas. Akas a wa Hezekiya. 10Hezekiya a wa Manasa. Manasa a wa Amus. Amus a wa Yusiya. 11Yusiya a wa Yekuniya, nda gà àsìŋ gà dàmər ŋgar tserdze. A wa taŋa ka, akahər ana ta gasa gà Israyel a Babila ya. 12I dəba madà tar ana tə da à tar a fata ya ka, Yekuniya a wa Salatiyel. Salatiyel ìbam, a daha, a wa Zarubabila. 13Zarubabila tèkeɗè, a daha, a wa Abihuda. Abihuda a daha, a wa Aliyakim mbàŋa. Aliyakim a wa Azur. 14Azur ŋgat a wa Sadukw. Sadukw ìbam, a wa Akim. Akim mbàŋa ka, a wa Aliyuda. 15Aliyuda a wa Aliyazar. Aliyazar a wa Matan. Matan ìbam, a wa Yakuba. 16Yakuba ìbam, a wa Yasufa kuɗa. Ŋgat ka, zal Mariya, məmər Yesuw ana tə zalar Kiristi ya. 17Dàgà aà Abəraham a haa aà Davit ka, mburma kurwa gəra faɗ na ta wa ba, zàzə̀ɗ dər zàzə̀ɗ dər a. Dìte dàgà aà Davit a, tsìkw haa a tə̀v ana ta gasa gà Israyel aka àhə̀ɗ Babila ya ka, mburma kurwa gəra faɗ asa mbàŋa. A gə̀s i fata ya tsìkw aà mawà Kiristi ka, mburma kurwa gəra faɗ asa mbàŋa na mawà ba tar ana tə zazaɗa dər a. 18Taŋa, meme na ta wa Yesuw Kiristi ya. Məmər ŋgar ka, zləm ŋa Mariya, makasl Yasufa. Ama aka na tàa zlaba zùkw tsìye ka, tə sàmata ka, hitwis aka ɗera aka Mariya ya, ndzə̀ɗa Mèzìte Mesife Mbulum aka vəlar aɗəm kəla. 19Yasufa ana makasl ŋgar a ka, a tsàh lèlè, mala ndzer ŋa ika miɗ Mbulum, a sàsar meɗife à bakal Mariya ika miɗ mburma tə tsaraka tsà. Aɗàbà taŋa a waya mimiyeke à makasl ŋgar sìfèk nda akəl pəra. 20I tə̀v ana a riŋ a dzele a gà gər kataya, aka miyak dər zùkw tsìye ka, gawla Mbulum ilik a pàtar àba i sunwa ya, a gwaɗar: "Yasufa gwala Davit, ka ta ge magə̀ɗa aà mazlà Mariya kàmala daala yak a tsà, aɗàbà a ŋgat kəla ka, nda ndzə̀ɗa Mèzìte Mesife Mbulum, tsə̀ka, àhəm mburma tsà. 21A ta we a kəla ŋa ka, asləka ŋa. Ki zeler a Yesuw, aɗàbà a ta mbele a à gà mburma ŋgar i bakal tar a." 22Gà dukw ata tserdze ya, ta ge a ba ka, dìte dukw ana Mbulum Batsàh kwa ŋa a tsik akahər ata nda ahər mala məmà à guma ŋgar a ka, aka pàt àba lèlè kuɗa. A gwa ka: 23"Də̀m gama ata a ta ŋget a kəla. A we a ka, ti ti zel a a kəla ŋa, Imanuyel," kàmala megweɗe ya: "Mbulum a riŋ a ndze a nda kwa." 24Alə̀ka Yasufa a pìɗeke ka, a ge dər kàmala biy na gawla Mbulum ata a tsiker a. I dəba ŋa ya, a zlaba Mariya aà daala ŋgar kuɗa. 25Ama tàa həna nda ŋgat tsà, haa a pat ana a wara iɗəm kəla ata Yasufa a zeler a Yesuw a dzekwiŋ.

will be added

X\