1 Maaga nda magə̀zlà ba a dara aka màgə̀r kurum dze ana, i ŋga ya? A dara ana, i meèweke kurum ana ŋgwal ŋa tsà, a be a kurum zeɓir zeɓir i gə̀zlə̀ŋ kə̀la pat a tsìye? 2 Ka wayum gà duwa pàmpàm hinne, àma ki ŋgetwim a tsà. Ki gwim a are aka dukw mburma, nda menèba are mbàŋa, àma ki ŋgetwim a ɓàv tsà dər akaba asa. Aɗàbà gà dukw ata na kinèhe kurum riŋ ihər ki gwim a maaga, nda magə̀zlà ba ika màgə̀r kurum a. Ki ŋgetwim a gà dukw ata kà wayum a tsə̀ka, aɗàbà ana kàa hamum a Mbulum tsìye. 3 Ku mege kàa hamumar tèkeɗè, ki ŋgetwim a tsà, agəra ana kàa hamumar ndaka vatwa ŋa tsìye, nda gà na a sàs a kurum ka, dukw ana kurum kà wayum ki ŋgeywim a dər ba i gə̀zlə̀ŋ kurum ɗekɗek a. 4 A kurum ana ki gwim a duwa kataya kàmala gà ɓə̀zla muva ya, kà sərum ti tsìye, na wùra aka waya dukw gər àhə̀ɗ hinne ka, ŋgat a ne mala menè are Mbulum a? Aɗàbà taŋa na wùra à gìs a masla nda gər àhə̀ɗ ka, ŋgat a ne mala menè are Mbulum ìvaɗ. 5 Kurum kù gwaɗum ana, dukw ana ta wetse i wàkità Mbulum ana, dukw masak ŋa taf a? A gwa ka: "Mbulum a ge a are aka mesife ana a vəl a kwa ya. A waya, na dìte ki mèkwer a dər a." 6 Ama ndzə̀ɗa ŋgar ana a vəl a kwa ya ka, a zà dər gà dukw meèweke ana i gə̀zlə̀ŋ kwa ya tserdze. A de a ka, aka miɗ aka miɗ kàmala ana mewètsè ŋa a riŋ i wàkità Mbulum ka, ta gwa: "Mbulum a niw a gà ɓə̀zla zlapa, dìte a vil a ndzə̀ɗa a gà na ta həna à gər a bə̀ɗ a." 7 Aɗàbà taŋa, gə̀sum àhəm aà Mbulum. Məsakum à ə̀bay sitene, dìte a vel a à kurum a. 8 Sìrìkwim a tə̀v Mbulum. Ŋgat tèkeɗè, à sìrìk a a tə̀v kurum mbàŋa. A kurum gà ɓə̀zla bakal, dumara, barum bakal aà ahər kurum a. A kurum ana madzàlà gà gər i gə̀zlə̀ŋ kurum mandzalama sula ya, miyakum àba à madzàlà gà gər ata ŋgwal ŋa tsìye. 9 Ndzum ka, kàmala ana ki sèwèrwim a are ya, tuwum hinne, aɗàbà bakal kurum, kə̀ɗum ba ìvaɗ. Sawla kurum ana ki sewlwim a zləmana ya ka, nwim dər tuwa mbàŋa. Maŋgàyà ba kurum ana ki ŋgeywim a ba ya tèkeɗè ka, nwim dər matsə̀ɓatsə̀ɓ i gə̀zlə̀ŋ kurum ìvaɗ asa. 10 Hənum à gər a bə̀ɗ aka miɗ Mbulum, dìte Mbulum tèkeɗè, a ti sìkèh a à kurum a dər mbàŋa. 11 Gà dàmər gà, ka ti tsikwim dukw ana ŋgwal ŋa tsìye aà mburma tsà. Na wùra aka tsik dukw ana ŋgwal ŋa tsìye aà dàmər ŋgar, kige tsà à mèr a à bakal mbàŋa ka, taŋa ka, a tsik dukw ata ŋgwal ŋa tsìye ka, aà məpàlà àhəm Mbulum. A mà à bakal ka, a ŋgat mbàŋa. Avùkw ana à gìs a məpàlà àhəm ŋgar a ka, a ne mala məmàr à bakal ìvaɗ dze ana, meme? 12 Mbulum ilik na a vəl məpàlà àhəm a mburma ya. Dìte ŋgat ilik asa na mala masàsà ikaba sèriyè mburma ya asa mbàŋa. Aɗàbà ŋgat ilik na mala ndzə̀ɗa ana a sle a aà məmbə̀là à mburma i məmə̀ta ya, kige tsà aà medzèyè à tar asa mbàŋa ya. Dìte kər dze ana, weke na ki mè a à bakal a mburma ya? 13 A kurum gà mburma ana ki gweɗwim a: "Və̀ɗəna, kige tsà ndidwè ka, mìi mèh a ba, mìi de a a metsèkèle a kwite ŋa a tə̀v ŋa, mìi ve a riŋ i fata ilik, na dìte mìi ŋget a siŋgwè hinne ya." Ama dzùm zləm a dukw ana i tsik a kurum a ya: 14 Kurum dze ana, meme na kà sərum dukw ana a ta ge a ba i tə̀v kurum a ndidwè ya ya? Mesife kurum a ndze a dze ana, hilè na kà sərum a? Mesife kurum ka, kàmala hə̀dzə̀k ana a dwiz a, zàkwayiya ka, a riŋ asa tsà, aka mbete ya. 15 Ŋgùlùm ki gweɗwim a ìvaɗ ka: "Mege Mbulum a vil a mə̀r a vatwa ka, mìi ndze a nda mesife mə̀r, mìi ge a naha, kige tsà mìi ge a naaka." 16 Ama kinèhe ka, kurum riŋ ihər ki gilwim a à gər hinne, nda megè zlapa ana, taŋa dze ana, lèlè yà? Megè zlapa ana kataya ka, lèlè tsà. 17 Aɗàbà taŋa, na wùra a sər naha ka, dukw ana ŋgwal ŋa ya, àma a ge a taŋa tsə̀ka, a ge a ka, bakal.
